باجوہ نے پی ٹی آئی اُتے ظلم کیتا،عمران

لہور( پنجابی میڈیاگروپ)پاکستان تحریک انصاف دے چیئرمین تے سابق وزیر اعظم عمران خان نے آکھیا اے کہ جنرل باجوہ نے پی ٹی آئی اُتے ظلم کیتا، آکھیا کہ تہاڈے لوکاں دیاں ویڈیو، فائلاں نیں۔میڈیا نال گل بات کردیاں ہویاں عمران خان نے ہور آکھیا کہ جنرل باجوہ نال اوہناں دا احتساب نہ کرن اُتے اختلاف ہویا، جنرل باجوہ کرپشن نوں برا ہی نہیں سمجھدے سن ، جنرل باجوہ نوں آکھیا کہ ترقی کرنی اے تے کرپشن اُتے قابو پانا ہوئے گا، 2 کرپٹ خانداناں نے فوج دے علاوہ باقی ادارے تباہ کر دتے نیں، غریب ملکاں وچ ترقی نہ ہون پاروں ہر جگہ زرداری، شریف خاندان ورگے لوگ بیٹھے نیں۔اوہناں نے آکھیا کہ جنرل باجوہ دی سب توں وڈی غلطی کرپٹ لوکاں نوںچھوٹ دینا سی، چین نے پچھلے8ورھیاں وچ ساڑھے400وزیراں نوںپھڑیا، پاکستان وچ کسی کرپٹ نوں پھڑیا نہیں جاندا، شریف خاندان نے تسلیم کیتا لندن وچ4محل اوہناںدے نیں۔عمران خان دا کہنا سی کہ میں جنرل (ر)باجوہ اُتے اعتماد کردا ساں، میں سمجھدا ساں اسٹیبلشمنٹ میری طرح سوچ رہی اے، سمجھ رہا ساں جنا درد کرپشن اُتے مینوں اوہناں ہی اسٹیبلشمنٹ نوں ہوئے گا، جنرل(ر)باجوہ اوہناںنوں برا بھلا کہہ کے ساہنوں انڈی کیشن دیندے سن لیکن جنرل (ر)باجوہ تے حکومت نے مل کے پاکستان تحریک انصاف اُتے ظلم تے میرے نال غداراں، ملک دشمناں والا سلوک کیتا۔