ایوان مچھلی منڈی تے آٹے دا بحران

اک پاسے ملک وچ غریب عوام آٹے لئی ذلیل و خوار ہو رہی اے تے دُوجے پاسے پنجاب اسمبلی وچ اپوزیشن حسب توقع ایوان نوں مچھی منڈی بنان اتے تلی ہوئی سی ۔ اسمبلی وچ وزیراعلیٰ ولوں اعتماد دا ووٹ نہ لین تے اپوزیشن برہم تے سی ای نال نال ایوان وچ ایجنڈے دیاں کاپیاں پھاڑ کے اوہناں دے کاغذاں دے جہاز بنا کے ایوان دی فضا وچ کھیڈدے وی رہے تے پچھلی روایتاں دا سلسلہ برقرار رکھدیاں ہوئیاں سپیکر ڈائس دا وی گھیرائو کیتا۔ پنجاب اسمبلی دا اجلاس حسب عادت تقریباً3گھنٹے دی دیر نال سپیکر سردار سبطین خان دی زیر صدارت جیویں ای شروع ہویا تے اپوزیشن نے جارحانہ حکمت عملی اپناندیاں اجلاس دے شروع وچ ای نعرے بازی شروع کر دتی تے اوہناں نے وزیراعلیٰ دے اعتماد دے ووٹ نوں ایشو بنا کے اعتماد دا ووٹ لو دے نعریاں نال ایوان نوں مچھی منڈی بناد تا۔ جواب وچ حکومتی ارکان نے مہمان گیلری وچ بیٹھے رانا ثنااللہ خان تے عطا اللہ تارڑ دے خلاف نعرے بازی کیتی شور شرابے تے ہنگامہ آرائی کارن سپیکر لئی اجلاس دی کاروائی چلانا اوکھا ہو گیا تے صوبائی وزیر راجہ بشارت نے اپنی تقریروچ ایہہ کہندیاں اپوزیشن نوں خموش کرایا کہ جتھوں تک اعتماد دے ووٹ دا تعلق اے تے سانوں کوئی پریشانی نہیںاجے معاملہ عدالت وچ زیر سماعت اے۔ فی الحال اجے سیاست اتے ای گل کر لوو جدوں اعتماد دا ویلا آیا تے اوہدے وچ وی کامیاب ہوواں گے۔ اسیں تے پہلاں وی جت چکے واں جدکہ تاثر دتا جا رہیا سی کہ تحریک انصاف دے کول اکثریت نہیں جد کہ حکومتی ممبراں نے اپنی اکثریت دے بل تے 21بل وی پاس کیتے تے جہڑے اپنے ممبراں دی کارکردگی ویکھن ایوان آئے سن کیہ منہ لے کے واپس جان گے کیوں جے حمزہ شہباز تے اپنے نال پچھلے وزیراعلیٰ دا لفظ وی نہیں لکھ سکدے۔ وفاق نے پنجاب دے 172 ارب توں ودھ دینے نیں جہڑے نہیں دے رہیا جہدے مگروں اجلاس ملتوی کردتا گیا۔ رہی گل عوام دی جہڑی ایس ویلے دس کلو آٹے لئی اپنی جان توں ہتھ دھون تے مجبور نیں جد کہ حکمران محض مخالفاں اتے ملامت تے بیرونی ملکاں دے دوریاں وچ مصروف نیں۔ آئی ایم ایف دی ہور سخت شرطاں من کے عوام نوں زندہ درگور کرن دی تیاریاں کیتی جا رہیاں نیں۔ زرعی ملک ہون دے باوجود اج ساڈی ماواں بھیناں آٹے لئی قطاراں وچ کھلوتیاں نیں۔ موجودہ حکمراناں نے عوام دا لہو نچوڑن وچ کوئی کسر نہیں چھڈی اے۔ 13 جماعتی اتحاد لوٹ کھسوٹ تے احتساب دے نظام نوں دفن کرن دے مشن اتے تیزی نال عمل پیرا تے عوام مہنگائی’ بیروزگاری ‘ گیس تے بجلی دی لوڈشیڈنگ سنے ہور قرضیاں دی وجہ نال زندہ دفن ہوندے جا رہے نیں۔ تجربہ کار تے بار بار دے آزمائے ہوئیاں کولوں معیشت بہتر ہوئی نہ ڈآلر دے ریٹ گھٹ ہوئے بلکہ خزانہ خالی تے اوہناں دا کشکول مشن جاری اے۔ ایس ویلے ملک دی معاشی صورتحال خراب نہیں بلکہ بدترین خرابی دا شکار ہو رہی اے۔ مستقبل بارے عوام جنا مایوس ہن نیں پہلاں کدی نہیں سن۔ دن بدن عوام دی اذیت وچ وادھا ہو رہیا اے۔ ملک دے معاشی حالات پچھلے کئی سالاں توں خراب نیں مگر ہن صورتحال تشویشناک ہو چکی اے تے ایس نازک ترین حالات وچ وی اہم اقتصادی فیئصلے میرٹ دے بجائے سیاسی بنیاداں اتے کر رہے آں جہدے توں کمزور معیشت برباد ہو کے ٹھپ ہو رہی اے۔ نویں ملازمتاں تے درکنار انڈسٹری بند ہو رہی اے تے مختلف شعبیاں وچ موجودہ ملازماں نوں کڈیا جا رہیا اے۔ زراعت پیداوار تے خدمات دے شعبے تنزلی دا شکار نیں۔ ملکی آبادی غربت دی دلدل وچ دھنس رہی اے۔ تعلیم تے صحت ہن باقاعدہ بوجھ بن چکے نیں جہدے توں مستقبل وچ ترقی دے امکانات ختم وہ رہے نیں۔ چھوٹے بزنس مین صورتحال توں پریشان جد کہ وڈے بزنس مین مایوسی وچ اپنے کاروبار تے سرمایہ باہر منتقل کر رہے نیں جہڑا پاکستان لئی چنگا نہیں ہووے گا۔ ملک چھڈن والے افراد دی تعداد وچ وادھا ہوندا جارہیا اے جہدے توں ملک وچ ہنرمند افرادی قوت دا بحران جنم لووے گا۔ مقامی تے غیر ملکی سرمایہ کاراں دی اکثریت پاکستان وچ سرمایہ کاری نوں سراسر گھاٹے دا سودا سمجھ رہی اے۔ آٹے اتے لڑائی تے مارکٹائی مگروں تے عوام دی اکثریت نوں یقین ہو چکیا اے کہ سیاستداناں دے کول مسئلیاں دا حل اے تے نہ ای اوہناں نوں اوہدی کوئی خواہش اے کیوں جے اوہناں دی ساری توجہ سیاست تے اشرافیہ اتے مرکوز اے۔ اپنے کرپشن دے کیس ختم کروان لئی ترمیماں کر لیتی جد کہ معاشی ابتری دی وجہ نال ملک دا ڈیفالٹ سب توں اہم مسئلہ بنیا ہویا اے تے دوجے پاسے پاکستانی روپے دی قدر وچ کمی تے ملک وچ توانائی دے بحران نے ٹیکسٹائل دی صنعت نوں شدید نقصان پہنچایا ہویا اے ۔ پچھلے چھ مہینیاں دے دوران تقریباً150 یونٹس بند ہو چکے نیں۔ ٹیکسٹائل تے اسپننگ یونٹس دی بندش نال تقریباً 2.5ملین ورکرز بے روزگار ہو کے گھراں وچ فاقہ کشی دا چلہ کٹ رہے نیں تے پاکستان توں دوجے ملکاں نوں ٹیکسٹائل شیواں دی برآمدات بری طرحاں متاثر نیں۔ اسیں آبادی دے لحاظ نال پنجواں وڈا ملک واں تے کرپشن’ لٹ مار’ اقربا پروی تے چور بازاری وچ وی پہلے نمبراں اتے واں تے ساڈی حالت ایہہ اے کہ اسیں اپنے اثاثے ویچ ویچ کے قرضے لین تے مجبور واں۔ روٹی’ کپڑا تے مکان سنے مختلف نعریاں دے دلفریب وعدیاں توں حکمراناں نے واری واری حکومت کیتی مگر عوام دی حالت سدھارن دے بجائے مظلوم تے غریب نوں محرومیاں دا شکار بنادتا۔ حکومت نے اقتدار سنبھالدے ای ملکی معیشت دی بہتری تے مہنگائی دے خاتمے سنے عوام نوں ریلیف دین دے اچے دعوے کیتے سن مگر پی ڈی ایم حکومت نے اپنے دعوویاں دے الٹ معیشت تباہ تے عوام نوں زندہ رہنا مشکل بنا دتا اے۔ آٹے سنے روزدی اشیائے خورونوش دی قیمتاں وچ ہوشربا وادھے تے مہنگائی نے ملکی تریخ دا ریکارڈ توڑ دتا ۔ حکمراناں دے اثاثہ جات تے بینک بیلنس وچ تے وادھا ہو رہیا اے مگر عام بندا دو وقت دی روٹی لئی وی سخت پریشان اے۔ ایہہ سب کجھ کرپٹ قیادت تے جلے سڑے فرسودہ نظام دا نتیجہ اے۔ ساڈے ملک وچ کسی وی سطح اتے ٹیلنٹ دی کوئی کمی نہیں۔ کمی اے تے احساس ذمہ داری دی جہنوں دور کر کے تنظیم ‘ اتحاد’ ایمان دے رہنما اصولاں اتے جے اسیں سچی دل نال قائم ہو گئے تے اوہ دن دور نہیںجدوں پاکستان دنیا دے ترقی یافتہ ملکاں دی صف وچ وی پہلے نمبراں اتے ہووے گا تے ایہہ اوسے ویلے ممکن ہو سکے گا جدوں ساڈے معاشی تے معاشرتی حالات بہتری ول گامزن ہون۔