انصاف توں وَدھ وار کرن اُتے توجہ

انصاف یقینی بنان وچ آزادانہ تے شفاف تحقیقات اہم کردار ادا کردیاں نیں۔ بدقسمتی نال ساڈے ایتھے انصاف توں ودھ جہدے نال نفرت ہووے اوہدے اتے وار کرن تے ملوث کران تے نہ صرف توجہ دتی جاندی اے بلکہ سزا دوان دی وی کوشش کیتی جاندی اے۔ ایس دوران دبائو تے دولت دے بے دریغ استعمال توں وی گریز نہیں کیتا جاندا۔ آزادانہ تے شفاف تحقیقات وچ رکاوٹاں پان دا ای نتیجہ اے کہ جرم وچ ملوث لوک یا تے صاف بچ نکلدے نیں یا فیر اوہناں نوں اپنے کیتے توں بڑی گھٹ سزا ملدی اے ۔ دور کیوں جائیے بے نظیر بھٹو جدوں وزیراعظم سن تے اوہناں دا سگا بھرا کراچی دی اک اہم شاہراہ اتے دن دیہاڑے مار دتا گیا لیکن ذمہ دار اں دا اج تک تعین نہیں ہو سکیا۔ مگروں بھین وی بھرے مجمعے وچ جان توں چلی گئیں لیکن مرضی دے نتائج لین دی خواہش ای دراصل اجے تک ملزماں تک پہنچن وچ رکاوٹ اے۔ بیان بازی کافی ہوئی لیکن انصاف حاصل کرن توں ودھ توجہ سیاسی فیدے بٹورن اتے رہی۔ ستم ظریفی تے ایہہ اے کہ اک مگروں اک نقصان چکن دے باوجود اج وی ملک دی سیاسی قیادت پرانی روش اتے گامزن اے تے اوہدے نزدیک انصاف توں ودھ مخالف اتے وار کرنا اہم اے۔ من پسند نتیجے حاصل کرن لئی اداریاں دی ساکھ نال کھیڈن نوں وی جائز تصور کیتا جان لگیا اے۔
پچھلے سال تن نومبر نوں عمران خان اتے وزیرآباد وچ حملہ ہویا جہدے وچ اوہ زخمی ہوئے تے اک کارکن جان توں گیا مگر ڈی پی او غضنفر گیلانی ولوں کیتے گئے سخت ترین حفاظتی انتظامات پاروں حملہ آور دے علاوہ کجھ مشتبہ افراد نوں موقع توں حراست وچ لیتا گیا بلکہ انج دے انتظامات کیتے گئے جہدے توں ہور خرابی نہ ہوئی کنٹینر اتے سوار دھرنا دین تے بضد بپھرے رہنماواں نال گل بات کرنا تے موقع توں جان تے راضی کرن جئے مرحلیاں ای آسان نہ سن بلکہ ہزاراں مشتعل کارکناں نوں جلائو گھیرائو تے توڑ پھوڑ کرن توں باز رہن اتے وی رضامند کیتا کیوں جے ماضی وچ کسے واقعہ مگروں کارکناں دا سخت ردعمل تے املاک دا بے دریغ نقصان ویکھن وچ آندا رہیا۔
وزیرآباد حملے مگروں ہور ناخوشگوار واقعات نوں روکنا پلس سربراہ دی پیشہ وارانہ مہارت تے بہتر حکمت عملی پاروں ممکن ہویا مگر آزادانہ تے شفاف تحقیقات توں روکن تے پی ٹی آئی قیادت دی ایما تے جہناں نال اوہنوں شدید نفرت اے دے خلاف اندراج مقدمہ تے گناہگار قرار دین توں انکار ہن پلس دی بدنامی داموجب بندا جا رہیا اے حالانکہ ڈی پی او دے ماتحت اکثر کہندے سنائی دیندے نیں کہ علی محسن کاظمی مگروں ایہہ اینا چنگا افسر آیا اے جہڑا انصاف لئی حر حد تک چلیا جاندا اے۔گھنٹیاں تفتیش توں وی نہیں اکتاندا اوسے طرحاں ایس پی انویسٹی گیشن مزمل حسین وی سو فیصد ایماندار تے میرٹ پسند شخص اے فیر وی پی ٹی آئی قیادت جے مطمئن نہیں تے ایس رویے اتے حیرت دا اظہار کرن دے سوا کجھ نہیں کہہ سکدے۔
پی ٹی آئی دے لوک اکثر پچھدے نیں کہ پلس نے جہڑے بندے نوں گرفتار کیتا اوہدی تھانے وچ سوال و جواب دی ویڈیو کیوں بنائی تے ایہہ سارا عمل اینا مہذب کیوں رہیا۔ نیز ویڈیو اینی چھیتی صحافیاں دے ہتھ کیویں لگی؟انج دے سوالات پختہ ذہن دے نہیں۔ کوئی معمولی جیا وی جرم سرزد ہووے تے گرفتار ہون والیاں توں فوری طور تے ابتدائی پجھ تاجھ کر لیتی جاندی اے۔ ایہہ دنیا بھر وچ ہر جگہ پلس دی اک عام روٹین اے مگر عمران خان نہ صرف ملک دے وزیراعظم رہ چکے بلکہ ہن وی مقبول ترین جماعت دے سربراہ نیں ایس لئی پلس نے سرعت دا مظاہرہ کیتا تاں جے اصل سچ جان سکے ابتدائی بیان دی ریکارڈنگ دا مقصد حکام بالا نوں تازہ ترین معلومات توں باخبر رکھنا سی کیوں جے اخبار یا چینل دا کوئی نمائندہ کجھ پچھے تے وڈے صاحب دے کول کجھ دسن نوں ہووے ایتھوں ای کدھرے ویڈیو وغیر محفوظ ہتھاں وچ گئی (وڈے صاحب بارے پتہ چلیا اے کہ لمی چھٹی تے چلے گئے نیں’ اک غیر مصدقہ ایہہ اطلاع وی اے کہ بیرون ملک جا چکے نیں تے دوبارہ گجرات آن تے آمادہ نہیں دُوجا ایہہ کہ ا کثر ملزم پلس دی حراست وچ دتے اپنے بیان توں عدالتاں وچ جا کے منحرف ہو جاندے نیںتے موقف اختیار کردے نیںکہ پلس نے تشدد نال بیان لیتا اے۔ عدالتاں وی پلس حراست وچ دتے بیان توں ودھ عدالت وچ دتے بیان نوں اہمیت دیندیاں نیں۔ ہن جے زیر حراست ملزم نوں زمین اتے سٹ کے مار پٹ کردیاں ہوئیاں بیان لیتا جاندا اے تے ایہہ ویڈیو کسے صحافی دے ذریعے سامنے آندی تے ذرا دل اتے ہتھ رکھ کے دسو پلس دے بارے کیسا تاثر بندا تے اوہنوں کیویں ردعمل دا سامنا ہوندا نیز عدالت وچ بیان دی کیہ حیثیت رہ جاندی؟ گجرات پلس نے تے ابتدائی پچھ تاچھ مگروں ایہہ ملزم وی سی ٹی ڈی دے حوالے کر دتا سی فیر وی ناقابل فہم الزام تراشی جاری اے۔ ایہہ گل تحریک انصاف دی قیادت نوں کہڑا سمجھاوے اوتھے تے عقل تے دلیل توں ودھ دھونس دی پالیسی رائج اے خیر جتھے فواد چودھری جیئے لوک مقبرین ہون اوتھے عقل تے دلیل دا کیہ کم؟ موصوف دا سارا خاندان اوہنوں تے اوہدی جماعت نوں کدوں دا چھڈ کے وکھ ہو چکیا اوہنوں وی گھاٹ گھاٹ داپانی پین دا تجربہ اے جہڑا اپنی نشست جتن دے چکر وچ اجے تک جماعت نال چپکیا بیٹھیا اے۔ جیویں مناسب دعوت ملی ایہہ وی وکھ ہون وچ اک لمحے دی دیر نہیں کرے گا۔
تحریک انصاف دا شکوہ اے کہ عدم اعتماد دی تحریک نکام بنان وچ عسکری قیادت نے اپنے رعب تے دبدبے دا استعمال نہیں کیتا جے کیتا ہوندا تے درجن بھر مختلف الخیال جماعتاں ہرگز اکٹھیاں نہ ہوندیاں تے نہ ای حکومت دی اتحادی جماعتاں وکھریاں ہوندیاں مگر ایسا شکوہ کردیاں ایہہ کیوں بھلاد تا جاندا اے کہ ممبران پارلیمنٹ نوں وزیراعظم وقت ای نہیں دیندے سن تے بوہتا وقت پاکستان توں ودھ خود نوں اک عالمی رہنما دے طور تے منوان دی کوشش وچ رہے ۔ ایہہ بے نیازی تے بے رخی بددلی پھیلاندی گئی تے اتحادی ممبران پارلیمنٹ نے حکومت توں وکھ ہون دا فیصلہ کر لیتا۔ حالات بوہتے خراب ہوندے ویکھ کے راجہ ریاض جئے ابن الوقت تے مفاد پرست وی حکومتی کشتی توں چھال مار گئے۔ ایس واضح نکتے دی عمران خان یا اوہناں دے ہمرکاب رفیقاں نوں سمجھ نہیں آ رہی تے اوہناں دی آجا کے تان اوسے نکتے اتے ٹُٹدی اے کہ عدم اعتماد دی تحریک نکام بنان وچ ساتھ نہ دین دی سزا دے طور تے اہم عسکری حکام دے خلاف حملے دا اندراج مقدمہ ہووے تے گرفتاری عمل وچ لیائی جاوے۔ انج دے مطالبیاں نال پی ٹی آئی قیادت دی ذہنی سطح بارے چنگا تاثر نہیں بن رہیا۔
عسکری قیادت دے خلاف سوچے سمجھے منصوبے دے تحت ایس ویلے کئی لابیاں متحرک نیں۔ ایہہ لابیاں وار کرن لئی موقع دی تاک وچ رہندیاں نیں۔ ایہناں لابیاں نے فاٹا تے بلوچستان وچ کئی ازہان گمراہ کر لیتے نیں جہناں دے
دن رات پاک فوج اتے الزام تراشی وچ لنگھدے نیں۔ پاک فوج نوں بدنام کرن دی مہم دے تحت بھارت نے عالمی اخباراں وچ بدمعاش فوج دا عنوان دے کے اشتہار شائع کرائے تے ممبئی حملیاں دے پس منظر وچ نواز شریف دے بیان نوں کلبھوشن کیس دی سماعت دے دوران عالمی عدالت انصاف وچ بطور ثبوت پیش کیتا۔ آصف زرداری اٹ نال اٹ وجان دی احمقانہ گل کر چکے نیں۔پاک وطن وچ رہ کے اغیار دے اسارہ ابرو اتے پاک فوج دے خلاف نعرے لان دا سلسلہ تواتر نال جاری اے۔ ہن پی ٹی آئی وی ایسے روش اتے گامزن اے۔ شاید اوہنوں کسے نے سمجھایا اے کہ عوام دی تائید توں بوہتی عسکری قیادت نوں بلیک میل کرنا تے اقتدار وچ آنا بوہتا آسان اے۔عدالتاں وی پلس حراست وچ دتے بیان توں ودھ عدالت وچ دتے بیان نوں اہمیت دیندیاں نیں۔ ہن جے زیر حراست ملزم نوں زمین اتے سٹ کے مار پٹ کردیاں ہوئیاں بیان لیتا جاندا اے تے ایہہ ویڈیو کسے صحافی دے ذریعے سامنے آندی تے ذرا دل اتے ہتھ رکھ کے دسو پلس دے بارے کیسا تاثر بندا تے اوہنوں کیویں ردعمل دا سامنا ہوندا نیز عدالت وچ بیان دی کیہ حیثیت رہ جاندی؟ گجرات پلس نے تے ابتدائی پچھ تاچھ مگروں ایہہ ملزم وی سی ٹی ڈی دے حوالے کر دتا سی فیر وی ناقابل فہم الزام تراشی جاری اے۔ ممکن اے وزیرآباد واقعہ غنیمت جان کے ایسے لئی دبائو ودھایا جا رہیا ہووے جے انج اے تے ایہہ ہر گز صحت مندانہ سوچ نہیں ۔ جے سیاستدان ملک دے محافظ ادارے دی ساکھ نوں نقصان پہنچان تے عوام دی نظراں وچ ڈِگن دی سازشاں دا حصہ بنن توں پہلاں صدام حسین یا کرنل قذافی دا انجام تے اوہناں دے ملکاں دے موجودہ حالات ذہن وچ رکھن تے کدی پاک وطن دے اداریاں اتے دشنام طرازی نہ کرن۔ پہلے ای آپس دی ناچاقیاں توں ملک دولخت کرن مگروں معیشت دا بھٹہ بٹھا چکے ۔خدارا ملک دے محافظ ادارے نوں تے بخش دیو تے اوہنوں اپنی نفرتاں دی بھینٹ نہ چڑھائو۔ جے کجھ کرنا اے تے سارے رل کے معیشت دی بحالی دے کم وچ حصہ پائو جہدے لئی انصاف توں ودھ وار کرن دی پالیسی نوں چھڈنا ہووے گا۔