ساری اپوزیشن عوامی مفاد دے منصوبیاں وچ سرکار دا ساتھ دیوے: چودھری پرویز الٰہی

لہور: قائم مقا م گورنر پنجاب چودھری پرویز الٰہی آکھیا اے ساری اپوزیشن عوامی مفاد دے منصوبیاں وچ سرکار دا ساتھ دیوے۔ حکومتی اقدامات دے نتیجے وچ اشیائے ضروریہ دی قیمتاں وچ کمی آنا شروع ہو گئی اے۔ تفصیل دے مطابق قائم مقام گورنر چودھری پرویز الٰہی نال وزیر قنون راجہ بشارت نے گورنر ہاؤس وچ ملاقات کیتی۔

ملاقات وچ پنجاب اسمبلی وچ قنون سازی تے تبادلہ خیال کیتا گیا۔ پنجاب اسمبلی دے 9مارچ نوں تجویز کیتے اجلاس وچ قنون سازی تے دوجے ایجنڈے تے دوواں رہنماواں نے مشاورت کیتی۔ ایس موقع تے گل کردیاں چودھری پرویز الٰہی دا کہنا سی حکومتی اقدامات دے نتیجے وچ اشیائے ضروریہ دی قیمتاں وچ کمی آنا شروع ہو گئی اے۔ وفاق تے پنجاب دی اتحادی حکومت عوام نوں ریلیف دین لئی ہر ممکن اقدامات کرے گی۔

چودھری پرویز الٰہی آکھیا بھارت تے کشمیر وچ مسلماناں دی نسل کشی تے مظالم قابل مذمت تے شرمناک نیں۔ ایراں تے دنیا دے دوجے ملکاں دا بھارتی حکومت دے اقدامات دے خلاف ردعمل اہم اے۔ عالمی برادری مودی سرکار نوں بھارت تے کشمیر وچ رہن والے مسلماناں دے خلاف مظالم توں روکے۔ نریندر مودی گجرات دے بعد دہلی وچ ظلم دی نویں تریخ رقم کر رہیا اے۔