پی آئی اے ہیڈ آفس کراچی توں اسلام آباد منتقل کرن دا فیصلہ

اسلام آباد: ایوی ایشن ڈویژن نے قومی فضائی کمپنی پاکستان انٹرنیشنل ایئر لائنز (پی آئی اے) دا صدر دفتر کراچی توں اسلام آباد منتقل کرن دا فیصلہ کیتا اے۔ ذرائع ایوی ایشن ڈویژن دے مطابق پی آئی اے ہیڈ آفس دا اسلام آباد منتقلی بارے فریم ورک تیار کر لیا گیا اے تے ایہنوں بے نظیر بھٹو ایئر پورٹ ٹرمینل منتقل کیتا جاوے گا۔ سول ایوی ایشن اتھارٹی بے نظیر بھٹو ایئر پورٹ دی پارکنگ نوں کمرشل استعمال وچ لیان تے وی غور کر رہی اے پر ‘ڈیلٹا ٹیکسی جنرل ایوی ایشن رن وے’ پاکستان ایئر فورس دے کول ای رہوے گا۔ ایس حوالے نال پاکستان ایئر فورس تے ایوی ایشن ڈویژن وچکار معاملات حتمی مرحلیاں وچ داخل ہو گئے نیں تے حتمی پلان وزیراعظم عمران خان نوں منظوری لئی جلد بھجوایا جاوے گا۔ امکان ایہو اے پی آئی اے ہیڈ آفس ایس ورھے اسلام آباد منتقل کر دتا جاوے گا۔