انہونی ہو گئی

حمید اللہ بھٹی

سیاست وچ دوستیاں تے مخالفتاں مستقل نہیں ہوندیاں بلکہ حالات وواقعات دے تناظر وچ تبدیل ہوندیاں رہندیاں نیں کیوں جے سیاستدان عام طور تے اک دوجے نال گل بات لئی بوہے بند نہیں کردے مگر پچھلے کجھ ہفتیاں توں پنجاب وچ جو کجھ ہویا اے ایہہ ماضی دی روایتاں توں قدرے وکھرا اے۔ حکمران تے اپوزیشن اک دوجے نال گل تک کرن دے روادار نہیں۔ پنجاب وچ پی ٹی آئی تے ق لیگ دی اکثریت عیاں حقیقت اے جہنوں کسے صورت جھٹلانا ممکن نہیں مگر بدھ تے جمعرات دی وچلی شب اعتماد دا ووٹ اینی آسانی نال لے لیاجاوے گا پی ڈی ایم رہنماواںکیہ کسے دے وہم وگمان وچ وی نہیں سی مگر ہن ایہہ انہونی ہو گئی اے۔ یقین نہ آن دی اک وجہ تے ایہہ اے کہ رانا ثنا اللہ تے عطا تارڑ نے ساریاں نوں یقین دوا رکھیا سی کہ پنجاب وچ حکومت تبدیل کرن دے منصوبے اتے ہر پہلو نال کم پورا کر لیتا اے۔ انج نہ کرسکن دی صورت وچ نام تک بدل دین دا کہہ دتا سی۔ ایس دعوے دی پی ٹی آئی ولوں اک قسم دی ایہہ کہہ کے تائید کیتی جا رہی سی کہ ممبران اسمبلی نوں دبائو تے مراعات دے عوض وفاداریاں تبدیل کرن تے مجبور کیتا جا رہیا اے۔مگر عین موقع تے جہڑی انہونی ہو گئی اوہدے نتائج نال سیاستدان ہنوز ورطہ حیرت وچ نیں کیوں جے دوست مزاری وغیرہ تے پہلاں ای ناراض تے عملی طور تے جماعت توں وکھرے سن۔ خرم لغاری’ چودھری مسعود تے مومنہ وحید نے وی اعتماد دا ووٹ دین توں انکار کردتا لیکن سرگودھا توں واحد ممبراسمبلی فیصل فاروق چیمہ نیں جہناں نے پی ٹی آئی دی توقع دے مطابق اعتماد دا ووٹ نہیں دتا تے غیر حاضر رہے۔ جے پی ٹی آئی اک ووٹر غیر حاضر رہن تے حیران اے تے بلال وڑائچ جہناں نے حمزہ شہباز نوں وزیراعلیٰ لئی ووٹ دتا سی پی ٹی آئی نال آ ملن تے خوش وی اے کیوں جے ایہہ ایسا فیصلہ کن ووٹ اے جہدے توں 186 دی گنتی آسانی نال پوری ہو گئی۔
ہور حیران کن پہلو ایہہ اے کہ رات نوں وزیراعلیٰ نے اعتماددا ووٹ لیتا تے دُوجے دن عمران خان نال رل کے پنجاب اسمبلی توڑن دی تجویز گورنر پنجاب نوں بھجوا دتی حالانکہ پرامید ن لیگی حلقے ساریاں نوں یقین دوا رہے سن کہ چودھری پرویزالٰہی کسے صورت اسمبلی نہیں توڑن گے لیکن ساری دی ساری کرائی گئی یقین دہانیاں دھری رہ گئیاں تے انہونی ہوگئی۔ پنجاب دی جھٹکے کھاندی تے ہر پل بدلدی سیاست اتے طائرانہ نظر پاندے ای واضح ہو جاندا اے کہ ن لیگ نوں پنجاب وچ نس بھج نال کوئی کامیابی نہیں ملی بلکہ ایہہ کہنا بوہتا درست اے کہ اچے اچے دعویاں تے بھڑکاں مگروں ہن شرمندگی تے مایوسی دا سامنا کرن تے مجبور اے۔
تحریک عدم اعتماد پیش کرن دے مگروں گورنر کولوں وزیراعلیٰ نوں اعتماد دا ووٹ لین دا کہلوان نال ای سیاسی نبض شناس سمجھ گئے سن کہ ن لیگ اسمبلی وچ اکثریت توں محروم اے فیر وی دائو اتے دائو لائے جاندے رہے۔ گورنر ولوں وزیراعلیٰ نوں نوٹس دے اک دن مگروں اعتماد دا ووٹ لین دا حکم دینا تے فیر انج نہ کرن دی پاداش وچ کابینہ سنے برخواست کر دینا ایسا دائو اے جہدا کوئی آئینی یا قنونی جواز نہیں سی ایسے لئی عدالت عالیہ نے پہلی پیشی اتے ای اک مہمل جئی یقین دہانی اتے گورنر دا غیر آئینی تے غیر قنونی حکم معطل کردتا۔ فیر اعتماد دا ووٹ لین دے اگلے دن ای وزیراعلیٰ ولوں اسمبلی توڑن دی تجویز پیش کر دینا ثابت کردا اے پنجاب دا حکمران اتحاد تے سوچے سمجھے منصوبے اتے عمل پیرا رہیا مگر ن لیگ دی چالاں توں کجھ واضح نہیں بلکہ کئی سقم نظر آئے۔ ایسے بنا تے پی ٹی آئی نے چالاں چلدیاں حریفاں نوں چاروں شانے چت کردتا۔ ایتھوں تک ہک بارہ توں پندرہ ممبران توڑن دے دعویدار تے بہاولپور توں دونویں پی ٹی آئی ممبراں نوں وی نہ توڑ سکے حالانکہ اوہناں دے ایم این اے طارق بشیر چیمہ ایس ویلے وفاقی وزیر نیں تے دونواں نال قریبی تعلقات نیں مگر باوجود قریبی تعلقات دے دونویں ممبراں دا جماعت نال ثابت قدم رہنا ثابت کردا اے کہ عمران خان دی مقبولیت دے پیش نظر ہن کوئی وی اوہناں دی جماعت دا ٹکٹ گوانا نہیں چاہنداچاہے ایم این ا ے نال قریبی تعلقات ای کیوں نہ قربان کرن دی نوبت آ جاوے۔
پنجاب وچ تبدیلی دے دعویداراں نے دعوے تے بڑے کیتے لیکن اہداف حاصل کرن کہڑی سمت اختیار کرنی اے؟ اک تے ایہہ طے کرن وچ نکام رہے دوجا ایہہ کہ جہڑے ممبر اسمبلی نے وزیراعلیٰ منتخب ہونا اے اوہ صوبائی اسمبلی وچ قائد حزب اختلاف ہون دے باوجود ملک انتہائی اہم موقع اتے وی نہیں آ سکے بلکہ بیرون ملک ای مقیم رہے جہدے بارے ن لیگ ایہہ تاویل پیش کردی اے کہ حمزہ شہباز اپنی والدہ دے علاج دی غرض نال ملکوں باہر رہن تے مجبور نیں حالانکہ جے غیر سیاسی سلیمان شہباز وطن واپس آ کے سیاسی سرگرمیاں شروع کر سکدے نیں تے حمزہ شہباز بھلا انج کیوں نہیں کر سکے۔ سمجھ توں بالاتر اے۔ ایسے طرحاں والد تے چچا مگروں جماعت دی سینئر نائب صدر تے چیف آرگنائزر دے عہدے اتے حال ای وچ فائز ہون والی مریم نواز وی گلے دے اک معمولی جئے آپریشن دی وجہ نال جنیوا وچ مقیم رہیاں۔ جدوں رہنما ای قیادت کرن لئی ملک وچ نہ ہون بلکہ دیار غیر قیام ودھا دین تے نتیجہ سمجھنا کوئی اوکھا نہیں رہندا۔ ایہو کجھ پنجاب وچ ہویا اے۔ ہن ن لیگ والے لکھ بہتان لگان کہ ناراض ارکان نے وزیراعلیٰ نوں اسمبلی نہ توڑن دا حلف لے کے ووٹ دتے نیں فضول بہانے دے سوا کجھ نہیں۔ ایسے لئی ایسیاں گلاں دی کوئی اہمیت یا حیثیت نہیں بلکہ پی ٹی آئی نے پھیلائی ایسی ساری افواہاں نوں غلط ثابت کردتا اے کہ ا وہدے ممبران جماعت نال بظن تے ن لیگ وچ جان نوں بے قرار نیں۔
رانا ثنا تے عطار تارڑ دی مایوسی تے بے دلی نال کیتی جان والی نس پج تے کوششاں توں فیدہ دے بجائے الٹا نقصان’ بلال وڑائچ نوں وی اپنا وزن پی ٹی آئی دے پلڑے وچ پان دی راہ مایوسی تے بے دلی نال کیتی جان والی نس پج توں ہمت ہوئی ایہہ جواز پیش کرنا کہا وہناں دے بھراں خالد وڑائچ ن لیگ دے ایم این اے نیں تے اوہ بھراں نال ناراضگی دی وجہ نال مخالف جماعت ول ٹر گئے نیں درست نہیں کیوں جے ماضی وچ اوہ اپنے بھراں دے آکھن تے جدوں اپنا ووٹ حمزہ شہباز نوں دے چکے تے ہن وی ایسا ہونا بوہتا ناممکن نہیں سی مگر امیدوار دی عدم موجودگی توں مخالف روش ول چلے گئے۔ مایوسی تے بے دلی نال کم کرن دا نتیجہ اے کہ نہ صرف پی ٹی آئی نوں اک واری فیر نہ صرف مقبول ترین جماعت ہون دا دعویٰ کرن دا حوصلہ ہویا اے بلکہ ہور ایہہ کہ ایہہ جماعت سیاسی چالاں چلن وچ وی تاک نظر آئی ہن تے پنجاب اسمبلی توڑن دی تجویز وی گورنر نوں بھجوائی جا چکی جہنوں گورنر دفتر نے وصول وی کر لیتا اے جے کسی نوں ایہہ توقع اے کہ گورنر تجویز اتے عملدرآمد نہیں کرن گے ایسی توقع رکھنا دانشمندی نہیں کیوں جے 48 گھنٹے لنگھن مگروں وی جے گورنر موصول سمری بارے کوئی فیصلہ نہیں کردے تے اسمبلی خودبخود ٹٹ جاوے گی کیوں جے ایسی کسی تجویز نوں بوہتی دیر التوا وچ رکھنا ممکن ای نہیں بلکہ ایس حوالے نال گورنر دے کول نہ ہون دے برابر اختیارت نیں۔ ممکن اے ایہناں سطور دی اشاعت تک عبوری بندوبست لئی چودھری پرویزالٰہی تے حمزہ شہباز وچ سلسلہ جنبانی وی شروع ہو چکیا ہووے انہونی تے ہوگئی ہن اسمبلی توڑن توں روکن وچ کوئی تدبیر کارگر نہیں ہو سکدی۔