مقبوضہ کشمیر وچ فلسطین دی طرز تے آبادکاری دا بھارتی منصوبہ

اطلاعات دے مطابق بھارت سرکار پچھلے تن ورھیاں وچ 50 ہزار توں ودھ غیر مقامی ہندوواں نوں مقبوضہ کشمیر دا ڈومیسائل جاری کر چکی اے۔ اوہناں وچ بھارتی فوج دے ریٹائرڈ ایسے افسران تے جوان تے بیورو کریٹ وی شامل نیں جو ملازمت دے دوران مقبوضہ کشمیر وچ تعینات رہے تے اوتھے دے ماحول توں بخوبی واقف نیں۔ ڈومیسائل ملن مگروں بھارت دے ہندوواں نوں اختیار مل گیا اے کہ اوہ مقبوضہ کشمیر وچ املاک خرید کر سکن’ کاروبار کرو یا سرکاری ملازمت حاصل کر سکن۔ ریٹائرڈ بیوروکریٹ تے اوہ فوجی جو مقبوضہ کشمیر وچ رہائش دے خواہشمند ہون اوہناں نوں رہائش لئی گھٹ قیمت اتے زمین سرکار فراہم کرے گی جد کہ گھر اوہناں نوں خود تعمیر کرنا ہووے گا۔ ایس مقصد لئی بینک اوہناں نوں بہت گھٹ مارک اَپ دے نال آسان قسطاں اتے قرضہ وی فراہم کرن گے۔ اوہناں نوں غیر ممنوعہ بورڈدے خودکار ہتھیار رکھن لئی سرکار لائسنس جاری کرے گی تاہم ممنوعہ بور دے اسلحہ لئی اوہناں نوں خصوصی اجازت نامہ درکار ہووے گا جو بھارتی وزارت دفاع دے این او سی توں مشروط ہووے گا۔ کاروبار دے خواہشمند بھارتی ہندوواں نوں مقبوضہ کشمیر دے بینک گھٹ مارک اپ نال قرض دین دے پابند ہون گے۔
غیر کشمیری بھارتی ہندوواں نوں مقبوضہ کشمیر وچ آباد کرن لئی سب توں وڈا مسئلہ اوتھے سارے اضلاع دے شہری علاقیاں وچ زمین دا حصول اے۔ مقبوضہ جموں و کشمیر وچ سرکار دی زمیناں اتے پہلے ای بھارتی فوج تے بارڈر سکیورٹی فورس دے علاوہ دوجے نیم فوجی دستے قابض نیں جہناں نوں 1989 مگروں امن وامان دے قیام دے نام تے لکھاں دی تعداد وچ مقبوضہ علاقیاں وچ تعینات کیتا گیا۔1990 دی دہائی تک ایہہ تعداد 6 لکھ توں کجھ بوہتی سی جو 5 اگست 2019 نوں مقبوضہ کشمیر دی خصوصی حیثیت دا خاتمہ کرن مگروں ودھ کے تقریباً 10لکھ تک پہنچ چکی اے۔ مقبوضہ کشمیر وچ بہت سارے تعلیمی ادارے بھارتی فوج نوں عارضی طور تے رہائش تے فوجی ہیڈ کوارٹرز دے طور تے دتے گئے سن اوہ نہ صرف اجے تک بھارتی فوج تے نیم فوج دستیاں دے قبضے وچ نیں بلکہ اوہناں نوں ہور وسعت دے کے قبضے نوں ہور مستحکم کیتا جا چکیا اے۔ فوج دی یونٹاں تے بریگیڈ ہیڈ کوارٹرز لئی وکھرے توں شہری حدود دے باہر تعمرات کیتی گئیاں نیں۔ غیر کشمیری ہندوواں دی آبادکاری لئی اک ای رستہ بچدا اے کہ کشمیریاں دی زمین’ کھیت تے باغ تے اوہناں دی املاک اتے قبضہ کیتا جاوے۔ ایس سلسلے وچ قنوناں دی تیاری وچ مقبوضہ فلسطینی علاقیاں وچ غیر مقامی یہودیاں دی آبادکاری لئی اسرائیل وچ تیار کردہ قنوناں توں استفادہ کیتا گیا اے۔ ایہہ قنون ماضی وچ Settler Colonial Project دے نام توں ریاست ہائے متحدہ امریکہ’ نیوزی لینڈ تے آسٹریلیا وچ کامیابی دے نال بروئے کار لیائے جا چکے سن تاں جے مقامی آبادی دی روایتاں’ شناخت’ تہذیب و تمدن تے آبادی نوں بتدریج تحلیل دے عمل توں لنگھا کے نویں آبادکاراں نوں غلبہ دوایا جا سکے۔
یہودیاں نے دور حاضر دے جمہوری نظام’ اقوام متحدہ ولوں نافذ کردہ انسانی حقوق دے ایکٹ تے آزادمیڈیا دے ذریعے عالمی سطح اتے رائے عامہ دی تنقید توں بچن لئی نو آبادیاتی نظام وچ تبدیلی کردیاں ہوئے اوہدے وچ اک نواں قنون وی شامل کردتا جہدے تحت اسرائیل وچ یہودیاں تے اوہناں دے مفادات اتے حملہ آور فلسطینیاں نوں ات گرد قرار دے کے اسرائیل دی حکومت فلسطینیاں دے گھراں تے املاک نوں ضبط کرن دی حقدار قرار دے دتی گئی۔ علاوہ ازیں جہناں نوں اسرائیل نے ات گرد قرار دے رکھیا ہووے اوہناں نوں پناہ دین یا اوہناں لئی سہولت کاری کرن والے فلسطینی وی ایسے سزا دے حقدار قرار پاوے۔ اپنے ایہناں نوں کالے قنون دی آڑ وچ اسرائیل ورھیاں توں مقبوضہ علاقیاں توں درجناں فلسطینی خانداناں نوں بے دخل کر کے اوہناں دے گھراں اتے قبضہ مگروں اوتھے نویں یہودیاں نوں آباد کردا چلیا آ رہیا اے۔ زیتون دے باغ ہون یا بھیڑ بکریاں ایہہ سارے فلسطینیاں دا قیمتی اثاثہ نیں۔ اوہناں نوں معاشی طور تے برابد کرن لئی اسرائیل فوجی بڑے منظم انداز توں کسی معصوم بے گناہ فلسطینی نوں بلاوجہ قتل کرن مگروں ایہدے خلاف احتجاج کرن والے فلسطینیاں نوں پہلے تے دھکیلدے ہوئے زیتون دے کسی باغ وچ لے جاندے نیں تے فیر اوہناں اتے اگ لان والے کیمیکل نال بنے ایسے آنسو گیس دے شیل فائر کیتے جاندے نیں جو زیتون دے درختاں نوں اگ لا کے ویکھدے ای ویکھدے راکھ دا ڈھیر بنا دیندے نیں۔ فلسطینیاں دی بھیڑ بکریاں نوں مارن لئی مختلف طرحاں دے ہتھکنڈے استعمال کیتے جاندے نیں۔ ایہناں انسانیت سوز مظالم دے خلاف جے کوئی ملک اسرائیل دے خلاف اقوام متحدہ دی جنرل اسمبلی وچ قرارداد پیش کردیوے تے امریکہ اسرائیل دی مدد لئی اوتھے پہلاں توں موجود ہوندا اے تاں جے دینو دی طاقت استعمال کیتی جا سکے۔
کجھ انج دا ای طریقہ کار بھارت مقبوضہ جموں و کشمیر وچ اختیار کیتے ہوئے اے۔ آئے دن مقبوضہ کشمیری علاقیاں وچ بھارتی ناجائز قابض فوج دے ہتھاں بے گناہ کشمیریاں دے مارے جان دی خبراں ملدیاں نیں۔ شہید کیتے گئے کشمیری نوجواناں نوں ات گرد بنا کے پیش کیتا جاندا اے۔ اوہناں شہیداں دے لواحقین دے کول جے تھوڑی بہت زمین ہووے یا سیباں تے دوجے پھلاں دے باغ ہون تے فیر باغیاں دی املاک بحق سرکار ضبط کرن دا قنون حرکت وچ آندا اے۔ بھارتی فوجیاں دی منت سماجت کردے نیں۔ معافی دینی ہووے یا عماملات طے ہو جان تے بھاری رشوت وصول کر کے بغاوت دا کیس ختم کردتا جاندا اے۔ انج بعض مظلوم کشمیری ناجائز قابض بھارتی فوج تے بھارت سرکار دی غلامی اتے مجبور کر دتے جاندے نیں۔ ایہو طریقہ کار اے جہدے تحت مقبوضہ فلسطین وچ فلسطینیاں نوں اپنے گھراں توں بے دخل کر کے اوہناں نوں اپنی ای سرزمین اتے مہاجرین نوں رہن نوں مجبور کیتا جارہیا اے تے ہن ایہو حربہ بھارت مقبوضہ کشمیر وچ آزمایا رہیا اے۔ اوہناں سارے حربیاں دے باوجود کشمیری ہن تک ہر طرحاں دے بھارتی جبر دے خلاف ڈٹے ہوئے نیں۔ اوہ کلے نیں’ جیویں مقبوضہ فلسطین دے آسے پاسے عرب ملک فلسطینیاں اتے توڑے جان والے ظلم اتے اکھاں تے کن بند کیتے ہوئے نیں ایسے ای پاکستان دے عاوم نوں کشمیریاں دی خاص فکر نہیں۔ پاکستان دے عوام بھل رہے نیں کہ پچھلے 75 ورھیاں توں کشمیری تکمیل پاکستان دی جنگ لڑ رہے نیں۔ ایہہ دو قومی نظریہ دے تحفظ دی جنگ اے۔ ایہدے وچ کشمیری ہاردے نیں تے قیام پاکستان دا جواز ختم ہو جاندا اے۔ بھارت پہلاں دناں توں پاکستان دی سلامتی دے در پے اے۔ دوتہائی کشمیر اتے اوہدا ناجائز قبضہ درحقیقت پاکستان دی سلامتی دے خلاف ایہدے دیرینہ ایجنڈے دا حصہ اے جہنوں نکام بنانا ہر پاکستانی دی ذمہ واری اے۔
کشمیری بھارت دے خلاف اپنی تحریک تے تکمیل پاکستان دی جدوجہد وچ اک لکھ توں بوہتی جاناں دی قربانی دے چکے نیں۔ ہن اوہناں دی تیجی نسل اے جو ناجائز قابض بھارتی فوج دی گولیاں تے بیلٹ گن دے چھریاں دے سامنے اے۔ اوہ اج وی گولیاں دی تڑتڑاہٹ وچ خوف زدہ ہو کے ”پاکستان زندہ باد” دا نعرہ لاندے ہوئے نہیں ڈردے تے فیر اسیں پاکستانیاں نوں کہڑی گل دا خوف اے کہ اسیں کشمیریاں دی آواز بنن توں گریزاں نیں۔ پاکستانی عوام دی موثر آواز اقوام عالم تے اقوام متحدہ نوں مجبور کر سکدی اے کہ اوہ بھارت توں کشمیریاں نوں خود ارادیت دا حق دواوے۔