اک شام عتیق انور راجہ دے نام

گوجرانوالہ آرٹس کونسل ہال وچ سفیر کتاب ‘شاعر’ کالم نگار تے پنجابی زبان لئی بھرواں کم کرن والے عتیق انور راجہ دی ورھے گنڈھ دے موقعے اتے تقریب دا پربندھ کیتا گیا ۔جہدے وچ گوجرانوالہ شہر تے گردونواح دے مشہور شعراکرام تے دُوجے شعبیاں نال تعلق رکھن والے معززین نے بھرویں رلت کیتی۔ شدید سردی تے دھند دے باوجود سماج سیوک عتیق انور راجہ دے احترام تے عقیدت وچ بہت وڈی تعداد وچ خواتین تے حضرات نے ایس تقریب وچ رلت کیتی۔ مشاعرے دی نظامت راحت ثمر نے کیتی جد کہ صدارت دی پگ صاحب شام دے سر سجی۔ مشاعرے دا آغاز تلاوت کلام پاک نال کیتا گیا اوہدے مگروں نعت رسولۖ مقبول پیش کیتی گئی۔ فیر خرم بھٹہ نے وارث شاہ دا منظوم کلام سنایا۔ فیر گوجرانوالہ’ سیالکوٹ’ ڈسکہ’ حافظ آباد’ قلعہ دیدار سنگھ’ ایمن آباد’ کامونکی توں آئے ہوئے شاعراں نے اپنا عمدہ کلام سنایا۔ شاعراں نے عتیق انور راجہ دے اعزاز وچ لکھیا ہویا منظوم کلام سنا کے خوب داد سمیٹی۔ ایس دوران حاضرین محفل سٹیج اتے آ کے عتیق انور لئی سوہنیاں گلاں کردے رہے۔
شوکت ڈار’ سیف اللہ ساجد تے مقصود یاور نے عتیق انور راجہ دے سر اتے چٹی پگڑی بنھی جہدے توں اوہناں دے وقار وچ ہور وادھا ہو گیا۔ ایس تقریب وچ سپرنٹنڈنٹ جیل محمد اقبال اختر ایڈیشنل ڈپٹی کمشنر شبیر حسین بٹ سعید تاج ڈاکٹر سعید اقبال سعدی،چوہدری محمد شاہد،چوہدری محمد انور قاضی اعجاز محور عرفانہ امر، نائلہ ریاض بٹ،زینت اشرف،ثروت سہیل ،ادریس ناز، افتخار شاہد رمضان تائب، دلشاد احمد، سیف اللہ بھٹی، فرحانہ عنبر مرزا سلیم، مطلوب حسن، نوشین حسین تے دُوجیاں نے اپنا کلام سنایا جد کہ باقیاں نے عتیق انور راجہ نوں اوہناں دی خدمات دے صلے وچ کجھ انج خراج تحسین پیش کیتا۔
ڈی ایس پی سی ٹی ڈی عمران عباس چدھڑ نے کہیا کہ ایس شہر وچ بہت سارے لوک نیں جہڑے لکھاں کروڑاں بلکہ ارباں کما رہے نیں لیکن اوہ دنیا وچ کوئی تاثر نہیں چھڈدے۔ اوہناں دی مثال ایہہ اے کہ آئو کھائو پیو تے بس۔ لیکن عتیق انور راجہ نے محنت ‘ لگن تے صلاحیتاں دا استعمال کردیاں ہوئیاں ایسا مقام حاصل کر لیتا اے کہ ایہہ جدوں تک زندہ نیں اوہناں نوں عزت و احترام ملدا رہوے گا تے ایس دنیا توں جان مگروں وی اوہناں نوں اوہناں دی ادب دوستی تے دھرتی نال محبت دے حوالے نال یاد کیتا جاندا رہوے گا۔ سر اتے چٹی پگ ایس گل دا واضح اعلان اے کہ پنجابی زبان و ادب تے اصلاح معاشرہ لئی ایہہ سر اتے کفن بنھ چکے نیں۔
ایڈیشنل ڈپٹی کمشنر شبیر بٹ نے کہیا بلاشک و شبہ عتیق انور راجہ گوجرانوالہ دی ادبی وثقافتی تقریباں دے راجہ نیں۔ ایہہ جہنی لگن تے جوش نال کم کر رہے نیں۔ دُوجیاں ساریاں تنظیماں اوہدا نصف وی نہیں کر پا رہیاں ۔ سعید احمد تاج نے کہیا کجھ لوک ہوندے نیں جو صرف اپنے لئی چنگا سوچدے نیں کجھ اپنے اہل و عیال دا بھلا چاہندے نیں تے کجھ معاشرے دے کجھ طبقیاں دی فلاح لئی کوشش کردے نیں لیکن عتیق انور راجہ اوس چوتھے درجے اتے نیں جو ساریاں دی فلاح لئی کم کیتے جا رہیا اے۔ اوہناں دی سب توں وڈی خوبی ایہہ اے کہ ایہہ نویں لوکاں نوں موقع دین توں بالکل نہیں گھبراندے۔
ثروت سہیل پرنسپل نے کہیا راجہ صاحب اینے باہمت پرجوش تے بااعتماد نیں کہ جے اوہناں نوں صرف اک دن پہلاں تقریب رکھن دا کہیا جاوے تے ایہہ نہ صرف ہامی بھر لیندے نیں بلکہ اپنی محنت نال اوس تقریب نوں چار چن لا دیندے نیں۔
نائلہ بٹ ہوراں آکھیا کہ اسیں زنانیاں ادبی تقریباں وچ آن توں کتراندیاں رہیاں۔مینوں چیتا اے راجہ صاحب پہلی واری جدوں میرے گھر آئے اک تقریب دی دعوت دتی۔ اوس دن توں لے کے اج تک مینوں اوہناں دی اکھاں’ گلاں تے انداز توں ہمیشہ عزت و احترام ای ملیا اے۔
ظفر اقبال مغل’ اک ویلا سی اسیں لہور دی ادبی فضاواں وچ زندگی جیا کردے ساں۔ فیر ایہہ سلسلہ رک جیا گیا یا اینا گھٹ ہویا کہ نا ہون دے برابر سی،لیکن ایس تقریب وچ آ کے مینوں انج محسوس ہو رہیا اے کہ شہر وچ فیر توں ادبی ماحول بن گیا اے۔سرپرست سائبان چودھری طاہر جاوید نمبردار نے کہیا عتیق انور راجہ شہر دی ادبی و ثقافتی محفلاں دے راجہ نیں۔ گوجرانوالہ دی راجدھانی اے۔ ایہہ جدوں جہڑے موضوع اتے چاہندے نیں تقریب رکھ لیندے نیں لوک دور تے نزدیک توں دوڑے چلے آندے نیں۔
شوکت ڈار نے کہیا کہ گوجرانوالہ دی ادبی فضا گھٹن دا شکار سی۔ کجھ لوک اجارہ داری بنا کے بیٹھے ہوئے سن کہ عتیق انور راجہ پتہ نہیں کدروں کیہ سوچ کے آئے تے شہر دی ادبی محفلاں دا رنگ ای بدل کے رکھ دتا۔
ایہہ ہمیشہ محبت نال بلاندے نیں عزت دیندے نیں اوہناں دی محفل دا سب توں مثبت پہلو ایہہ اے کہ ہر چھوٹے وڈے نوں سینے نال لاندے نیں۔ کجھ شاعر اں راجہ صاحب لئی اپنا کلام سنایا،اوہناں وچوں کجھ کلام
سیف اللہ بھٹی
اِک سُچا انسان اے راجہ
شہر دا مان تران اے راجہ
ماں بولی دی سیوا کردے
ادب دی جھولی اینج اے بھردے
پُھلاں دی اِک جُو اے راجہ
بخشی ہوئی روح اے راجہ
اَکھر ایہدے پانی بھردے
شعر نیں ایدے ترلے کردے
سجن یار بُھلائی رکھدے
ڈیرہ خوب پخائی رکھدے
اِک نویکلا جی اے راجہ
خورے سَجنوں کیہ اے راجہ
۔۔۔۔
محمد اقبال اختر
پگ دے نال پیار سلامت
راجا ! ساڈا یار سلامت
پُھلاں وانگوں ہسّے ڈِٹھے
اہدی سدا بہار سلامت
۔۔۔۔۔۔
نوشین حسین نوشی
شالا رہے کردار سلامت
توں تیری دستار سلامت
رکھیں مان محبتاں دا توں
دل وچ تیرا پیار سلامت
توں خُشیاں وچ وسیں اَڑیا
رہویں گھر تے باہر سلامت
تینوں ربّ نے چُنیا راجا
تیرا سوچ وچار سلامت
منگدی نِت دعاواں نوشی
وسیں وچ سنسار سلامت
۔۔۔۔۔
ڈاکٹر سعید اقبال سعدی
اک انتھک انسان ہے عتیق انور راجہ
یہ ہے اک دہقان عتیق انور راجہ
منفی سوچوں سے اس کا ذہن ہے صاف
اِک مثبت انسان ہے عتیق انور راجہ
اس کی فطرت پاک اور نیت بھی صاف
اِک اعلی انسان ہے عتیق انور راجہ
شہر میں ہے ایکٹو یہ فردِ واحد
شہر کی ہے پہچان عتیق انور راجہ
سوچوں میں خوشبو باتوں میں جادو
اِک نادر انسان عتیق انور راجہ
فکروں پہ جوبن حرفوں میں درپن
اک خوش فکر انسان عتیق انور راجہ
ہر محفل کی شان ہر محفل کی جان
اپنے شہر کا مان عتیق انور راجہ
کمپیئہر بھی خوب لہجہ بھی دلکش
لفظوں کا سُلطان عتیق انور راجہ
محفل ہوئی کوئی اوج پہ لے جائے
لہجے میں ہے جان عتیق انور راجہ
شاعری ہو اس کی کہ نثر نگاری
ہر اک صنف کی شان عتیق انور راجہ
شہر میں مقبول ہر اک دل کا پھول
ہے مِثل گلدان عتیق انور راجہ
یاروں کے دل کی دھرکن ہے سعدی
یاروں کی جند جان عتیق انور راجہ
سائبان ٹیم جہناں وچ چیف آرگنائزر خرم شہزاد بُھٹہ،شیراز افضل،راجہ افضال عزیز،شیخ انعام چاندی والا،وقاص منیر مغل یاسر مشتاق مغل راجہ مشتاق ہتھاں وچ پھل پھڑے چہریاں اتے ہاسے سجائے پروہنیاں نوں جی آیاں نوں کہن لئی کھڑے سن۔ اخیر وچ کیک کٹیا گیا۔