عام بندے تے بھار پان دی اجازت نہیں دتی جاوے گی: وزیراعظم

اسلام آباد: وزیراعظم عمران خان آکھیا اے عام بندے تے بھار پان دی اجازت نہیں دتی جاوے گی۔ وزیراعظم عمران خان دی زیر صدارت ریاستی ملکیتی اداریاں دی کارکردگی وچ بہتری دی غرض نال لئے جان والے اقدامات دے حوالے نال جائزہ اجلاس ہویا، جہدے وچ وزیر توانائی عمر ایوب خان، وزیر برائے منصوبہ بندی اسد عمر، وزیر برائے نجکاری میاں سومرو، وزیر برائے ہوابازی غلام سرور خان، مشیر خزانہ ڈاکٹر عبدالحفیظ شیخ، مشیر تجارت عبدالرزاق داود، معاون خصوصی برائے اطلاعات ڈاکٹر فردوس عاشق اعوان، معاون خصوصی ندیم بابر تے سینئر سرکاری افسران اجلاس وچ شریک ہوئے۔

اجلاس وچ وزارت پٹرولیم تے توانائی ولوں پچھلے 18مہینے وچ ذیلی اداریاں وچ انتظامی ڈھانچے وچ اصلاحات، وزارت توانائی تے پٹرولیم نوں درپیش مسئلیاں تے اوہناں دے حل لئی زیر غور تجاویز تے بریفنگ دتی گئی، محصولات وچ وادھے تے ایہناں اداریاں دی مجموعی کارکردگی وچ بہتری دے ضمن وچ لئے گئے اقدامات توں آگاہ کیتا گیا۔

وزیراعظم عمران خان دا کہنا سی توانائی دے شعبے وچ درپیش مسئلیاں تے قابو پان لئی موجودی حکومت روز اول توں ای ہنگامی بنیاداں تے اقدامات لے رہی اے، توانائی دے شعبے وچ سنگین انتظامی مسئلے ورثے وچ ملے، ایہدے باوجود ساڈی اولین ترجیح رہی اے ایہناں مسئلیاں دی وجہ توں عوام الناس تے گھٹ توں گھٹ بھار پوے۔

وزیراعظم آکھیا کرپشن تے نااہلی نے نظام دی بنیاداں نوں کمزور کر دتا اے، بجلی و گیس دی چوری وچ ملوث عناصر نوں عوام دی مدد نال قنون دی گرفت وچ لیایا جاوے اوہناں نوں سزا دتی جاوے گی، صرف انتظامیہ دی سطح تے تبدیلیاں موجودہ صورتحال دے پیش نظر ناکافی ہون گیاں عام بندے تے بھار پان دی اجازت نہیں دتی جاوے گی۔