شہر اقبال دیاں گلاں
طلعت عباس خان
سیالکوٹ دی دھرتی وچ مفکر پاکستان علامہ محمداقبال نے جنم لیا۔ ایہو شہر سابق بھارتی وزیراعظم گلزاری لال نند دی جنم بھومی اے اوہ جولائی 1898ء وچ پیدا ہوئے۔ ابتدائی تعلیم ایتھوں حاصل کیتی۔ ایف سی کالج لہور توں اقتصادیات وچ اعلیٰ تعلیم حاصل کیتی۔ اوہناں نوں بابائے اقتصادیات وی کہیا جاندا سی۔ اوہ ممبئی تے احمدآباد دیاں یونیورسٹیاں وچ پڑھاندے رہے۔ سیاست وچ آئے تے وزیرخارجہ تے ڈپٹی چیئرمین پلاننگ کمیشن رہے۔ کئی واری لوک سبھا دے ممبر منتخب ہوئے۔ آخر کار وزارت عظمیٰ دے منصب تے جا پہنچے۔
اوہناں دی زندگی سادگی نال بھری سی۔ دنیا بھر وچ بڑے گھٹ اجہے وزیراعظم ہوئے نیں جو کرائے دے مکان وچ رہے ہون۔ ایتھے تے کسے نے ذاتی تجوریاں بھریاں’ کسے نے گھڑیاں ویچیاں’ کسے نے دوجے ملکاں وچ بلڈنگاں خریدیاں’ کسے نے کرنسی ایکسپورٹ کیتی پر سیالکوٹ بارے بھارتی وزیراعظم نے اپنا مقام وکھرا بنایا۔ ایہ اک نہیں دو واری وزیراعظم رہے۔ جواہر لال نہرو دے بعد 1964ء وچ وزیراعظم بنے۔ 1966ء وچ لال بہادر شاستری دے بعد وزیراعظم بنے۔ جنوری 1998ء وچ احمدآباد وچ 99 دی عمر وچ جہاں فانی توں کوچ کیتا۔ رخصت ہون ویلے کسے قسم دا کوئی بینک بیلنس’ کوئی جائیداد’ کوئی ذاتی گھر تک نہیں سی۔ پاکستان وانگوں بھارت وچ حد درجے کرپشن اے پر جوڈیشری دا نظام ساڈے توں چنگا اے۔ اوتھے اج وی گلزاری لال نند ورگے کردار مل سکدے نیں پر ساڈے ایتھے نہیں۔ بھارت وچ کئی اجہے سیاستدان اج وی موجود نیں جہناں دے اثاثے کجھ نہیں پر ایس طرح دی ودھیا مثال ساڈے ایتھے ویکھنا ناممکن اے۔
سیالکوٹی وزیراعظم نوے ورھے دے ہوئے تے اوہناں دے کول مکان دا کرایہ دین لئی پیسے نہیں سن۔ ایہ مالک مکان نوں پنج مہینے دا کرایہ نہ دے سکے۔ مالک مکان اک دن غصے وچ آیا تے سامان چک کے باہر سٹ دتا سامان لے کے فٹ پاتھ تے آ گئے۔ کجھ محلے والیاں نے مالک مکان اگے التجا کیتی۔ کرایہ آپ دین دا وعدہ کیتا تے اوہناں نوں گھر وچ رہن دی اجازت ملی۔ اوسے دن اک رپورٹر اوتھوں گزریا اوہنوں بزرگ نوں ویکھ کے ترس آیا۔ اوہنے بزرگ شخصیت دی سامان سنے فوٹو بنائی اوہدے بعد سٹوری وڈے اخبار وچ چھاپ دتی۔ سٹوری کیہ چھپی قیامت صغری برپا ہو گئی۔ خبر دے بعد وزیراعلیٰ تے وزیراعظم نوں پتہ لگا کہ گلزاری لال نند کس مفلسی وچ حیاتی گزار رہے نیں۔ بعد وچ سابق وزیراعظم نوں سرکاری مکان تے ماہانہ وظیفہ دتا گیا۔ ایس تھوڑی جہی رقم نال نویں زندگی شروع ہوئی۔ مالک مکان نوں جدوں پتہ لگا کہ میرا کرایہ دار گلزاری لال نند اے تے اوہنے معافی منگی۔جدوں تک گلزاری لال نند زندہ رہے اوسے کرائے دے مکان وچ رہے۔
ساڈے اک ہور گوانڈھی ملک افغانستان دے سردار دادخان جدوں صدر سن تے اوہناں نوں اطلاع ملی کہ کابل وچ ٹانگے دا کرایہ بڑا ودھ گیا اے۔ سردار داد خان نے عام لباس پا کے کوچوان دے کول جا کے پچھیا میں پل چرخی جانا اے توں کناں کرایہ لویں گا؟ کوچوان نے سرداد نوں نہیں سی پچھانیا۔ بولیا میں سرکاری مُل تے نہیں جاواں گا۔ سردار دادخان نے کہیا ویہہ لے لے۔ کوچوان بولیا ہور اُتے جا۔ داد خان نے کہیا پنجی’ کوچوان بولیا ہور اُتے جا’ سردار داد خان نے کہیا تریہہ۔ کوچوان نے کہیا تھوڑا ہور اُتے جا’ سردار داد خان نے کہیا پینتی۔ کوچوان نے کہیا مارو تالی ‘ مینوں منظور۔ سردار داد ٹانگے تے بہہ گئے۔ ٹانگے والے سردار داد خان ول ویکھ کے پچھیا کہ تو ںاشتہاری ایں کہیا اُتے جا’ کوچوان نے کہیا فوجی ایں’ کہیا ہور اُتے جا’ کوچوان نے کہیا مارشل او؟ کہیا ہور اُتے جا’ کوچوان نے پچھیا تسیں کدھے سرداد دادخان تے نہیں۔ سردار صاحب نے کہیا جی (دے تالی) کوچوان دا رنگ اڑ گیا’ کوچوان نے کہیا مینوں جیل گھلو گے؟ کہیا ہور اُتے جا’ جلا وطن کرو گے’ داد نے کہیا ہور اُتے جا’ کوچوان بولیا پھاہے لائو گے’ سردار دادخان کہیا دے تالی… ایہ دوویں واقعات حسب حال یاد آ گئے۔ ساڈے حکمران تے وزیر ایس طرح حالات دا آپ جائزہ لیندے تے مہنگائی تے کرپشن دا خاتمہ ہو چکیا ہوندا ۔٭
