کرونا وائرس دی روک تھام لئی نویں ٹیکنیکل ٹیم بنا دتی اے: یاسمین راشد

لہور: وزیر صحت پنجاب یاسمین راشد آکھیا اے کرونا وائرس دی روک تھام لئی نویں ٹیکنیکل ٹیم بنا دتی اے، جہڑی ہر چار گھنٹے بعد اپنی رپورٹ دیوے گی، صورتحال خراب ہوئی تے ایس ٹیم دی سفارشات تے عوامی اجتماعات تے سکول کالجز بند کرن تے غور کیتا جاوے گا۔

لہور وچ نیوز کانفرنس کردیاں یاسمین راشد دا کہنا سی کسے وی وباء دی صورتحال روزانہ تبدیل ہوندی اے، 82ملکاں وچ کرونا وائرس اپڑ چکیا اے، اٹلی، ایران، عراق، چین وچ کرونا دے کیسز زیادہ نیں۔ چین وچ 3ہزار توں ودھ موتاں ہو چکیاں نیں، چین وچ ہلاکتاں دی تعداد گھٹ، دوجے ملکاں وچ ودھ ہو گئیاں نیں، پاکستان وچ ہن تک چھ کیس ساہمنے آئے نیں، کرونا دا چھواں کیس کراچی توں رپورٹ ہویا۔

یاسمین راشد دا کہنا سی ایران توں آن والے 2500نوں قرنطینہ وچ رکھیا گیا اے، کرونا اک وائرل انفیکشن اے، انفیکشن بزرگ بندیاں تے بالاں نوں زیادہ متاثر کردا اے، یاسمین راشد دنیا بھر وچ 80ہزار بندے کرونا توں متاثر ہوئے، 2700بندیاں دی سکریننگ کیتی جا چکی اے، سب نوں ماسک پان دی لوڑ نہیں اے، صحت مند بندیاں لئی ماسک ضروری نہیں۔