بے شک گوگل کر کے ویکھ لوو

حنا پرویز بٹ

جیویں ای تخت حکمرانی تے سواری دا گرین سگنل ملیا تے اوہنے اپنی زنبیل چوں نویں نویلے قوائد دی منہ وکھائی کر دتی۔ پہلا کم ایہ کیتا کہ گن گن کے ایمانداراں نوں بے وقوف’ تمیزداراں نو ںبدتمیز’ کردار والیاں نوں وڈی رکاوٹ ‘اخلاق والیاں نوں وڈا کانٹا’ رواداراں نوں بزدل تے حلال کمان والیاں نوں فقرے قرار دے کے پارٹی چوں باہر کڈھ دتا گیا۔ دوجا کم ایہ کیتا کہ چن چن کے اجیہا ٹولا نیڑے رکھیا جو بدکرداری نوں’ فیشن نوں’ حرام کاری نوں’ معمولات اشرافیہ نوں’ دھوکہ دہی نوں’ فنکاری نوں’ بدمعاشی نوں’ بے انصافی نوں زور بازو تے شرم و حیا نوں قصہ پارینہ سمجھدا سی۔ حکومت وچ آ کے ایہ لوک ملک نوں جمخانہ سمجھ کے مشہور گیت دم مارو دم مٹ جائے غم دا نعرہ لا کے دن رات انسانیت نوں قصہ ماضی’ مادرپدر آزادی نوں پیدائشی حق’ اختیارات دے نجائز استعمال نوں حق سمجھدے نیں۔ مجرماں دی کھلم کھلا سرپرستی نوں لازم’ ٹھیکیاں دی سیاست تے یقین’ رشوت نوں پارٹی فنڈ سمجھن تے فروغ دین دی تبلیغ کردے نیں۔ ایس دیسی نیوٹن نے لٹ مار دے اوہ سائنسی ضابطے ترتیب دتے کہ پورے پاکستان دا معاشی چہرہ مکمل طور تے تباہ و برباد ہو گیا۔ ہن ایہ سمجھ نہیں آ رہیا کہ ایہدی پلاسٹک سرجری کیویں کیتی جاوے؟ تریجی دنیا وچ میگا پراجیکٹ شروع کر کے کمان والے امریکہ’ جرمنی’ جاپان تے چینی ماہرین معیشت ششدر نیں کہ کس طرح اک کھڈاری نے کسے وی میگاپراجیکٹ تے اک وی پیسہ خرچ کیتے بناں پورے ملک نوں قرضیاں دی دلدل وچ پھسا دتا تے ایہ وی پتہ نہیں چل رہیا کہ پیسہ کدھر گیا؟۔
تخت تک اپڑن توں پہلاں اوہ بڑھکاں ماریاں گئیاں کہ مینوں سب پتہ اے کہ ملک نوں کیویں اُتے اٹھانا اے فیر ساریاں نے ویکھیا کیویں اوہنے مکمل کامیابی نال 35 روپیے کلو ملن والا آٹا چک کے 145 روپیے کلو تک اپڑا کے غریب لوکاں نو ںدن دیہاڑے فاقیاں تک اپڑا دتا۔ اخلاقیات تے انسانیت دا دیوالیہ کرن والا تخت توں بے دخلی دے بعد کہہ رہیا اے کہ مینوں تے پتہ ای نہیں لگا کہ باجوہ ایسا سی’ باجوہ ویسا سی’ اوہ اپنے آپ نوں آل رائونڈر کہندا رہیا تے لوک کرکٹ دا آل رائونڈر سمجھدے رہے پر افسوس کہ ایہ معاملہ ساریاں سرحداں نوں پار کر گیا۔
اسیں اپنی اکھاں نال ویکھ لیا کہ کیویں اوہنے میں’ میں دی گردان کر کے ایس لفظ دی حرمت تک نوں تار تار کر دتا۔ خدائی اوتار دا بھیس وٹا کے اوہ پاک سرزمین دی معاشی تباہی کردا رہیا تے دیوالیہ پن دی سرحد تے اپڑا کے اتھرو وگانا شروع ہو گیا کہ سارے فیصلے تے باجوہ کردا سی۔ ساڈی بدقسمتی کہ جان بجھدے ملک دی باگ ڈور اک اجہے نااہل بندے دے حوالے کر دتی جنہے اوہنوں ٹائی ٹینک سمجھ کے ڈوب دتا۔
قرآنی تعلیمات دے مطابق جو تکبر اپناندا اے فطرت اوہدا غرور توڑن لئی خودکار طریقے نال حرکت وچ آندی اے سارے صحیفاں تے الہامی کتاباں توں ثابت اے کہ تکبر کرن والا ہمیشہ رسوا ای ہوندا اے۔ ماہر منشیات و نفسیات دا کہنا اے کہ خفیہ راز اگلوان تے اعتراف جرم کروان لئی مجرماں تے نشیلی دوائیاں دا استعمال کیتا جاندا اے۔ منشیات دے عادی بیک وقت تکبر دا ایفل ٹاور’ رعونت دا برج خلیفہ’ گھمنڈ دا مائونٹ ایوریسٹ’ شیخیاں دا مینار پاکستان بن کے وی شرمندگی دی کھائی وچ جا ڈگدے نیں یعنی نشے دا آغاز وی رسوائی تے انجام وی رسوائی اے۔ ساڈا مجسمہ غرور و علت وی اج خدائی فرمان دے عین مطابق رسوائیاں دا بھار چکی پھردا اے تاں ای تے عالم سرور وچ اعلانیہ نکامیاں دا اعتراف کر رہیا اے۔ سجری شرلی ایہ چھڈی اے کہ مینوں پھڑیا گیا تے عوام بالکل انج ای باہر نکل آن گے جیویں اردوان لئی نکلے سن۔ کوئی ہے جو اوہنوں دسے کہ اردوان نے ملک نوں تباہ نہیں سی کیتا۔ اوہنے لوکاں توں روزگار’ آٹا’ چینی تے جین دا حق نہیں سی کھوہیا’ زبان زدعام اے کہ اوہدے پنجاب توں نس کے پشاور جان دے دن نیڑے آ گئے نیں۔ سوشل میڈیا تے دلچسپ میمیز دا سونامی آیا ہویا اے اک میم تے بہت ای دلچسپ اے کہ جہدے کہن تے ڈی پی او گواہی دین نہیں آیا اوہ کہہ رہیا اے جدوں مینوں پھڑیا جاوے تے انج باہر نکلنا جیویں اردوان لئی لوک نکلے سن۔
آخری گل’ جدوں وی پاکستان دی ترقی تے موٹرویز دا ذکر آئے گا تے نوازشریف دا ناں چمکے گا پر جدوں معیشت دی تباہی’ آٹا’ چینی چوری’ کرپشن دے دبستان تے گھڑی چوری دے ذمہ دار دا ذکر آوے گا تے اک ای ناں لیا جاوے گا اوہ ایناں مشہور ہو چکیا اے اوہنوں ہن پوری دنیا جان دی اے یقین نہیں آندا تے بے شک گوگل کرکے ویکھ لوو۔٭