پیارے نبیۖ دیاں پیاریاں گلاں۔۔۔

حضرت ابوذر کولوں روایت اے کہ میں عرض کیتا اے اللہ دے رسولۖ زمین وچ سب توں پہلی کہڑی مسجد بنائی گئی؟ آپۖ نے فرمایا مسجد حرام’ میں عرض کیتا فیر اوہدے مگروں کہڑی؟ آپۖ نے فرمایا: مسجد اقصیٰ’ میں عرض کیتا ایہناں دونواں مسجداں وچ کنا فاصلہ اے؟ آپۖ نے فرمایا: 40ورھے فیر جتھے نماز دا ویلا ہو جاوے اوتھے نماز پڑھ لوو اوہو مسجد اے۔ حضرت ابراہیم بن یزید تیمی کولوں روایت اے کہ میں اپنے والد نوں مسجد توں باہر سائبان وچ قرآن سنایا کردا سی۔ جدوں میں سجدہ دی آیت پڑھدا سی تے اوہ سجدہ کر لیندے میں اپنے والد نوں کہیا اے اباجان کیہ تسیں رستہ ای وچ سجدہ کر لیندے او۔ اوہناں نے کہیا میں حضرت ابوذر نوں سنیا اے اوہ فرماندے سن کہ میں رسول اللہۖ نوں پچھیا زمین وچ سب توں پہلی کہڑی مسجد بنائی گئی؟ آپۖ نے فرمایا: مسجد حرام’ میں عرض کیتا فیر کہڑی؟ آپۖ نے فرمایا: مسجد اقصیٰ’ میں عرض کیتا کہ اوہناں دونواں وچ کنا فاصلہ اے؟ آپۖ نے فرمایا: 50ورھیاں دا’ فیر ساری زمین تیرے لئی مسجد اے جتھے تونماز دا ویلا پاویں تے نماز پڑھ لیا کرو۔
حضرت جابر بن عبداللہ انصاری کولوں روایت اے کہ رسول اللہۖ نے فرمایا: مینوں پنج ایسیاں شیواں دتیاں گئیاں نیں جو میرے توں پہلاں کسے نوں نہیں دتیاں گئیاں پہلے ہر نبی صرف خاص اپنی قوم وَل گھلیا جاندا سی تے میں ہر لال تے کالے وَل گھلیا گیا واں۔ پہلے کسے نبی لئی مال غنیمت حلال نہیں ہوندا سی اوہ صرف میرے لئی حلال کردتا گیا اے تے صرف میرے لئی ساری روئے زمین پاک تے مسجد بنا دتی گئی اے لہٰذا جو آدمی جہڑی جگہ وی نماز دا وقت پاوے اوتھے نماز پڑھ لووے تے میری ایسے رعب توں مدد کیتی گئی جو اک مہینے دی مسافت توں طاری ہو جاندا اے تے مینوں شفاعت عطا کیتی گئی۔
حضرت حذیفہ کولوں روایت اے کہ رسول اللہۖ نے فرمایا: سانوں لوکاں اتے تن شیواں دی بنا تے فضیلت دتی گئی اے۔ ساڈیاں صفاں فرشتیاں دیاں صفاں وانگوں بنا دتیاں گئی نیں تے ساڈے لئی ساری روئے زمین مسجد بنا دتی گئی اے تے اوہدی مٹی (پانی نہ ملن ویلے) ساڈے لئی پاک کرن والی بنا دتی گئی تے اک ہور خصلت بیان فرمائی۔
حضرت ابو ہریرہ کولوں روایت اے کہ رسول اللہۖ نے فرمایا کہ مینوں چھ وجوہات توں انبیاء کرام (علیہ السلام) اتے فضیلت دتی گئی اے۔ مینوں جوامع الکلم عطا فرمائے گئے۔ رعب دے ذریعے میری مدد کیتی گئی۔ میرے لئی مال غنیمت نوں حلال کردتا گیا تے میرے لئی ساری روئے زمین پاک کرن والی تے نماز دی جگہ بنا دتی گئی تے مینوں ساری مخلوق وَل گھلیا گیا تے میرے اتے نبوت ختم کردتی گئی۔ (یعنی میں خاتم الانبیائۖ واں)
حضرت ابو ہریرہ کولوں روایت اے کہ رسول اللہۖ نے ارشاد فرمایا کہ دشمن دے مقابلے وچ رعب دے ذریعہ میری مدد کیتی گئی اے تے مینوں عطا فرمائے گئے تے سونے دی حالت وچ زمین دے خزانیاں دیاں چابیاں لیا کے میرے ہتھاں وچ رکھ دتیاں گئیاں نیں۔ حضرت انس بن مالک کولوں روایت اے کہ رسول اللہۖ مدینہ پہنچے تے شہر دے بالائی علاقے دے اک محلے وچ تشریف لے گئے۔ آپۖ نے اوتھے چودہ راتاں قیام فرمایا فیر آپۖ نے قبیلہ بنو نجار نوں بلوایا اوہ اپنیاں تلواراں لٹکائے ہوئے حاضر ہوئے۔ حضرت انس کہندے نیں ایہہ منظر اج وی میریاں اَکھاں دے سامنے اے کہ میں رسول اللہۖ نوں ویکھ رہیا سی۔ آپۖ اونٹنی اتے
سوار سن تے حضرت ابوبکر آپۖ دے پچھے بیٹھے ہوئے سن تے بنو نجار تہاڈے آسے پاسے سن ۔ آپۖ حضرت ابو ایوب دے گھر دے صحن وچ اترے۔ حضرت انس کہندے نیں کہ آپۖ جتھے نماز دا وقت پاندے اوتھے نماز پڑھ لیندے سن ایتھوں تک کہ بکریاں دے باڑے وچ وی نماز پڑھ لیندے سن فیر اوہدے مگروں آپۖ نے مسجد بنان دا ارادہ کیتا تے بنو نجارنوں بلوایا جدوں اوہ آوے تے فرمایا تسیں اپنا باغ مینوں ویچ دیو۔ اوہناں نے کہیا اللہ دی قسم اسیں تے آپۖ کولوں ایس باغ دی قیمت نہیں لوواں گے۔ اسیں ایہدا معاوضہ صرف اللہ تعالیٰ کولوں چاہنے آں۔ حصرت انس کہندے نیں کہ ایس باغ وچ جہڑیاں شیواں سن اوہناں نوں میں دسنا واں اوہدے وچ کجھ کھجوراں دے درخت’ مشرکین دیاں قبراں تے کھنڈرات سن پس رسول اللہۖ نے کھجور دے درختاں دے کٹن دا حکم دتا اوہ وڈ دتے گئے۔ مشرکین دیاں قبراں اکھاڑ کے سٹ دتیاں گئیاں تے کھنڈرات ہموار کر دتے گئے تے کھجور دیاں لکڑیاں قبلہ ول گاڑھ دتیاں گئیاں تے اوہدے دونویں پاسے پتھر لا دتے گئے۔ رسول اللہۖ تے صحابہ کرام رجزیہ کلمات پڑھ رہے سن۔ اے اللہ! بھلائی تے صرف آخرت دی بھلائی اے پس تے انصار تے مہاجرین دی مدد فرما۔ حضرت براء بن عازب فرماندے نیں کہ میں نبیۖ دے نال بیت المقدس ول سولہ مہینہ تک نماز پڑھی ایتھوں تک کہ ایہہ آیت کریمہ جو سورت البقرہ وچ نازل ہوئی تے تسیں جتھے کدھرے وی ہووو اپنا منہ مسجد حرام ول کر لوو۔ ایہہ آیت کریمہ اوس ویلے نازل ہوئی جدوں نبیۖ نے نماز پڑھ لیتی لوکاں وچوں اک بندا ایہہ حکم سن کے چلیا۔ رستہ وچ انصار دی اک جماعت نوں نماز پڑھدے ہوئے پایا۔ اوس بندے نے اوہناں اَگے ایہہ حدیث بیان کیتی تے اوہ لوک سندے ای بیت اللہ ول پھر گئے۔
اللہ تعالیٰ سانوں نبی کریمۖ دیاں سنتاں اتے عمل کرن اوہناں نوں پھیلان تے اوہناں لئی کم کرن والیاں دی مدد کرن دی توفیق عطا فرماوے۔ آمین