سویڈن :قرآن پاک دی بے حرمتی اُتے مسلم دنیادا شدید احتجاج
اسلام آباد(پنجابی میڈیاگروپ) دائیں بازو نال تعلق رکھن والے انتہاپسنداں سویڈن دے نیٹو وچ شمولیت دی مخالفت کرن اُتے ترکیہ دے خلاف اسٹاک ہوم وچ مظاہرے دے دوران قرآن پاک تے اوراق ساڑے جس اُتے مسلم دنیا نے شدید غم تے غصے دا اظہارکیتا اے ۔ عالمی خبر رساں ادارے دے مطابق سویڈن وچ دائیں بازودے کٹر رہنما راسموس پلودن نے ترکیہ دے سفارت خانے سامنے اک مظاہرے وچ قرآن پاک تے ترکیہ دے جھنڈے نوں ساڑ دتا۔ایہ مظاہرہ سویڈن دی نیٹو وچ شمولیت دی درخواست اُتے ترکیہ دی مخالفت دے خلاف کیتا جا رہیا سی۔ ایس معاملے اُتے ترکیہ تے سویڈن دے درمیان پہلاں ہی تعلقات کشیدہ نیں ترک وزیر خارجہ نے ایس ناپاک قدم دی شدید لفظاں وچ مذمت کردیاں ہویاں آکھیا کہ اظہار رائے دی آزادی دی آڑ وچ اسیںاپنی مقدس کتاب اُتے ہونے والے گھنائونے حملے دی سخت ترین لفظاں وچ مذمت کردے ہاں۔ ساڈی مقدس اقدار دی توہین تے اسلام مخالف فعل دی اجازت دینا ناقابل قبول اے۔ ترکہ وزیر خارجہ نے اپنا دورہ سویڈن وی منسوخ کردتا۔ سعودی عرب نے وی سویڈن وچ قرآن پاک دی بے حرمتی دے واقعے دی شدید لفظاں وچ مذمت کیتی تے ذمہ داراں دے خلاف سخت توں سخت کارروائی دا مطالبہ کیتا۔ ایسی طرح ایران تے عراق نے ایس معاملے اُتے سویڈن دے سفارت کاراںنوںسَدھ کے شدید احتجاج ریکارڈ کروایا۔ اردن تے کویت سنے ہوراں عرب ملکاں نے وی قرآن پاک نوں نذر آتش کرن دی مذمت کیتی ۔ پاکستانی وزارت خارجہ ولوں جاری بیان وچ آکھیا گیا اے کہ ایہ آزادی اظہار رائے نہیں۔ اسلاموفوبیا اُتے مبنی ایس عمل نال دنیا بھر وچ1.5ارب مسلماناں دے جذبیاں نوں ٹھیس پہنچی اے۔مسلم دنیا دے غم و غصے اُتے سویڈن دے وزیر خارجہ ٹوبیاس بلسٹروم نے بیان جاری کیتا کہ اسلامو فوبک اشتعال خوفناک اے۔ملک وچ اظہار رائے دی آزادی اے لیکن ایس دا مطلب ایہ نہیں اے کہ سویڈن دی حکومت، یا میں اینج دے اقدام دی حمایت کردیاں نیں۔خیال رہے کہ ڈنمارک دی انتہائی دائیں بازو دی سیاسی جماعت دے متنازع رہنما ریسمس پلودن ایس توں پہلاں وی قرآن پاک نوں نذرآتش کرن دی ناپاک حرکتاں کر چکیا اے۔





















