کوہاٹ :کشتی ڈوبن نال مدرسہ دے11چراغ بُجھ گئے

کوہاٹ(پنجابی میڈیاگروپ)کوہاٹ دے معروف تے سب توں وڈے ڈیم’’تاندہ ڈیم‘‘ وچ کشتی اُلٹ کے ڈوبن دے نتیجے وچ دینی مدرسہ دے درجناں طالبعلم ڈوب گئے جنہاں وچ17 طلبعلماں نوں کَڈ لیا گیا جدکہ باقی دی تلاش لئی ریسکیوآپریشن جاری اے۔ ایس المناک سانحہ وچ کئی بدقسمت خانداناں دے 11چشم و چراغ گل ہو کے ابدی نیند سوگئے جدکہ5 ہوراں دی حالت وی انتہائی تشویش ناک دَسی جاندی اے جنہاں نوں انتہائی نگہداشت وارڈ وچ داخل کرادتا گیااے۔ پُلس ترجمان تے مقامی ذرائع دے مطابق کشتی وچ25 دے لگ بھگ طالبعلم سوارسن جنہاں وچ ہُن تک17 طلبعلماں نوں ریسکیو کرلیا گیا اے جدکہ باقیاں نوں کَڈن لئی آپریشن جاری اے۔ ریسکیو1122 توں موصولہ ابتدائی اطلاع تے ہور آزاد ذرائع مطابق ایہ المناک حادثہ اتوار دی صبح تقریباً9 وجے کوہاٹ شہر دے نواح وچ واقع معروف تے سب توں وڈے آبی ذخیرہ تاندہ ڈیم وچ اوس ویلے پیش آیا جَد نیڑے دے علاقہ میر باش خیل دے اک دینی مدرسہ دے درجناں طالبعلماں مبینہ طور اُتے اک کشتی وچ سیر و تفریح لئی سوار سن کہ ڈیم دے وسط وچ پہنچ کے کشتی دا توازن وِگڑگیا تے اُلٹ کے گہرے پانی وچ ڈوب گئی جس نال کشتی وچ سوار سارے طالبعلم ڈوب گئے۔