کرونا وائرس دے معاملے تے کسے نوں سیاست نہیں کرنی چاہیدی: اعجاز شاہ
کوئٹہ: وفاقی وزیر داخلہ اعجاز شاہ آکھیا اے کرونا وائرس دے معاملے تے کسے نوں سیاست نہیں کرنی چاہیدی، پاکستان دی پوزیشن وائرس نوں کنٹرول کرن وچ دوجے ملکاں توں بہتر اے۔
کوئٹہ دے سول سیکرٹریٹ وچ چیف سیکرٹری دے نال نیوز کانفرنس کردیاں اعجاز شاہ دا کہنا سی صوبائی حکومت نال ملاقات کرن آیا آں، کرونا وائرس نال نبڑن لئی وفاقی حکومت توں صوبائی حکومت نوں تعاون دی پیشکش کیتی اے۔
اعجاز شاہ آکھیا جہڑے اقدامات کیتے جانے نیں اوہ وفاق تے صوبائی حکومت کر رہی اے، صوبائی حکومت ولوں جہڑی چیزاں دی درخواست کیتی گئی اے، ایہدے تے عملدرآمد کیتا جا رہیا اے، کرونا وائرس اک وباء اے، ایہدے بارے آگاہی دی لوڑ اے، جے کھانسی، نزلہ یاں زکام دی شکایت ہووے تے فوری ٹیسٹ کراؤ، ضروری نہیں کہ وائرس لگ جان لئی ایران یاں چین دا دورہ کیتا جاوے۔
وفاقی وزیر داخلہ دا کہنا سی پاک ایران سرحد تے ایس ویلے واپس آن والے زائرین دی تعداد 3ہزار دے لگ بھگ اے۔ مولانا فضل الرحمان بارے سوال دے جواب وچ اوہناں دا کہنا سی مولانا صاحب توں پچھو کیہنے اوہناں نال وعدہ کیتا اے۔
