کامیڈی کنگ ہنی البیلا دی ایف ایم 99.4پنجاب رنگ آمد

پنڈی( پنجابی میڈیاگروپ)کامیڈی کنگ،سٹیج،ٹی وی تے کامیڈی شوز وچ شہرت پاون والے ہنی البیلا تے سٹیج دے اُبھردے ہوئے ستارے شجر عباس ہوراں دی ایف ایم 99.4 پنجاب رنگ پنڈی آمد اُتے نامور ادیب امین کنجاہی،اسٹیشن ڈائریکٹر ناصر احمد،براڈکاسٹ ٹیکنیشن سید عماد تابش تے پنڈی ویمن یونیورسٹی دیاں طلبعلماں نے پُھل پیش کر کے پروہنیاں دا استقبال کیتا۔ایس موقعے تے ہنی البیلا تے شجر عباس ہوراں پنڈی وچ ایف ایم پنجاب رنگ99.4دی کامیاب نشریات تے ایف ایم دی ٹیم خاص کر ڈی جی پلاک ڈاکٹر صغرا صدف دیاں کوششاں نوں سراہیا۔ہنی البیلا ہوراں گل بات کردیاں آکھیا کہ میں اپنے والد لیجنڈری کامیڈین تے اداکار اختر حسین البیلا صاحب ہوراں توں متاثر ہو کے اداکاری دے میدان وچ پیر رکھیا۔ اوہ میرے رول ماڈل نیں۔اہناں ہور دسیا کہ ریس کورس پارک لہور وچ اک لائیو پرفارمنس نال کیرئیر دا آغاز کیتا۔ پی ٹی وی دے ڈرامے’’عینک والا جن‘‘وچ’’تایا ابو‘‘دے کردار توں باقاعدہ اداکاری دا مڈھ بنیا۔ ایہدے توں بعد سٹیج تے ٹی وی لئی بڑا کم کیتا۔اہناں ہور دسیا کہ سٹیج تے کامڈی شوز دوناں وچ پرفارم کرن لئی بھرپور لگن تے محنت دی لوڑ ہوندی اے۔اوہناں دے مشہور کامیڈی شوز وچ خبرناک،گستاخیاں،جی سرکار تے زبردست نمایاں نیں۔اوہناں ہور آکھیا کہ حال وچ اوہناں اک پنجابی فلم وچ کم کیتا اے جیہڑی اپریل تک ریلیز ہو جاوے گی۔ شجر عباس ہوراں اپنے خیالات دا اظہار کردیاں آکھیا کہ میں ایس فیلڈ وچ اپنے والد صاحب سحر عباس دی موٹیویشن پاروں آیا،فیر میری خوش قسمتی سی کہ مینوں ہنی البیلا جیہے اُستاداں توں سیکھن دا موقع ملیا۔اہناں ہور دسیا کہ سٹیج ڈرامیاں توں ہٹ کے ذاتی زندگی وچ وی میں بڑا ہنس مکھ تے زندہ دل ہاں۔شجر عباس ہوراں ہور آکھیا کہ پلاک تے پنجاب رنگ99.4 دی پنجابی زبان تے رہتل بہتل دے وادھے لئی خدمتاں قابل ستائش نیں۔ہنی البیلا ہوراں ہور آکھیا کہ میں جنا وی پرفارم کیتا ایہہ میرے ربّ دے کرم تے اوہدی عطا نال ممکن ہویا۔اوہناںنویں سکھن والیاں نوں مشورہ دتا کہ کسے وی مقصد دی کامیابی وچ مڈھلا پیر اپنے وڈیاں تے ماپیاں دا دل و جاں نال احترام کرنا اے۔ایس موقعے تے منے پرمنے شاعر شریف کنجاہی ہوراں اپنے شعراں نال خوب محفل جمائی تے داد وصول کیتی۔