اسمبلیاں ٹُٹن مگروں!

سعد اختر

دونویں صوبائی اسمبلیاں ٹٹن مگروں پنجاب تے کے پی کے وچ نگران حکومتاں وجود وچ آ چکیاں نیں۔ خیبر پختوانخوا وچ نگران وزیراعلیٰ اعظم خان نوں الیکشن کران تے صوبہ چلان دی ذمہ واری سونپی گئی اے جد کہ پنجاب وچ ایہہ ذمہ واری محسن نقوی دے سپرد کیتی گئی اے جو دو نیوز چینلاں دے مالک نیں۔ خیبر پختوانوا وچ اعظم خان دا انتخاب سبکدوش ہون والی صوبائی حکومت تے اپوزیشن نے باہمی مذاکرات تے گفت و شنید مگروں کیتا اے۔ اعظم خان پچھلے بیوروکریٹ نیں جد کہ صوبے وچ بڑی چنگی شہرت دے حامل نیں۔ خوشی دا مقام اے کہ اوہناں دے نام اتے کسے وی فریق نے کوئی اعتراض نہیں کیتا۔ نا ہی اوہناں نوں کسے حوالے نال تنقید دا نشانہ بنایا گیا اے۔ تاہم خیبر پختونخوا دے برعکس پنجاب وچ محسن نقوی دی بطور نگران وزیراعلیٰ تعیناتی اتے بہت زیادہ ابہام پایا جاندا اے۔ تحریک انصاف دے چیئرمین عمران خان تے پی ٹی آئی دے دُوجے رہنماواں وَلوں محسن نقوی دے انتخاب نوں مسلسل تنقید دا نشانہ بنایا جا رہیا اے۔ واضح رہوے کہ سبکدوش ہون والی پنجاب حکومت تے پی ٹی آئی نے مشترکہ طور تے نگران وزیراعلیٰ لئی دو نام تجویز کیتے سن جد کہ اپوزیشن ولوں وی جو دو نام سامنے آئے اوہناں وچ اک نام احد چیمہ تے دُوجا محسن نقوی دا سی تاہم اوہناں دوناں ناماں اتے حکومتی پنجاب نے پیش کیتے۔ اپوزیشن نے وی اوہناں نوں رد کردتا۔ انج رولز دے مطابق نگران وزیراعلیٰ دے انتخاب لئی سارے نام اسمبلی دی پارلیمانی کمیٹی دے سپرد کردتے گئے۔ مگرایتھے وی کسے نام اتے اتفاق نہیں ہو سکیا۔ ایس طرحاں ایہہ معاملہ الیکشن کمیشن دے کول چلا گیا۔ حتمی اختیار اوہدا سی کہ اوہ ایہناں ناماں وچوں کسے اک نام دا انتخاب پنجاب دے نگران وزیراعلیٰ لئی کرے۔ جیویں ای حکومتی بنچ تے اپوزیشن وَلوں چاروں نام الیکشن کمیشن آف پاکستان دے کول پہنچے۔ اوہناں نے ایہناں چاراں ناماں وچوں بالآخر اک نام دا انتخاب کر لیا۔ ایہہ نام سی محسن نقوی دا۔ جیویں ای محسن نقوی دا نام سامنے آیا۔ پی ٹی آئی ولوں اوہناں اتے تنقید دے نشتر چلن لگے۔ پچھلے وزیراعلیٰ پنجاب چودھری پرویزالٰہی نے تے ایتھوں تک کہہ دتا کہ اوہ محسن نقوی دی تعیناتی نوں ہائیکورٹ وچ چیلنج کرن گے فیر اوہدے مگروں محسن نقوی اتے الزاماں تے تنقید دا لامتناہی سلسلہ شروع ہو گیا۔
عمران خان کھل کے بولے تے کہیا کہ الیکشن کمیشن نے محسن نقوی دی صورت وچ پنجاب دے نگران وزیراعلیٰ لئی اک ایسے شخص دا انتخاب کیتا اے جو پی ٹی آئی لئی کینہ و بغض رکھدا اے۔ نیز محسن نقوی دے دونویں چینل وی پی ٹی آئی تے اوہناں دے خلاف زہر اُگلدے رہندے نیں۔ اوہناں نے ایہہ وی الزام لایا کہ محسن نقوی اپوزیشن دے خاص بندے نیں۔ آصف علی زرداری اوہناں نوں اپنا پتر کہندے نیں جد کہ اوہناں دے ہوندے ہوئے صاف شفاف انتخابات دی توقع نہیں کیتی جا سکدی۔ سارے الزاماں تے تنقید دے باوجود محسن نقوی پنجاب دے وزیراعلیٰ دے عہدہ اتے براجمان ہو گئے نیں۔ اوہناں نے گورنر ہائوس وچ حلف چکیا جہدے مگروں اوہناں دی گیارہ رکنی کابینہ وی حلف چک چکی اے۔ الیکشن کران دی ذمہ واری الیکشن کمیشن آف پاکستان دی اے جد کہ نگران حکومت دی ذمہ واری ایہہ اے کہ اوہ الیکشن لئی پرامن ماحول مہیا کرے تے لاء اینڈ آرڈر نوں یقینی بنائے۔ پنجاب دی نگران حکومت جہدے وزیراعلیٰ اتے بہت سارے سوال اٹھ گئے نیں تے سبکدوش ہون والا پی ٹی آئی تے ق لیگی اتحاد محسن نقوی دی تعیناتی اتے مطمئن نہیں۔ بہتر ہوندا کہ پنجاب وچ کسے غیر متنازعہ شخصیت دا انتخاب بطور نگران وزیراعلیٰ ہو جاندا۔ بظاہر محسن نقوی دے انتخاب وچ کوئی قنونی قباحت تے ابہام نہیں۔ تاہم پی ٹی آئی نے محسن نقوی دے ایس انتخاب نوں سپریم کورٹ وچ چیلنج کردتا اے۔ سپریم کورٹ نے ریلیف نہ دتا تے محسن نقوی نوں برداشت کرن دے سوا پی ٹی آئی دے کول کوئی ہور چارہ نہیں ہووے گا۔
ایہہ خبر وی کئی حلقیاں وچ زیر گردش اے کہ پنجاب تے کے پی کے وچ 90دناں وچ ہون والے انتخابات چھ یا ست مہینیاں لئی اگے چلے جان گے۔ ایس التوا لئی وفاق وچ حکومتی اتحاد سر جوڑ کے بیٹھ گیا اے۔ اوہناں وچ حالیہ چند دناں وچ ایس حوالے نال کئی نشستاں ہو چکیاں نیں۔ مولانا فضل الرحمن تے آصف علی زرداری نے ہفتہ پہلاں پرائم منسٹر ہائوس وچ میاں شہباز شریف دے نال اک لمی ملاقات کیتی۔ ذرائع دسدے نیں کہا یس ملاقات وچ طے پایا کہد ونویں صوبیاں وچ اپریل وچ ہون والے الیکشن ملتوی کئے جان۔ ایہدے لئی آئینی رستے لبھے جا رہے نیں۔ الیکشن کمیشن آف پاکستان نوں ایس حوالے نال کہیا جاوے گا کہ اوہ ڈیجیٹل مردم شماری تے حلقہ بندیاں دے نام تے دونویں صوبیاں دے الیکشن نوں چھ مہینیاں لئی ملتوی کر دیوے۔
ملک وچ ایس ویلے جو خراب معاشی تے اقتصادی صورتحال چل رہی اے۔ میں شہباز شریف تے اوہناں دی اتحادی جماعتاں سمجھدیاں نیں کہ ایسے حالات وچ اوہناں لئی الیکشن وچ جانا کسی طرحاں وی درست فیصلہ نہیں ہووے گا۔ مہنگائی دے ہتھوں لوک حد درجہ پریشان تے بدحال نیں انج اوہناں نوں ووٹ کو دیوے گا؟
میاں شہباز شریف تے اوہناں دے اتحادی سمجھدے نیں تے اوہناں نوں امید اے کہ اوہ چھ ست مہینیاں تک ملک دی معاشی صورتحال نوں سنبھالن وچ کامیاب ہو جان گے جہدے مگروں الیکشن وچ جانا اوہناں لئی بوہتا آسان ہووے گا۔ آئی ایم ایف دا اک وفد وی پاکستان دے دورے اتے اے۔ حکومت پرامید اے کہ اوہناں نوں آئی ایم ایف ولوں قرضے دی پہلی قسط جاری ہو جاوے گی۔ خزانے وچ ڈالر آندی ای ملک دے اقتصادی حالات بہتر ہونا شروع ہو جان گے۔ ویکھدے نیں آن والے مہینیاں وچ کیہ ہوندا اے تے سیاست کیہ گل کھلاندی اے۔ نتائج برعکس آن تے کیہ عمران خان دوبارہ سڑکاں اتے نہیں ہون گے؟ ملک دے معاشی حالات جو پہلے ای بہت دگرگوں نیں ہور وی بوہتا خراب ہوندے نظر نہیں آن گے۔