وِجدان ولوں مَنے پرمَنے صحافی، تجزیہ نگار تے دانشوررضا رومی دے اعزاز وچ تقریب تے ظہرانہ

ادبی تے ثقافتی تنظیم وجدان ولوں منے پرمنے صحافی’ تجزیہ نگار تے دانشور جناب رضا رومی دے اعزاز وچ اک تقریب تے ظہرانہ دا پربندھ کیتا گیا۔ ایس خوبصورت نشست وچ ملک دی منی پرمنی شخصیات’ صحافی تے شاعراں نے رلت کیتی۔ جہناں وچ عثمان پیرزادہ، شاہد ندیم، سلمان غنی، منصور آفاق، نذیر قیصر، فرحت عباس شاہ، وجاہت مسعود، اجمل جامی، پروفیسر نعیم مسعود، حامد رانا (سونا چاندی فیم)، برگیڈیر زکریا، سلمان عابد، عاطف رانا (لاہور قلندر)، ذوالفقار راحت، عامر بن علی، ڈاکٹر عمر عادل، سینئر پروڈیوسر پی ٹی وی محسن جعفر، صفدر سحر، فرخ سہیل گوئندی، گُلِ نوخیز اختر، آصف عفان، ڈاکٹر صغرا صدف، افضل ساحر، بلقیس ریاض، ڈاکٹر کنول امین (وی سی)، ڈاکٹر فوزیہ تبسم، صوفیہ بیدار، فاطمہ احمد، انجم قریشی، صبیحہ شاہین، عابدہ قیصر، نازیہ جبین، وقاص ریاض، راغب مجید، محمد عاصم چودھری، ایاز احمد، عمران شوکت علی، فہد اختر، نبیل نجم تے دُوجے شامل سن۔
ظہرانے توں پہلاں ساریاں نے پروہنے صحافی رضا رومی بارے اظہار خیال کردیاں کہیا کہ دیار غیر وچ رہندے ہوئے اوہناں نے صحافت لئی اعلیٰ خدمات سرانجام دتیاں نیں۔ رضا رومی نے نویں دور دے میڈیا دے حوالے نال دسیا کہ اوہ ایس پلیٹ فارم توں لوکاں وچ آگاہی تے انسانی حقوق لئی کم کرن دی سعی کر رہے نیں۔ اوہناں نے کہیا کہ اک چنگے معاشرے لئی دانشوراں نوں مثبت کردار ادا کرن دی لوڑ اے۔ سماج وچ آرٹ تے کلچر دی لوڑ تے پنجابی زبان دی اہمیت تے بھرواں لیکچر دتا جہنوں حاضرین نے بہت پسند کیتا۔ تقریب وچ شبانہ عباس نے صوفیانہ کلام پیش کر کے سماں بنھ دتا۔ ڈاکٹر صغرا صدف نے رضا رومی نوں گلدستہ پیش کیتا تے سارے معزز پروہنیاں دی رلت دا شکریہ اداکیتا۔