اسٹیبلشمنٹ نےساڈے3ارکاناں نوں نیو ٹرل رہن دا آکھیا اے،عمران خان
لہور( پنجابی میڈیا گروپ)پاکستان تحریک انصاف دے چیئرمین تے سابق وزیر اعظم عمران خان نے آکھیا اے کہ پنجاب وچ ساڈے3 ارکاناں نوں اعتماددے ووٹ وچ نیوٹرل رہن دا آکھیا گیا اے،کراچی وچ ایم کیو ایم نوں متحد تے بی اے پی نوں پیپلز پارٹی وچ شامل کرایا جا رہیا اے۔صحافیاں نال ملاقات دے دوران گل بات کر دیاں عمران خان دا کہنا سی کہ اسمبلیاں وچ جان دا کوئی فائدہ نہیں، استحکام صرف شفاف الیکشن نال ہی ممکن اے، اسٹیبلشمنٹ معیشت سنے سارے بحراناں توں نکلن لئی اہم کردار ادا کر سکدی اے۔چیئرمین تحریک انصاف دا کہنا سی کہ حسین حقانی نوں جنرل باجوہ نے لابنگ لئی امریکہ وچ ہائر کیتا، ڈونلڈ لو نوں پاکستان توں سبق پڑھایا گیا، حسین حقانی میرے خلاف مہم تے جنرل باجوہ دی تشہیر کردے رہے، امریکہ وچ ٹرمپ حکومت نے تریخی استقبال کیتا ۔ عمران خان نے آکھیا کہ جنرل باجوہ نے آخری ملاقات وچ آکھیا تُسی پلے بوائے او، تے میں جواب دتا ہاں میں پلے بوائے ہی رہیا واں، قمر کمر اُتے چھرا مار رہیا سی تے ہمدردی وی کر رہیا سی، ساڈے3اراکان پنجاب اسمبلی نوں اعتماد دے ووٹ لئی اسٹیبلشمنٹ نے نیوٹرل رہن دا آکھیا اے۔اوہناں نے آکھیا کہ اسٹیبلشمنٹ وچ تاحال جنرل ریٹائرڈ باجوہ دا سیٹ اپ کم کر رہیا اے، کراچی وچ ایم کیو ایم نوں اکٹھا تے بی اے پی نوں پیپلز پارٹی وچ شامل کرایا جا رہیا اے، پاکستان وچ اسٹیبلشمنٹ دا نام اک آدمی اے، باجوہ احتساب نہیں کرنا چاہندے سن ایس لئی تعلقات خراب ہوئے۔عمران خان دا کہنا سی کہ اسمبلیاں وچ جا کے کیہ کراں گے، کوئی فائدہ نہیں، بشری بی بی خاتون خانہ اے، اسیں آڈیو لیکس نال اپنی نوجوان نسل نوں کیہ پیغام دے رہے ہاں، ملک وچ شفاف الیکشن ہون تے پائیدار حکومت بنے، شفاف الیکشن نال ملک وچ استحکام آئے گا، اسٹیبلشمنٹ معیشت سنے سب بحراناں توں کڈن وچ اہم کردار ادا کر سکدی اے۔
