عدالت نے شیخ رشید نوں مری پلس دے حوالے کردتا

اسلام آباد(پنجابی میڈیاگروپ)اسلام آباد دی مقامی عدالت نے سربراہ عوامی مسلم لیگ تے سابق وفاقی وزیر داخلہ شیخ رشید نوں اک دن دی راہداری ریمانڈ اُتے مری پلس دے حوالے کردتا ۔ شیخ رشید نوں اسلام آباد وچ ڈیوٹی مجسٹریٹ رفعت محمود خان دی عدالت وچ پیش کیتا گیا جیتھے دوران سماعت وکیل شیخ رشید نے آکھیا کہ مری پلس ولوں راہداری ریمانڈ دی استدعا پہلاں ہی مسترد ہوچکی اے، شیخ رشید کِدھرے نٹھے نہیں جارہے،حراست وچ نیں۔ایس اُتے عدالت نے مری پلس توں استفسار کیتا کہ کیا پہلی وار راہداری ریمانڈ دی استدعا کر رہے نیں؟ جس اُتے تفتیشی افسر نے آکھیا کہ پہلی وار راہداری ریمانڈ دی استدعا کیتی اے، ایس توں پہلاں نہیں کیتی۔بعدازاں عدالت نے پلس ولوں راہداری ریمانڈ دی درخواست اُتے فیصلہ سنادیاں ہویاں شیخ رشید نوں اک دن دے راہداری ریمانڈ اُتے پلس دے حوالے کردتا۔ایس توں پہلاں عدالت پیشی دے موقع اُتے میڈیا نال غیر رسمی گل بات کردیاں ہویاں سربراہ عوامی مسلم لیگ شیخ رشید نے آکھیا کہ اج تک کسی نے میرے توں موجودہ مقدمیاں دی تفتیش نہیں کیتی، مینوںہمیشہ سیاسی گل کیتی جاندی اے، ایہ عمران خان نوں نااہل کروان دا فیصلہ کر چکے نیں۔اوہناں نے آکھیا کہ ایہ پی ٹی آئی اندر توں اک ہور پارٹی بنانا چاہندے نیں، مینوں وی اوہ ایہی کہہ رہے نیں کہ عمران دا ساتھ چھڈو، ایہ عمران خان نوں کسی صورت نہیں آن دین گے، باہر توں3لوگ جیل وچ مینوں ملن آئے، جَد کوئی ملن آندا تے اکھاں اُتے پٹی تے ہتھ باندھ دتے جاندے نیں۔