وَگدا پانی پاک ہوندا اے

عتیق انور راجہ

سٹی پلس ولوں سماجی رابطے اتے ٹریفک لان تے سموگ دے حوالے نال مسلسل رپورٹنگ ہو رہی اے۔ لیکن حقیقت وچ شہر وچ بہت بھیڑا حال اے۔ موجودہ سی ٹی او طارق بٹ صاحب شاید سارے کم دفتر بیٹھ کے ای ٹھیک کرن دا منصوبہ رکھدے نیں۔ جناب نوں عملی طور تے کدی شہر وچ ٹریفک بہتری لئی اقدامات کردے نہیں ویکھیا گیا اے۔ شیرانوالہ باغ دے سامنے بلاک رکھ کے رستہ بند کرنا چنگی حکمت سی لیکن روزانہ ہر ویلے موٹرسائیکل تے چاند گاڑیاں پکی بنی فٹ پاتھ توں سڑک پار کردے ویکھے جا رہے نیں۔ بے حس بے خبر ٹریفک پلس دے جوان دور بیٹھے ایہہ سارا ویکھدے رہندے نیں لیکن کوئی وی اگے ودھ کے ایس غیر قنونی عمل اتے ایکشن نہیں لیندا۔ پچھلے کئی دناں توں جدوں شہر ول جانا واں تے شہر دے وچوں لنگھن والی نہر دی حالت ویکھ کے دل نوں تکلیف ہوندی اے کدی ایہہ نہر پانی نال بھری ہویا کردی سی تے شہر دی فضا وچ تازگی جئی محسوس ہوندی سی۔ اوہدے پانی دے اتے کدی بلبل تے فاختاواں پرواز کردیاں تے محبت بھرے گیت گاندی نظر آندیاں لیکن اج کل ایہہ نہ صرف خشک اے بلکہ ایہہ گندگی تے غلاظت دا ڈھیر بن چکی اے۔ نہر وچ پانی تے قریب خشک ہو ای چکیا اے لیکن روز سویرے ایہدے وچ مناں دے حساب نال پلاسٹک شاپراں وچ صدقے دے گوشت دے نام تے پتہ نہیں کیہ کجھ سٹیا جا رہیا اے۔
روز سوشل میڈیا اتے کراپ کر کے شہر دی صفائی ستھرائی دی تصویراں لان والی انتظامیہ دی توجہ ایس پاسے پتہ نہیں کیوں نہیں ہو رہی ۔ پرانے وقتاں وچ کہندے سن کہ وگدا پانی پاک ہوندا اے لیکن جدوں دا اسیں نہراں ندی نالیاں تے دریاواں دے پانی وچ گند سٹنا شروع کیتا اے تے اسیں پاک پانی نوں پلید کر دتا اے جہدے توں اسیں نعمتاں دی بے قدری دے مرتکب ہوئے آںتے ایسے بے قدری دا نتیجہ اے کہ ساڈے دریا خشک ہو رہے نیں۔ سونا اگلدی زمین خشک ہوندی جا رہی اے۔ فضاواں وچ ہر ویلے زہریلی گیس محسوس ہوندی اے۔و یسے تے اسیں بھارت دی ہر شر انگیزی برداشت کردے چلے جا رہے آں لیکن مینوں لگدا اے کہ بھارت دے نال پانی دے مسئلے اتے ساڈی جنگ طے اے کیوں جے جدوں ساڈیاں فصلاں خشک سالی دا شکار ہون گئیاں تے کسان دے نال عوام وی دشمن نوں للکاردی باہر آ جاوے گی۔
اسیں جاننے آں کہ ایہہ دور میڈیا دی طاقت دا دور اے یعنی جس قدر کسے دا بیانیہ طاقتور ہوندا اے یا جو جِنھے چنگے انداز وچ اپنا موقف پیش کردا اے دنیا والے اوہدی گل نوں تسلیم کر لیندے نیں۔ ہن ویکھو کہ وٹس ایپ ہووے’ فیس بک یا کوئی دوجا سوشل نیٹ ورک جدوں اسیں تقلید ای کرنی اے تے فیر ساڈے حقوق دی حفاظت کیویں ہو سکدی اے۔ اج کل بہت سارے پاکستانی اپنی پرائیویسی توں پریشان نیں لیکن میں تے ایہہ ویکھیا اے کہ سوشل نیٹ ورک اتے کوئی وی اپیلیکیشن ڈائون لوڈ کرن تے اوہ ساڈے کولوں ساڈے فوج وچ موجود ہر شے اتے دسترس منگے بنا سانوں مطلوبہ سہولت دین نوں تیار نہیں ہوندے کیوں جے سانوں شوق ہوندا اے نویں نویں ایپلی کیشنز نوں چلان دا تے ساڈے ایس شوق دے عوض ساڈے توں مختلف ویلیاں وچ مختلف ملکاں دیاں ایجنسیاں ساری معلومات حاصل کر لیندیاں نیں۔ ایس لئی وٹس ایپ ولوں فیس بک اتے معلومات منتقل ہون یا فیس بک توں امریکہ تے اسرائیل اسیں بے بس واں۔ ساڈے لوک سوشل نیٹ ورک استعمال کرن توں ہن رک نہیں سکدے ۔ کہندے نیں کہ سوشل نیٹ ورک نوں ہینڈل کرن والیاں وچ اکثریت ساڈے دشمن ملک بھارت تے اسرائیل دے لوکاں دی اے۔ ساڈے نوجوان ہونہار تے بہت نیں لیکن ساڈا تعلیمی نظام اینا بوسیدہ ہو چکیا اے کہ ایس توں نکلن والے صرف نوکری تلاش کردے نیں صرف اپنا چنگا مستقبل ای اوہناں دا سفنا ہوندا اے۔ ساڈے لوک چاہے جنے وڈے عہدے تک پہنچ جان وطن دی خدمت دے نام تے اوہناں دی ترجیحات وچ اپنی تے اپنیاں دی نسلاں سنوارنا ای ہوندا اے۔ اوہ ہر حال وچ ودھ توں ودھ پیسہ بنانا چاہندے نیں۔ پیسے دے پجاریاں توں ملکی مفادات دی حفاظت کیویں ہو سکدی اے۔ساڈے قومی مسائل تے قومی ضروریات ودھدیاں جا رہیاں نیں تے قومی وقار اتے روز سوالیہ نشان لگ جاندا اے۔ سانوں ایہہ نقطہ سمجھنا ہووے گا کہ ایس ویلے بھارت ای نہیں بلکہ دنیا دا ہر طاقت ملک تے ادارہ جارحیت اتے تلیا ہویا اے سانوں ایس مشترکہ دشمن دے مقابلہ لئی تیاری کرنا ہووے گی۔ اپنیاں توانائیاں اپنیاں نوں ہران وچ لان توں گریز کرنا ہووے گا۔ سانوں دشمن نال ہر میدان وچ مقابلہ لئی تیاری دا حکم اے۔ اسیں اکثر ایہہ خبر سننے آں کہ لائن آف کنٹرول دے مقام تے بھارتی جارحیت دی وجہ نال ساڈے کئی معصوم شہری شہید یا زخمی ہو گئے۔انج دیاں خبراں وی سانوں ملدیاں نیں کہ بھارتی ایجنسیاں دے کارندے اپنے مذموم مقاصد دی تکمیل لئی پاکستان وچ سرگرم نیں۔ سانوں ایہہ وی دسیا جاندا اے کہ بھارت سرکار ساڈے دریاواں دا پانی روک کے ساڈیاں زمیناں نوں بنجر بنا دینا چاہندی اے۔ انج دیاں خبراں وی سنیاں جاندیاں نیں کہ بھارتی میڈیا اپنی حکومت دی ایما ا تے پری پلان طریقے نال پاکستان مخالف تے اسلام مخالف پروگرامز ترتیب دیندا رہندا اے۔
بھارتی فلماں جہناں نوں ساڈے لوک شوق نال ویکھدے نیں اوہناں وچ وی اسلام تے پاکستان دے خلاف مسلسل زہر اگلیا جا رہیا اے لیکن ساڈے ولوں کدی زبانی کلامی احتجاج تے کدی اک ادھ جاسوس نوں پھڑن دی ای خبر پیش کیتی جاندی اے۔مینوں لگدا اے کہ میرے ملک وچ یا تے کوئی تھنک ٹینک ہے ای نہیں اے جو دشمن دیاں چالاں دے جواب وچ بوہتا موثر چال چل سکے یا ساڈے تھنک ٹینک وچ بیٹھے لوکاں دی اپنی ترجیحات کجھ ہور نیں کیوں جے اسیں واقعی دشمن نال مقابلہ کرنا اے تے اوہنوں شکست فاش وی دینی اے تے سانوں اپنی حکمت عملی تبدیل کرنی پووے گی۔ ضلعی انتظامیہ گوجرانوالہ تے سی ٹی او ولوں سوشل میڈیا اتے فوٹو زبڑیاں چنگیاں اپ لوڈ ہو رہیاں نیں لیکن نہ شہر وچ ٹریفک نظام قابل تعریف اے تے نہ ای نہراں وچ گندگی سُٹن والیاں دے خلاف کوئی حکمت عملی اجے تک نظر آئی اے۔ اج دے دور وچ صدقہ دے بہترین حقدار سفید پوش رشتہ دار محلہ دار تے دوجا غریب طبقہ اے۔ جے نہری پانی صاف رکھن دی کوشش کیتی جاوے۔ ٹریفک نظام بہتر کرن لئی سوچ وچار مگروں موثر فیصلے کیتے جان تے وگدا پانی فیر پاک ہوجاوے گا۔