ڈالر باہر گھل کے محل بنان والے منی لانڈرنگ دا درس دے رہے نیں: عمران خان
لہور( پنجابی میڈیا گروپ)چیئرمین پی ٹی آئی تے سابق وزیر اعظم عمران خان نے آکھیا کہ پچھلے7 توں 8 مہینیاں وچ جو کجھ ہویا اوس دی مثال نہیں ملدی، ساڑھے7 لکھ پاکستانی باہر دے ملک جا چکے نیں۔چیئرمین پی ٹی آئی عمران خان نے سیمینار نال ویڈیو لنک ذریعے خطاب کردیاں ہویاں آکھیا کہ سنیا اے کہ اجلاس وچ کہہ رہے نیں کہ ڈالر نوں باہر جان توں روکنا اے، ایون فیلڈ، سرے محل لئی ڈالر گھلن والے منی لانڈر اج دس رہے نیں، منی لانڈرنگ کرن والے درس دے رہے نیں، اوہناں نوں دودھ دی رکھوالی اُتے بٹھا دتا گیا اے۔سابق وزیر اعظم نے ہور آکھیا کہ ایکسپورٹ ودھائے بغیر ایشین ٹائیگر تے لہور نوں پیرس کِنج بنا سکدے نیں؟ایکسپورٹراں دیاں مشکلاں گھٹ کرنا بوہت ضروری نیں،ساڈی حکومت نے 3 ارب ڈالردی کورونا ویکسین منگوائی، میڈیا وچ ساڈے خلاف نکام ہون دا پروپیگنڈا کیتا گیا۔اوہناں نے آکھیا کہ مسلم لیگ (ن)تریخ دا سب توں وڈا خسارہ چھڈ کے گئی، مسلم لیگ (ن)دے دور وچ تیل دیاں قیمتاں وی گھٹ سن ایس دے باوجود وڈا خسارہ چھڈ کے گئے، اوہناں دے دور وچ ایکسپورٹ نہیں وَدھی سی،30ورھیاں توں ایس ملک اُتے2خانداناں نے قبضہ کیتا ہویا سی، دوناں خانداناں نے ثابت کیتا اوہ کِنے کرپٹ نیں، دوناں نے اک دُوجیاں اُتے مقدمے وی بنائے، اینہاں دوناں خانداناں نوں فیر مسلط کرنا وڈا المیہ اے۔چیئرمین پی ٹی آئی نے ہور آکھیا کہ پاکستان وچ مایوسی دی لہر اے، اوہناں دی کرپشن اُتے باہر دے ملک ڈاکیومنٹریاں بنیاں، آئی ایم ایف پروگرام وچ جا کے بڑی ذلت دا سامنا کرنا پیندا اے، آئی ایم ایف توں قرض لاں گے تے اپنے فیصلے خود نہیں کر سکن گے، معیشت سیاست نال جڑی ہوئی اے، جد اسیں اقتدار سنبھالیاتے ملک دیوالیہ دے نیڑے سی، 9 اپریل نوں ساڈی حکومت دے خلاف سازش کیتی گئی۔
