پرویز کلیم نے فلم رنگ عشقے دا نوں امر کر دتا

پچھلے دس دناں توں منفرد مصنف ہدایتکار پرویز کلیم دی فلم ”رنگ عشقے دا” دے متعلق فلم انڈسٹری وچ مختلف چہ مگوئیاں گردش کر رہیاں نیں۔ ایہہ انج ای اے کہ کسے مصور نے اپنی کاوش وچ چوراہے رکھ دتی کہ اوہدے وچ غلطیاں دی نشاندہی کرو۔ اگلے دن فارغ ویلے تنقید نگاراں دی ساری کاوش ای کالی ہو چکی سی۔ دُوجے دن اوہنے لکھیا کہ پلیز ایہنوں صحیح کرن لئی تصحیح فرمائو تے کوئی وی نہیں آیا۔ ایتھے میں عرض کر دینا واں کہ فلم عوام لئی بنائی جاندی اے نہ کہ فلم لائن لئی چار دہائیاں توں ایہہ سلسلہ جاری اے۔ دنیا کتھوںدی کتھے چلی گئی مگر فلم نگر وچ اج وی چنگیاں چنگیاں فلماں اتے تنقید دا سلسلہ جاری اے۔ نہ جانے کدوں ساڈے وچ اک دوجے دی چیز نوں سراہن دا جذبہ بیدار ہووے گا۔ پرویز کلیم فلم دی ساری باریکیاں نوں جاندے نیں تے اک مستند تجربہ کار مصنف ہدایتکار نیں جہناں دے سوہنے مکالمیاں دا اعتراف ناصر ادیب وی محفلاں وچ کر چکے نیں تے بازار حسن دے مکالمیاں اتے سو دے نوٹ اتے لکھ کے دے چکے نیں۔ فلم ڈیڑھ کروڑ توں ودھ بزنس کر چکی اے تے ورلڈ دے بہت سارے ملکاں وچ اجے ایہدی نمائش ہونا باقی اے۔
”رنگ عشقے دا” پنجاب کلچر اتے اک بہت وڈی دستاویز اے۔ بندہ ناچیز تے ایتھوں تک کہندا اے کہ عشق دے موضوع اتے فلم بنان والے فلم میکر لئی ایہہ فلم اک اکیڈمی دی حیثیت رکھدی اے۔ ایہدا پریمیئر شو ویکھن مگروں میں ہدایتکار باسو چودھری نوں کہیا سی کہ تسیں ایہنوں لیجینڈ آف ہیر رانجھا وی کہہ سکدے او۔ زمانہ بھر وچ مقبولیت حاصل کرن والی یونیک فلم ہیر رانجھا نوں ٹچ کرن لئی کلیم جی جیا مہان تخلیق کار ای رسک لے سکدا سی۔ اوہ وی ٹوٹلی نیو کاسٹ دے نال تے ایہہ اوہناں دا پہلا قدم نہیں سی اوہ گناہ’ ننگے پائوں سجدہ’ عینک والا جن جئی درجناں فلماں وچ انج دے تجربے کر چکے نیں تے کامیاب وی رہے۔ اج وی ادھے درجن دے کول سپر سٹار اوہناں دی کاوش وچ شمار ہوندے نیں جہناں وچ سعود’ فیصل قریشی’ محسن گیلانی سرفہرست نیں۔ تقریباً پندرہ سال مگروں موسیقار ذوالفقار علی تے نغمہ نگار خاقان حیدر غازی دے سنگم نال اک یادگار موسیقی دا گلدستہ عوام نوں پیش کیتا اے جہدا ہر گیت لاجواب اے تے کلیم جی نے سوہنی لوکشیناں دا انتخاب کر کے فلم ہیر رانجھا دی یاد دوا دتی۔ فلم دی کاسٹ وچ مدیحہ شاہ نے منصف مزاج چوہدرانی دا سوہنا کردار کر کے اوہنے مجاجن دے کردار توں اک ہتھ اگے قدم ودھایا اے تے حقیقی لیجینڈ فنکاراں دی صف وچ کھڑی نظر آئیاں نیں۔ زاریہ لکھی دے کردار وچ نہایت کامیاب نظر آئی جہدی ابتدا ایہہ اے اوہ لازمی آن والے کل وچ پاکستان دی صف اول دی فنکارہ ثابت ہون گئیاں۔ آمنہ راہی تے عباس سید نے اپنے اپنے کردار وچ جان پا کے کدی وی اپنے نوے ہون دا شبہ نہیں ہون دتا بلکہ منجھے ہوئے رومانٹک عشق وچ ڈبے جوڑے دا کردار کر کے فلم نوں امر کردتا۔ نغمہ بیگم متاثر کرن توں قاصر نظر آئیاں۔ اچھی خاں دے کردار نے فلم نوں ٹرن پوائنٹ دتا تے کیدو دے کردار وچ دو تِن کلیپ لین وچ کامیاب ہوگئے جد کہ اوہناں توں پہلاں اوہ منجھے ہوئے فلم دے ورسٹائل اداکار ایہناں کرداراں وچ پرفارمنس دی لکیر کھچ چکے سن مگر اوہناں نے ماڈرن کیدو وچ عوام نوں متاثر کیتا۔ آمنہ دے ولن نوں جہڑا گیٹ اَپ دتا گیا اوہ چنگا نہیں سی۔ جے ایس فنکار نوں گیٹ اپ دے بغیر کروایا جاندا تے وی اوہ چنگا ای کردا۔ میجر چیز جہڑی فلم وچ ڈسٹرب کردی اے اوہ مدیحہ شاہ دے مقابل جہڑے فنکار نوں کاسٹ کیتا گیا گو کہ اوہنے چنگی پرفارمنس دتی مگر جے ایتھے بابر علی یا ایسے ہائیٹ دا کوئی دوجا فنکار کاسٹ کیتا جاندا تے سونے اتے سہاگہ سی۔ میری رائے دے مطابق جے ورسٹائل اداکار افتخار ٹھاکر نوں آمنہ دے ولن دا کردار دتا جاندا تے اوہ زبردست پرفارم کردے۔ کامیڈی ورژن جہڑا وکھرا بنایا گیا اوہدے وچ ساریاں نے چنگا پرفارم کیتا۔ ہن گل کرنے آں فلم دے فلمساز ڈاکٹر کاشف دی جہناں نے کراچی توں تشریف لیا کے پنجابی فلم بنائی جہڑے کہ خود اہل زبان نیں۔ ایہہ بہت وڈی گل اے تے اسیں اوہناں دے ایس جذبے نوں سراہنے آں۔ سب توں وڈی گل ایہہ اے کہ اوہناں نے بڑے شوق نال فلم بنائی تے اوہنوں خوب توں خوب بنان وچ کوئی کسر نہیں چھڈی۔ مجموعی طور تے رنگ عشقے دا نے اک واری فیر ثابت کردتا کہ سارے رنگاں اتے عشق دا رنگ ہر دور وچ امر اے۔