قائم نقوی (شاعر)

اردو تے پنجابی دے معروف شاعر قائم نقوی لہور پریس کلب دے تاحیات ممبر تے حلقہ ارباب ذوق دے سنئر رکن سن۔ لہور شہر دی ادبی تقریبات تے مشاعرے ایہناں دے بناں نامکمل سمجھے جاندے سن۔ اوہ دو واری حلقہ ارباب ذوق دے سیکرٹری منتخب ہوئے تے اوہناں دے نال کئی تنقیدی مجالس دی صدارت وی کر دیندے سن۔ وفات دے وقت وی اوہناں نے ریڈیو پاکستان لہور دی محفل مسالمہ وچ شرکت کیتی تے اوتھے اوہناں نوں بڑا ڈاڈھا دل دا دورا پیا جو جان لیوا ثابت ہویا۔ اوہناں دی تریخ وفات 2اگست 2022ء اے۔ ایہناں دی ابدی آرام گاہ ملتان روڈ تے واقع مقامی قبرستان وچ اے مرحوم علم و ادب دا درخشاں ستارہ سن۔ اوہناں دا اک مشہور شعر
ہمارا قتل ہوا دفتروں کی کربل میں
ہم اپنے نقش فقط فائلوں پر چھوڑ گئے
قائم نقوی جدوں حلقہ ارباب ذوق دے سیکرٹری منتخب ہوئے تے اوہناں دے دور وچ حلقہ ارباب ذوق دے بھرپور اجلاس ادبی تریخ دا اک حصہ نیں۔ اوہناں دے مجموعہ وچ ”زادِ ہجر” مطلوبہ 1987ء اردو کلام تے ”بیلے رمزاں دے” پنجابی شامل نیں۔ 1988ء وچ اوہناں نوں مسعود کھدر پوش ایوارڈ مل چکیا اے۔ اوہ غزل’ نظم’ کافی’ گیت نگاری دے نال نال ٹیلی ویژن لئی ڈرامے تے کہانیاں وی لکھدے رہے تے وکھووکھ پروگراماں دی میزبنی وی کردے رہے۔ 1987ء وچ اوہناں نے سال بھر دیاں منتخب غزلاں نوں اکٹھا کر کے چھاپن دا سلسلہ شروع کیتا تے 1997ء تک ہر سال دی نویں غزل دا انتخاب کرکے چھاپدے رہے۔ معروف ادبی جریدے ”ماہ نو” نوں 1987ء وچ جوائن کیتا تے 1997ء تک ایہدی ملجس ادارت نال وابستہ رہے۔ 1997ء وچ ایہناں دا اسلام آباد وزارت اطلاعات و نشریات وچ تبادلہ ہو گیا 2006ء وچ اوہناں نوں ماہ نو دے چیف ایڈیٹر دی ذمہ داریاں دے کے لہور تبدیل کر دتا گیا۔
قائم نقوی اپنے بارے ہور دسدے سن کہ سکول تے کالج دے زمانے وچ جتھے مینوں ہاکی کھیڈن دا بڑا شوق سی اوتھے مینوں شعروشاعری نال وی بڑا لگائو سی۔ اپنے شعر زبانی یاد کر رکھے سن۔ ایف اے وچ میں آپ شعر کہنے شروع کر دتے سن پر ایس گل دا کسے نوں پتہ نہیں سی سوائے اک دو دوستاں دے’ اوس زمانے دی شاعری ہن تے مینوں یاد وی نہیں رہی پر اک شعر یاد اے۔
نہ جانے جوش جنوں میں یوں کیسے جا پہنچا
مجھے تو اس کی گلی کا کوئی پتہ ہی نہ تھا
ایہناں دے والد گرامی مولانا منظورحسین نقوی وی بڑے چنگے شاعر سن۔ حمدونعت’ سلام تے منقبت ای کہندے سن۔ اوہناں دا اک شعری مجموعہ ”گلہائے عقیدت” دے ناں توں چھپ چکیا اے۔ ایہناں دا گھرانہ بڑا مذہبی سی تے ایسے ماحول وچ اوہناں نے اکھ کھولی تے تربیت پائی۔
علی رضا خان دا قائم نقوی دی وفات تے اظہار عقیدت
نیک سیرت شخص رخصت ہو گیا
خوش طبیعت شخص رخصت ہو گیا
عمر بھر جس نے محبت عام کی
خوب صورت شخص رخصت ہو گیا
وہ جو ایام عزا میں چل دیا
سوئے جنت شخص رخصت ہو گیا
اردو’ پنجابی دے معروف شاعر’ کالم نگار’ ڈرامہ نگار قائم نقوی 6 جون 1949ء نوں لہور وچ پیدا ہوئے۔ اوہناں نے ایم اے اردو’ ایم اے پنجابی’ پنجاب یونیورسٹی لہور توں کیتا۔ ایہدے نال نال ہندی وچ وی ڈپلومہ کیتا تے 1987ء تک قائم نقوی اک اہم ادبی رسالے دی مجلس ادارت وچ شامل رہے۔ دو شعری مجموعیاں دا اُتے ذکر ہو چکیا اے۔ تریجے مجموعے دا ناں منطق 2009ء وچ چھپیا۔ مرحوم محبت کرن والے تے دھیمے مزاج دے انسان سن۔ اوہناں نے پنجابی شاعری دے نال نال پنجابی نثر پارے وی ترتیب دتے جہناں وچ ریڈیو تے ٹی وی تے نشر ہون والے ڈرامے نیں اوہناں نوں کتابی شکل دتی اوہ کہندے سن کہ جدوں ملک دے ادیب ای ادب نال ناطہ توڑ لین گے تے ایہدی ترویج کون کرے گا۔ اسیں جدید ادب دی ترقی لئی ٹھوس کردار ادا نہیں کر رہے۔٭