عمران خان الیکشن مہم شروع کرن مخالفاں دیاں آپئی دوڑاں لگن گیاں :پرویزالٰہی

لہور(پنجابی میڈیاگروپ)سابق وزیر اعلی پنجاب چودھری پرویز الہی نے آکھیا اے کہ عمران خان دی مقبولیت دن با دن وَدھ دی جا رہی اے،اوہناں دے الیکشن مہم اُتے نکلدیاں ہی مخالفاں دیاں دوڑاں لگ جان گیاں، شہباز شریف دی نااہلی نے عوام ک نوں مہنگائی تے ہور مالی مشکلاں توں دوچار کیتا۔لہور وچ میڈیا نال گل بات کردیاں ہویاں چودھری پرویز الہی نے آکھیا کہ پنجاب وچ الیکشن دا بگل بج چکیا اے،الیکشن بارے آئین تے قنون دے مطابق عدالت دا فیصلہ وی آ گیا اے،الیکشن کمیشن فوری الیکشن دا شیڈول جاری کرے، پی ڈی ایم عوام اُتے مہنگائی دے جیہڑے کوڑے برسا رہی اے عوام الیکشن وچ ایس دا بدلہ چکان لئی تیار بیٹھی اے۔سابق وزیر اعلی پنجاب چودھری پرویز الہی نے ہور آکھیا اے کہ مسلم لیگ(ن)آئین نال کھیڈن توں باز رہے، آئین توں انحراف دی کوشش دے سنگین نتائج ہون گے، ہر ادارہ مقررہ ویلے وچ الیکشن دے انعقاد لئی الیکشن کمیشن دی معاونت دا پابند اے، نواز شریف ہُن واپس نہیں آن گے،(ن)لیگ نے کارکناں نوں لاریاں اُتے لایا ہویا اے۔اوہناں نے آکھیا کہ مسلم لیگ(ن)الیکشن توں خوفزدہ نہیں تے فیر حیلے بہانے کیوں؟اوہناں دا گورنر پنجاب الیکشن دی تریخ دین توں کیوں گریزاں اے؟ قوم ویکھ رہی اے کہ13جماعتاںالیکشن توں نٹھ رہیاں نیں، پی ڈی ایم دی حکومت نے ملک تے قوم نوں معاشی تباہی دے سوا کجھ نہیں دتا۔