اَت گردی ختم کرن لئی شہیداں دیاں قربانیاں رائیگاں نہیں جان گیاں،صدرمملکت

اسلام آباد (پنجابی میڈیا گروپ)صدر مملکت عارف علوی نے مختلف واقعات وچ شہید ہون والے پاک فوج دے جواناں دے ورثاء نال ٹیلی فون اُتے اظہارِ تعزیت کیتا اے۔ جاری اعلامیہ دے مطابق صدر مملکت نے31 دسمبر نوں جانی خیل ، بنوں وچ شہید ہون والے سپاہی محمد وسیم دے والد نال فون اُتے اظہار افسوس کیتا تے شہید دے والد نے گل بات کردیاں ہویاں آکھیا کہ 3پُتر فوج وچ نیں تے قربانی لئی تیار ہاں ۔ صدر مملکت نے وطن لئی شہید دی قربانی تے والد دے جذبہ حب الوطنی نوں سراہیا ۔ صدر مملکت نے 29دسمبر نوں کَرم ایجنسی وچ شہید ہون والے صوبیدار شجاع محمد دے بھائی محمد اشرف نال گل بات کیتی ۔ بھائی محمد اشرف نے آکھیاکہ ماں نوں اپنے شہید بیٹے اُتے فخر اے ، اسیں وی قربان ہون لئی تیار ہاں ۔صدر مملکت نے سپاہی عبدالرحمٰن دے بھائی گوہر یاسین نال ٹیلی فون اُتے رابطہ کیتا۔ بھائی نے صدر مملکت توں مکالمہ کیتا کہ اسیں سب پاکستان اُتے قربان ، 10بھرا وی ہُندے تے شہادت لئی تیار ہُندے ۔صدر مملکت نے نائیک محمد رمضان دے چچا نال ٹیلی فون اُتے گل بات کیتی، شہید لئی اُچے درجے لئی دعا کیتی ۔ صدر مملکت نے آکھیاکہ مادرِ وطن نوں اَت گردی دی لعنت توں پاک کرن لئی شہیداں دیاں قربانیاں رائیگاں نہیں جان گیاں۔ صدر مملکت نے شہیداں نوں خراج عقیدت ، ورثاء نال اظہار ہمدردی تے صبر جمیل دی دعا کیتی۔