محسن رضا نقوی نگران وزیر اعلی پنجاب مقرر
لہور( پنجابی میڈیا گروپ)حکومت، اپوزیشن تے پارلیمانی پارٹی ولوں نکامی توں بعد الیکشن کمیشن نے محسن رضا نقوی نوں پنجاب دا نگران وزیر اعلی مقرر کر دتا اے ۔ چیف الیکشن کمشنر سکندر سلطان راجہ دی زیر صدارت ہون والے اجلاس وچ ممبراں، سیکرٹریاں تے الیکشن کمیشن دے ہوراںحکام رَلتی ہوئے، اجلاس 1گھنٹے توں وَدھ جاری رہیا، سیکرٹری الیکشن کمیشن ولوں چار نامزدگیاںبارے وچ بریفنگ دتی گئی۔ الیکشن کمیشن دے اجلاس وچ مشاورت توں بعد نگران وزیر اعلی پنجاب لئی صحافی محسن رضا نقوی دے نام اُتے اتفاق کیتا گیا ۔محسن رضا نقوی نوں اپوزیشن لیڈر حمزہ شہبازولوں نامزد کیتا گیا سی ۔ نگران وزیر اعلی پنجاب دے تقررتوں پہلاں چیف الیکشن کمشنر تے سیکرٹری الیکشن کمیشن دے درمیان ملاقات وی کیتی گئی سی، جس وچ اہم تقرری بارے گل بات کیتی گئی، سکندر سلطان راجہ نوں تقرری دے طریقہ کار بارے آگاہ کیتا گیا ۔ ملاقات وچ لاونگ ولوں نگران وزیر اعلی دی تقرری بارے آئینی امور اُتے وی بریفنگ دتی گئی سی، ایس دوران چیف الیکشن کمشنر سکندر سلطان راجہ نے آکھیا کہ چاراں ناماںدا بغور جائزہ لے کے میرٹ اُتے نامزدگی دی منظوری دیاں گے۔ پنجاب وچ نگران وزیراعلی دے تقرری دا معاملہ پچھلے ہفتے پنجاب اسمبلی دی تحلیل توں بعد نامزد امیدواراں اُتے صوبائی حکومت تے اپوزیشن دے درمیان مسلسل تنائو تے عدم اتفاق دے سبب غیر معمولی تاخیر دا شکار ہویا اے۔ سپیکر پنجاب اسمبلی ولوں بنائی گئی دو طرفہ پارلیمانی کمیٹی وی مقررہ ویلے وچ اتفاق رائے اُتے پہنچن وچ نکام رہی جس توں بعد الیکشن کمیشن دے اجلاس وچ نگران وزیر اعلی دا فیصلہ کیتا گیا جس دی حتمی منظوری چیف الیکشن کمشنر نے دتی۔ ایس توں پہلاں ذرائع دا کہنا سی کہ چیف الیکشن کمشنر سکندر سلطان راجہ دی زیر صدارت ہون والے اجلاس وچ غیر رسمی گل بات توں پہلاں نگران وزیر اعلی دی تقرری دے معاملے بارے فیصلے اُتے اتفاق رائے دی راہ ہموار کیتی جائے گی۔یاد رہے کہ نگران وزیر اعلی دا فیصلہ کرن لئی الیکشن کمیشن کول صرف اج دا دن سی ،آئین دے آرٹیکل اے224دے تحت2دن دا ویلا اج ختم ہونا سی، چودھری پرویز الہی نے سردار احمد نواز سکھیراتے نوید اکرم چیمہ جدکہ حمزہ شہباز نے محسن نقوی تے احد چیمہ دے نام گھلے سن۔
