مودی دا بھارت نوں ہندوملک بنان دا منصوبہ بے نقاب

واشنگٹن( پنجابی میڈیاگروپ)معروف امریکی اخبار نیویارک ٹائمز نے مودی دا ہندوستان نوں ہندو ملک بنان دا منصوبہ بے نقاب کر دتا۔عالمی میڈیا نے بھارت وچ ودھدی انتہا پسندی اُتے خطرے دی گھنٹی وجا دتی،بی بی سی توں بعد نیو یارک ٹائمزوی مودی انتہا پسندی دے خلاف بول پئیا تے آکھیا کہ نہرودا سیکولر بھارت ہندو انتہا پسندی دی بھینٹ چڑھ گیا۔امریکی اخبار نیو یارک ٹائمز دے کالم وچ مودی سرکار نوں شدید تنقیددا نشانہ بنایا گیا، بی جے پی دے اقتدار وچ آن توں بعد بھارت وچ مذہبی شدت پسندی تے اقلیتاں دے خلاف رجحان شدید ودھے،مسلماناں دے خلاف جرائم اُتے سزا دا کوئی رواج نہیں۔رپورٹ وچ ایہ وی دعوی کیتا گیا کہ مودی سرکار نے جان بجھ کے مسلمان مخالف قنون بنائے، شہریت دے قنون دی تبدیلی تے کشمیر دے ناجائز غاصبانہ انضمام دا وی حوالہ دتا گیا۔لیڈیا پولگرین دے مطابق مودی ہندو انتہا پسند تنظیمRSS دا سر گرم رکن اے، مودی سرکار نے منظم انداز وچ آزادیِ اظہار اُتے کریک ڈاون کیتا، تنقیدی آوازاں نوں اَت گردی قنون نال دبایا گیا، میڈیا نوں کنٹرول کرن لئی ایمرجنسی پاورز دا سہارا لیا گیا، ہندو انتہا پسند ہمیشہ توں بھارت دی سیکولر آئینی حیثیت ختم کر کے ایس نوں ہندو ملک دا درجہ دینا چاہیندے نیں۔