خانہ جنگی دا خطرہ؟

مظہر برلاس

فواد چوہدری نے مسلط کیتے گئے نااہل حکمراناں دی نکام حکمت عملی دا تذکرہ کردے ہوئے بدترین حالات دی تصویر کشی کیتی اے اجہے ای کجھ خدشات دا اظہار ڈاکٹر فہمیدہ مرزا نے وی کیتا اے۔ ایہدے وچ کوئی شک نہیں کہ حالات بد توں بدترین ہوندے جا رہے نیں ہر آن والا دن نحوست وچ وادھے دا کارن بن رہیا اے۔ موجودہ حکومت دے نااہل کرداراں نے چپ وٹ رکھی اے لوکاں دا جلوس نکل گیا اے جد کہ ساڈی اسٹیبلشمنٹ چپ تماشائی بنی ہوئی اے۔ شاید ایہدی وڈی وجہ ایہ ہووے کہ موجودہ حکمران ٹولے نوں اقتدار وچ لیان دا سہرا کسے ہور دے سر نہیں سگوں اوہناں لوکاں دے سر اے جو ملکی بہتری لئی فیصلے کرن دا راگ الاپدے نیں۔ تیراں جماعتاں دا ٹولا اکٹھا تے کر لیا گیا پر کسے نے ایہ نہیں سوچیا کہ ایہ تیراں تے اوہو نیں جہناں نے ایس ملک دا چہرہ داغ دار کیتا سی ایہناں داغاں وچ کرپشن’ اقرباپروری’ قرضیاں دی معاف’ لٹ مار’ کمیشن خوری تے منی لانڈرنگ سنے کئی ہور نمایاں داغ نیں پر ایتھے ملک لئی کون سوچدا اے ایتھے تے وقتی فائدے سوچے جاندے نیں۔ بڑی عجیب گل اے کہ پاکستانی اسٹیبلشمنٹ نے کدی لوکاں دا تے سوچیا ای نہیں’ ایہناں دیاں نظراں عوامی مفاد ول جاندیاں ای نہیں۔ جے عوام پیارے ہوندے تے ایہ سب ہوندا؟ جو ہو رہیا اے ایہنوں کوئی روکن والا ہوندا۔
زیادہ پرانی گل نہیں صرف دس مہینے پہلاں دی گل اے ایتھے لنگرخانے ہوندے سن جس کسے نوں کھانا نہیں سی ملدا اوہ ایہناں لنگرخانیاں چوں کھانا کھا لیندا سی۔ نگرانی دا ایہ عالم سی کہ ایہناں لنگرخانیاں تے دتے جان والے کھانے نوں چیک کرن لئی وزیراعظم آپ اپڑ جاندا سی۔ اک طرح نال مسافراں توں علاوہ غریباں نوں وی کھانا ملدا سی پر ہن آٹا ای نایاب ہو گیا اے’ آٹے تے لڑائیاں ہو رہیاں نیں۔ حالات ایہہ ہو گئے نیں کہ آٹے دا اک ٹرک آندا اے لوکاں دا بہت وڈا جلوس اوہدے پچھے ہوندا اے ہتھاں وچ نوٹ پھڑے ہوئے لوک ویکھدے رہ جاندے نیں تے اوہ ٹرک کدھرے ہور نکل جاندا اے۔ سندھ تے بلوچستان دے کئی شہراں وچ اجہے منظر ویکھن نوں ملے نیں کہ روح کنب گئی اے۔ انسانیت شرما گئی اے’ بچے بلک رہے نیں تے حکمران ٹس توں مس نہیں ہو رہے۔ آٹے دے منتظر لوکاں دیاں لائناں لگیاں ہوئیاں نیں سارا سارا دن ایس ملک دیاں عورتاں’ ایتھوں دے بزرگ ہتھاں وچ پیسے پھڑے آٹے دا انتظار کردے رہندے نیں ایس ملک نوں کیہ بنا دتا گیا اے جتھے سال پہلاں لنگرخانیاں وچ عزت دے نال مفت کھانا ملدا سی اوتھے ہن ذلت دے نال آٹا وی نہیں ملدا’ مہنگا آٹا وی لوکاں نوں نہیں مل رہیا لوک ذلت دی فوٹو بن گئے نیں کل اک ویڈیو ویکھن نوں ملی’ اک عورت ہتھاں وچ خالی برتن لئے غربت دا رونا رو رہی سی کہہ رہی سی ایس توں چنگا اے انسان مر جاوے۔ کاش ایس غربت عورت دی ایہ ویڈیو اوہ لوک ویکھ لین جو آڈیو ویڈیو دا کاروبار کردے نیں جو قوم نوں ایہو دھندا وکھانا چاہندے نیں۔
گل صرف آٹے دی نہیں’ گل عزت تے غیرت دی وی اے۔ کدھرے گیس نہیں تے کدھرے بجلی نہیں’ ادھی توں ودھ فیکٹریاں بند ہو چکیاں نیں جو چل رہیاں نیں اوہ وی ہچکولے لے رہیاں نیں۔ تیراں جماعتاں دے وڈے تجربے کار لوک برے طریقے نال ننگے ہوئے نیں تے خوجہ آصف تے ہور برے طریقے نال کہ اوہناں دا دفاع آبادی تک آ گیا اے ملک دا وزیر داخلہ خزانے دیاں گلاں کر رہیا اے تے وزیراعظم روز کوئی نواں لطیفہ سنا دیندا اے اوہناں دے کپڑے تے پتہ نہیں وکے یاں نہیں پر لوکاں دے کپڑے لہہ گئے نیں۔ بیروزگاراں دی گنتی وچ سمندراں ورگا وادھا ہوندا جا رہیا اے۔ ایہو ملک سی کہ اک ورھے پہلاں فیصل آباد وچ پاور لومز نوں دو لکھ مزدوراں دی کمی دا سامنا سی اج اوہو لومز بند ہو رہیاں نیں۔ کپڑے دے وڈے وڈے آرڈر کینسل ہو رہے نیں ساڈے ملک دے وڈے بزنس میناں نوں دوجے ملک ویزہ وی نہیں دے رہے۔ دنیا بھر وچ کاروبار کرن والے ساڈے کاروباری حضرات نال گل بات نہیں کر رہے۔ ایل سیز نہیں کھل رہیاں’ مارکیٹ وچ دوائیاں وی ختم ہوندیاں جا رہیاں نیں ایہناں دوائیاں وچ زندگی بچان والیاں دوائیاں وی نیں۔ کاروبار ٹھپ ہو گیا’ بیروزگاری پھیل گئی اے کسان مجبور ہو چکیا اے۔ غریب بندہ پس گیا اے’ مڈل کلاس دیاں ساہواں اکھڑ گئیاں نیں’ کاروباری طبقہ پریشان اے۔ ہر پاسے خوف دیاں لہراں نیں’ ناامیدی دے لمے سائے نیں’ زندگی بھکھ دی کشتی تے سوار اے تے ایہ کشتی موت دی بے رحم لہراں دے دوش تے اے ایہ لہراں کسے نوں وی اپنی لھویٹ وچ لے سکدیاں نیں۔ سامنے خانہ جنگی اے پر حکمراناں نوں نظر نہیں آ رہی۔ ہر پاسے نحوست کھلری ہوئی اے کوئی گلی’ کوئی شہر نحوست توں خالی نہیں۔ بقول ناصربشیر
ناصر بشیر کس کی نظر گھر کو کھا گئی
سایہ سا بچھ گیا میرے آنگن میں خوف کا