ویلنٹائن ڈے!

اکرم عامر

دنیا بھر وچ قوماں دی غلامی وچ سب توں خوفناک قسم ذہنی غلامی اے جہڑی نسلاں مگروں قوماں دی تابہی دا کارن بندی اے۔ جدوں نسل نو وگڑ جاوے تے اوہدی آن والی ملت تے قوم تباہ و برباد ہو جاندیاں نیں۔ ایہدی وڈی وجہ دنیا وچ فرسودہ روایتاں دی بہتات اے جہنوں اسیں بغیر تحقیق دے پھیلانا شروع کر دینے آں۔ فیر اوہنوں اینا عروج اتے پہنچا دینے واں کہ اوہ قوماں دی راویت‘ رسم و رواج تے فیر ثقافت جئی محسوس ہون لگدیاں نیں۔ ایہناں وچ ویلنٹائن ڈے وی شامل اے جہڑا14 فروری نوں پاکستان سنے دنیا بھر وچ منایا جاندا اے۔ ایس دیہاڑ دی تشریح شروع کراں تے ایس حوالے نال بہت ساری روایتاں نیں جہڑی اک کالم وچ لکھنا ممکن نہیں۔ تاہم اک روایت اے کہ ویلنٹائن ڈے بت پرستاں دی رسم اے جہنے یورپ توں جنم لیتا۔ زمانہ قدیم وچ غیر شادی شدہ نوجوان منڈے کڑیاں اک تہوار منایا کردے سن۔ کڑیاں محبت دے خط لکھ کے گلدان وچ جہڑا لال گلاب دے پھلاں وچ رکھیا ہوندا سی پا دیندیاں سن۔ اوہنوں محبت دی لاٹری دا نام دتا جاندا سی۔ روم دے نوجوان منڈے اوس گلدان توں اپنی لاٹری کڈدے سن۔ جہڑی کڑی دے نام دا خط منڈے دے ہتھ لگدا اوہ منڈا اوس کڑی نال کجھ عرصہ مگروں دن دا تعین کر کے کورٹ وچ ویاہ کر لیندا۔ایس دوران ویاہ توں پہلاں پریمی جوڑے آپس وچ ہم آہنگی‘ راہ و رسم تے محبت نوں ودھان لئی ملاقاتاں کردے سن۔ ایہہ رسم ختم ہون دے بجائے ودھدی ای چلی گئی جہنوں سینٹ ویلنٹائن ڈے دا نام دے دتا گیا۔ ایس لعنت نے حالیہ کجھ ورھیاں وچ پاکستانی نوجوان نسل نوں بری طرح اپنی لپیٹ وچ لے رکھیا اے جہدی وجہ سوشل میڈیا‘ الیکٹرانک میڈیا تے پرنٹ میڈیا اتے ایس فرسودہ رسم دی بے جا تشہیر اے۔
جیویں جویں ایہہ دن کول آ رہیا اے‘ دنیا بھر وانگوں پاکستان وچ وی پریمی جوڑیاں تے عاشق مزاجاں نے ایس دن نوں منان لئی کئی دناں توں تیاریاں شروع کر رکھیاں نیں۔ چھوٹے وڈے شہراں وچ پھلاں بالخصوص لال گلاب‘ دل نا کھیڈونے‘ کارڈز‘ دل وانگوں بنے چاکلیٹ سنے ویلنٹائن ڈے اتے پریمی جوڑیاں لئی راحت و تسکین دا کارن بنن والی بہت ساری شیواں نوں دکانداراں نے سٹالاں دی صورت وچ سجاد تا اے۔جتھوں ایس دن نوں منان والے جوڑی وڈی تعداد وچ خریداری وچ مصروف نیں جہڑے خرید کردہ تحفے 14 فروری نوں اک دوجے نوں تقسیم کراں گے تے ویلنٹائن ڈے منان گے۔
موجودہ دور وچ ’’ہیر رانجھا‘ لیلہ مجنوں‘ سسی پنوں‘ شیری فرہاد‘‘ جئی محبت تے ناپید اے لیکن موجودہ دور وچ رسمی عشق و محبت تے ویلنٹائن ڈے جئی
فرسودہ روایتاں نے ملک دی نوجوان نسل بالخصوص تعلیمی اداریاں دے طلبا تے طالبات نوں بھیڑی طرحاں اپنے سحر وچ جکڑ رکھیا اے جہدے نتیجہ وچ کئی بھیانک واقعات وی رپورٹ ہوئے نیں۔ پچھلے سال دی گل اے جدوں لہور دے اک پرائیویٹ تعلیمی ادارے دے طالبعلم نے اپنی ہم جماعت کڑی نوں ’’پریم‘‘دے چکر وچ بغیر نکاح دے حاملہ کر دتا۔ صورتحال ایہہ سی کہ فقرے منڈے دے کول اسقاط حمل لئی وی پیسے نہیں سن تے کڑی نے یونیورسٹی فیس دے بہانے رقم اپنے گھر توں منگاوئی تے ایس رقم توں کڑی دا پرائیویٹ ہسپتال وچ اسقاط حمل کرایا جا رہیا سی کہ حالت وگڑ گئی۔ نوجوان کڑی نوں لے کے سرکاری ہسپتال جا رہیا سی کہ اوہدی موت واقعہ ہو گئی تے متذکرہ نوجوان کڑی دی لاش ہسپتال وچ بے یارومددگار سٹ کے فرار ہو گیا۔ ایہہ اوسے کڑی دی لاش سی جہنوں منڈے نے راہ و رسم ودھان دے دوران سہانے سفنے وکھائے ہون گے۔ پلس نے کڑی دی لاش چھڈ کے فرار ہون والے اسامہ نامی نوجوان دے علاوہ اسقاط حمل کرن والے پرائیویٹ ہسپتال دے عملہ سنے کئی افراد نوں حراست وچ لے لیتا اے۔ ایتھے قابل توجہ امرایہہ اے کہ ایس طرحاں دے پریمی جوڑیاں دے بغیر نکاح دے پیدا کردہ بچے ائے دن کسی نہ کسی شہر دے کچرے دے ڈھیر اتے زندہ ای مردہ پائے جاندے نیں جہناں نوں جانور نوچ رہے ہوندے نیں۔
انج دے واقعات دی اک وجہ کلمہ طیبہ دے نام تے بنن والی ریاست مدینہ پاکستان دے تعلیمی اداریاں وچ طلبا و طالبات دا مخلوط تعلیمی نظام‘ بے پردگی‘ دین توں دوری تے تاخیر نال بالاں دے ویاہ نیں جہدی وجہ نال ملک وچ انج دے خطرناک واقعات وچ خوفناک حد تک وادھا ہو چکیا اے کیوں جے نوجوان منڈے کڑیاں آپس وچ گپ شپ نال معاملہ دوستی تک ودھان مگروں بغیر نکاح جسمانی تعلقات وچ تبدیل کر لیندے نیں تے فیر کئی دوجے شہراں وچ لہور وانگوں کڑی دی میت نوں بے یارومددگار چھڈن جئے واقعات رونما ہوندے نیں۔
اللہ پاک نے مرد نوں جوان ہوندے ای اپنی نظراں تھلے رکھن تے زنانیاں نوں پردے دا حکم دتا اے تے زنایاں نوں نامحرم نال کسی قسم دے تعلقات توں منع کیتا گیا اے۔ والدین نوں منڈیاں تے کڑیاں دے نکاح وچ تاخیر نہ کرن دی ہدایت کیتی اے تے ایہہ وی کہیا اے کہ والدین اپنے بالاں دی دین اسلام دے احکامات دے مطابق تربیت تے پرورش کرن لیکن ساڈی ریاست تے عوام مادر پدر آزاد تے جدیدیت دی لعنت وچ مبتلا ہو کے اسلام تے اسلامی احکامات اتے عمل توں دور ہوندی جا رہیا ے جہدا خمیازہ وی سانوں بھگتنا پے رہیا اے تے آئے دن امت مسلمہ نویں نویں مسئلیاں دا شکار ہو رہی اے۔
گل کتھوں دی کتھے نکل گئی۔ گل ہو رہی سی ذہنی غلامی دی تے ویلنٹائن ڈے دی فرسودہ رسم نے یورپی ملکاں وانگوں امت مسلمہ نوں وی ایس دن دی ذہنی غلامی وچ مبتلا کردتا اے۔ ایہہ دن جہڑا 14 فروری نوں دنیا بھر وچ منایا جاوے گا دے حوالے نال کفار دے نال امت مسلمہ دی نوجوان نسل وی تیاریاں وچ مصروف اے تے لوڑ ایس امر دی اے کہ اسلامی ملکاں دے سربراہان ایس فرسودہ رسم و رواج اتے فوری طور تے پابندی عائد کرن تے ایس دن دے حوالے نال سامان دی فروخت نوں سرکاری طور تے ممنوع قرار دتا جاوے۔ ایس دن دے حوالے نال طرحاں دی تقریباں دا انعقاد کرن والیاں نوں قنون دی گرفت وچ لیایا جاوے۔
جے انج نہ کیتا گیا تے جنی شدت نال نوجوان نسل ویلنٹائن ڈے جئی فرسودہ روایت دی لت وچ مبتلا ہو رہی اے آن والے کجھ ورھیاں مگروں ایس لعنت اتے قابو پانااوکھا ہو گیا۔