بیانیہ اِنج بنائی دا اے

حمید اللہ بھٹی

ایس ویلے ملک نوں ساکھ’ عزت تے وقار بچان دا مرحلہ درپیش اے مگر انج محسوس ہوندا اے جیویں قیادت نوں سنگین صورتحال دا ادراک نہیں۔ حالانکہ پوری دنیا دیاں نظراں ایس ویلے پاکستان اتے لگیاں نیں لہٰذا ضروری اے کہ ملک دی سیاسی تے عسکری قیادت دُوجی مصروفیات چھڈ کے تحفے وچ ملی گھڑی نوں ویچن دے جرم دا ارتکاب کرن والیاں نوں احتساب دے کٹہرے وچ لیاوے۔ جے گھڑی فروخت کرن دے مرتکب افراد نوں سزا دین وچ کوتاہی یا سستی دا مظاہرہ کیتا گیا تے عالمی سطح تے وطن عزیز دی ساکھ’ عزت تے وقار نوں ناقابل تلافی نقصان ہو سکدا اے۔ اج اسیں اپنے پروگرام وچ اہم ترین مسئلے دا جائزہ لواں گے ۔ اپنے پروگرام وچ دنیا دے اک نامی گرامی چور نوں وی دعوت دتی اے تاں جے اوہدی ماہرانہ رائے لے کے جرم دی سنگینی نوں واضح کیتا جا سکے۔ تحفے وچ ملی گھڑی نوں ویچنا معمولی نہیں بلکہ اک ناقابل تلافی جرم اے تے آئو ناظرین تے سامعین چلنے آں پروگرام ول تے جائزہ لینے آں کہ دوست ملک ولوں تحفے وچ دتی جان والی گھڑی نوں ویچن نال ملکی عزت و وقار نوںکنا وڈا نقصان ہویا۔
سعودی عرب تے پاکستان دونویں ایسے برادر اسلامی ملک نیں جہناں نے ہر اوکھے ویلے اک دُوجے دا بھرواں ساتھ دتا اے۔ عرب اسرائیل جنگ دے دوران پاکستان نے جے عرباں دا ودھ چڑھ کے ساتھ دتا تے سعودی عرب نے وی 1971 دی پاک بھارت جنگ دے دوران نہ صرف پاکستان دا ہر ممکن ساتھ دتا بلکہ اوس ویلے تک بنگلہ دیش نوں ایہہ کہہ
کے تسلیم کرن توں انکار کر دتا کہ جدوں تک پاکستان خود تسلیم نہیں کردا اوہ وی بنگلہ دیش دی علیحدگی نوں تسلیم نہیں کرے گا۔ ایسے طرحاں مسئلہ کشمیر دے دوران وی سعودی عرب ہمیشہ پاکستان دے نال رہیا اے لیکن عمران خان دی اک حرکت نال دونویں برادر اسلامی ملکاں دے تعلقات خراب ہون دااندیشہ پیدا ہو گیا اے۔ ویکھو سعودیہ دے شاہی خاندان نے عمران خان نوں بطور پاکستانی حکمران قیمتی گھڑی تحفے وچ دتی جہڑی اوہناں نے توشہ خانہ توں لے کے ویچ دتی۔ توشہ خانے توں ایس طرحاں گھڑی لینا تے فیر دوبارہ ویچنا ایساسنگین جرم اے جہڑا دنیا بھر وچ کدھرے ہور نہیں ہویا۔ ایس لئی تے پوری دنیا نہ صرف پریشان اے بلکہ حیران وی اے تے حاکمانِ وقت توں مطالبہ کر رہی اے کہ سنگین جرم دے مرتکب نال آہنی ہتھاں نال نبڑیا جاوے کیوں جے گھڑی ویچن دی واردات توں دو ملکاں وچ نہ صرف کشیدگی پیدا ہون دا قوی امکان اے بلکہ عالمی امن نوں نقصان پہنچان دا کارن وی بن سکدا اے۔
ایس ویلے ساڈے نال ٹیلیفون لائن تے موجود نیں دنیا دے منجھے ہوئے اک نامی گرامی چور’ جہناں نے چوری دے شعبے وچ بڑا نام پیدا کیتا اے۔ ایہہ دن رات چوریاں کرن وچ مصروف رہندے نیں۔ ریکارڈ چوریاں دی بنا تے ای چوراں دی دنیا وچ اج اوہناں دا نام عزت و احترام نال لیا جاندا اے۔ اسیں اج اوہناں نوں اپنے پروگرام وچ بلایا اے تاں جے اوہ اپنی ماہرانہ رائے نال ساڈے جئے کم فہم نوں نواز سکن کہ توشہ خانے تون گھڑی لے کے ویچنا کنا وڈا جرم اے تے ایس واردات توں چوراں دے جذبات کس حد تک مجروح ہوئے نیں۔ناظرین تے سامعین پروہنا چور تہانوں دَسے گا کہ اصل چوری کیہ ہوندی اے تے فیر چوری دا مال ویچن دے آداب کیہ نیں؟
بہت شکریہ جی! تسیں اپنے قیمتی وقت توں اج ساڈے لئی کجھ لمحے کڈے جہدے تے تہاڈے دلوں ممنون واں۔ ویسے تے سانوں کیہ پوری دنیا نوں پتہ اے کہ تسیں دن رات چوریاں جئے نیک کم وچ مصروف رہندے او۔ فیر وی تہاڈے کولوں پچھنا ایہہ اے کہ چوریاں دے علاوہ تہاڈے اج کل ہور وی مشغلے نیں یا صرف چوریاں ای؟ بہت شکریہ کہ تسیں مینوں ناچیز نوں قوم نال مخاطب ہون دا موقع دتا ۔ مصروفیت دا کیہ دَساں جی چوراں وچ بہت عزت و احترام حاصل اے۔ چوریاں کرن دے نال ایس شعبے وچ نویں آن والیاں دی تربیت دا فریضہ وی سرانجام دے رہیا واں۔ بس جی اللہ دا بہت ای کر اے’ تسیں سنائو؟ تہاڈے کولوں پچھنا ایہہ اے کہ دنیا بھر وچ بطور عالمی چور تسیں بڑا نام پیدا کیتااے۔ کیہ کدی توشہ خانے توں گھڑی لے کے ویچن دا وی جرم کیتا اے؟ نہیں جناب! ایہہ کم کرن دا اج تک نہیں سوچیا اے نہ ای کدی ایسا موقع ملیا اے۔ ویکھیا ناظرین اک ایسا چور جہنے دنیا بھر وچ چوریاں کیتیاں جہدے سارے دن رات ای چوریاں وچ لنگھے۔ اوہناں نے وی کہہ دتا اے کہ کدی وی توشہ خانے توں گھڑی لے کے فروخت نہیں کیتی۔ا یس توں ثابت ہو گیا کہ چوری کرنا تے لوکاں نوں لٹن توں وی وڈا جرم توشہ خانے توں گھڑی لے کے ویچنا اے ایسے لئی ایسے کسے کم توں چور وی اجتناب کردے نیں۔ ہن تسیں فیصلہ کرو کہ عمران خان نے کنا بھیانک جرم کیتا اے۔ آئو سارے رل کے ایس جرم دے خلاف آواز چکیے تے مجرم نوں کڑی توں کڑی سزا دوان لئی حکومت وقت نوں مطالبہ کرئیے۔ ویکھو توشہ خانے توں دس روپے دے کے قیمتی قالین ضرور لیا گیا۔ قیمتی مرسڈیز کجھ لکھ دے عوض ہتھیا لیتی گئی مگر تحفہ لے کے کسے وی حکمران نے دوبارہ ویچن دا جرم نہیں کیتا۔ ایہہ جو یوسف رضا گیلانی دے گھر توں ترک صدر دی اہلیہ دا ہار برآمد ہون دا الزام لایا جاندا اے ‘ ایتھے وی ذہن نشین رکھن والی گل ایہہ اے کہ اوہناں نے کدھرے ویچن دے بجائے پول کھلن تے اوہ ہار واپس کردتا سی لیکن عمران خان نے تے گھڑی ای ویچ دتی۔ ہائے اینا وڈا جرم’ یااللہ! ایس قوم اتے تے ملک اتے رحم فرما کیسے کیسے لوک حکمران بنن لگے نیں۔
ایہہ جہڑے لوک گلاں کردے نیں کہ ملک وچ ات گرد اک واری فیر منظم تے فعال ہون لگے نیں۔ جہناں دی کارروائیاں نال کے پی کے’ بلوچستان’ کراچی مگروں اسلام آباد جیا دارالحکومت تک محفوظ نہیںمگر میرے خیال وچ ایس توں وی وڈا جرم توشہ خانہ توں گھڑی لے کے ویچنا اے۔ ملک دے ہر شہری دا اولین فرض اے کہ تہاڈے ساریاں دا حقیقی مسئلہ گھڑی ویچنا سمجھو ڈالر دی کمیابی’ بند ہوندی صنعتاں’ گھٹ ہوندی برآمدات’ قرضیاں دا پہاڑ ایہہ ثانوی مسئلے نیں جہناں نوں حل کرنا کوئی مشکل نہیں۔ کیوں جے حکمران گھڑی جیا مسئلہ سلجھان وچ مصروف نیں ایسے وجہ نال دوجے مسئلیاں اتے توجہ نہیں دے رہے۔جیویں ایہہ مسئلہ سلجھدا اے تسیں حکومت اتے اعتماد رکھو سارے مسئلے پل بھر وچ حل ہو جان گے۔تہانوں اک نامی گرامی چور دی گل وی سنائی جہنوں دنیا بھر وچ چوریاں کرن دا شرف حاصل ہویا لیکن توشہ خانہ توں گھڑی لے کے ویچن جیا جرم اوہ وی نہیں کر سکیا لہٰذا میں تے تہانوں ایہو کہواں گا کہ سارے رل کے آواز چکو تے حکمراناں اتے دبائو پائو کہ گھڑی ویچن دے ذمہ داراں نوں فوری بے نقاب کرن دے نال اوہناں نوں کیفر کردار تک پہنچایا جاوے ۔ ملک دے مسئلے حل کرن توں ودھ گھڑی ویچن دے جرم وچ ملوث لوکاں دا کڑا محاسبہ اے۔ جے پاک سعودیہ تعلقات وچ پیدا ہون والی کشیدگی تے عالمی امن نوں لاحق خطرات ختم کرنے نیں تے گھڑی ویچن والیاں نوں پھڑنا بہت ضروری اے۔