آکھن لوک سیانے
احسان باجوہ
جُوواں توں اَک کے جُلّا نہیں سُٹ دئیدا/ جوواں توں اک کے لِیڑے نہیں پاڑھ دئی دے
معنے:اَک کے: بیزار ہوکے
ویروا: ایس اکھان وِچ مَت دِتی گئی اے پئی جے کپڑے وِچ جُوواں پَے جان تاں اوس دا علاج اوس نُوں سُٹ دین نہیں سگوں دھو کے صاف کر لَین ایں۔
جھُک جاوے تاں ٹُٹّے کاہنُوں
معنے: جھُک جاوے: لِف جاوے
ویروا:ایس اکھان وِچ دسیاگیا اے پئی ایس جہان اندر جیہڑی شَے وِچ وی لِف جان دا وَل ہووے اوہ کدی ٹُٹدی نہیں اتے اوہ سدا ای بچی رہندی اے۔
جھیڑا راجی دا’ کھاون بھاجی دا’ کُوڑ حاجی دا
معنے:راجی: راضی’ مرضی٭ بھاجی: مٹھیائی٭ کُوڑ: جھُوٹھ۔
ویروا:ایس اکھان وِچ دسیاگیا اے پئی جھگڑا جیہدے نال مرضی کر لیا جاوے اتے کھان وِچ مٹھیائی سبھ چِیزاں توں چنگی لگدی اے اتے جھُوٹھ حاجِیاں توں ودھ کوئی گھٹ ای بولدا اے۔
جہان کِسے چھابے پوُرا نہیں اُتردا
معنے: چھابے: ترکڑی دے پلّے۔
ویروا: ایس اکھان وِچ مَت دِتی گئی اے پئی دُنیا نُوں کدی وی کوئی پُورا نہیں کر سکدا’ ایہ ہر گل دے کوئی وکھرے معنے کڈھ ای لَیندی اے۔
جہاں گنڈھ’ تہاں رس نہیں
معنے:گنڈھ: گنے دی مٹی دا اخِیر
ویروا:ایس اکھان وِچ دسیاگیا اے پئی گنا چُوپدیاں جِتھے گنڈھ آ جاوے گی اوتھے گنے دا رَس کوئی نہیں ہوندا۔
٭٭٭
