لیجینڈ اداکار شاہد پچھلے دو مہینیاں توں کینیڈا وچ مصروف

اشفاق کاظمی

پاکستان فلم انڈسٹری دے لیجینڈ فنکار شاہد حمید کسے تعارف دے محتاج نہیں۔ اج کل اوہ کینیڈا وچ شوبز علمی’ ادبی’ سماجی سرگرمیاں وچ مصروف نیں۔ اوہ اوتھے دو مہینیاں توں موجود نیں تے پاکستان توں ودھ مصروف زندگی لنگھا رہے نیں۔ اوہدی کئی وجوہات نیں۔ پہلے نمبر تے اوہناں دیاں چار بھیناں عرصہ دراز توں کینیڈا’ لندن وچ رہ رہیاں نیں تے شاہد صاحب دے بھانجے بھانجیاں اوتھے خوشحال زندگی بسر کر رہے نیں۔دُوجی وجہ اوہناں دے دو پتر عمران شاہد تے ظہیر شاہد اودھر ای چنگی پوسٹاں اتے کم کر رہے نیں جد کہ دھی رابعہ شاہد دا ویاہ وی اوتھے ای کیتا ہویا اے۔ تیجے نمبر تے اوہناں دے دوست احباب تے فینز دا اک وڈا طبقہ یورپ وچ موجود اے۔ ایس واری وی اوہناں دا ایہہ دورہ بہت کامیاب جارہیا اے۔
اوہناں نوں منے پرمنے گلوکار نصرت فتح علی خاں دی برسی اتے بطور چیف گیسٹ مدعو کیتا گیا ایس دے علاوہ بہت سارے فیشن شوز تے قوالی نائٹ وچ وی اچیچے پروہنے سن۔ اوہدے علاوہ اوتھے دی کئی فلاحی تنظیماں نے وی اوہناں نوں چیف گیسٹ بنایا جہناں وچ ڈاکٹر نیاز دی ڈائیلسز دی تنظیم رحمان فائونڈیشن سرفہرست اے۔ شاہد صاحب نال رابطہ کرن تے پتہ چلیا کہ اودھر دے ادھ درجن چینلز نے اوہناں نوں پاکستان دے لیجینڈ فنکار ہون دے ناطے انٹرویو کیتے جہناں وچ وائس آف کینیڈا دے روح رواں محترم بدر منیر چودھری تے وائس آصف ٹورنٹو دے انجم ملک سرفہرست نیں۔بدر منیر چودھری دا شمار پاکستان دے نامور اخبار نویساں وچ ہوندا اے تے اوہ پریس کلب لہور دے چیئرمین وی رہ چکے نیں۔ ایس دے علاوہ جیو ٹی وی لئی وی اوہناں دی خدمات جاری نیں اوہ پاکستان تے کینیڈا وچ یکساں مقبول نیں۔ میں تے اوہناں نوں پاکستان دے ثقافتی مشیر قرار دینا واں ۔اوہ جدوں وی لہور آندے نیں’ بندہ ناچیز نوں ضرور اپنی محفل وچ بلاندے نیں۔
جتھوں تک شاہد حمید صاحب دی گل اے۔ اوہناں دی مرکزی کردار وچ اک فلم (چن چہرہ)زیر تکمیل اے جہدے ہدایتکار حسن عسکری نیں تے اوہ شاہد صاحب دے آن تے مکمل کیتی جاوے گی جد کہ اوہناں دی عدم موجودگی وچ اوہناں نوں دو فلماں وچ کاسٹ وی کر لیتا گیا اے۔ شاہد صاحب نے دسیا کہ اشفاق بھائی وچ گھٹ فلماں کراں گا مگر جاندار سکرپٹ دی کراں گا۔ ایہہ تہاڈے سامنے اوہناں دی نومبر دسمبر دی مصروفیات بیان کیتیاںگئیاں نیں۔ جنوری دی اوہ کجھ دناں مگروں سینڈ کرن گے۔ ویسے میرے پچھن تے واپسی دے متعلق اوہنان نے دسیا کہ اوہ 23مارچ دیاں تقریباں منان مگروں واپس آن گے۔ میں جدوں اوہناں نوں پچھیا کہ تہانوں وطن دی یاد نہیں آندی تے اوہناں نے کہیا کہ میرے وطن دی مٹی جئی کسے ملک دی مٹی نہیں اے پاکستان ساڈی پہچان اے۔ پاکستان زندہ باد