لہور ہائیکورٹ، لہور دے سارے سٹور، ہوٹلاں تے پولی تھین بیگز تے پابندی لاگو

لہور: ہائی کورٹ نے لہور دے سارے سٹوراں، بیکریاں تے ہوٹلاں تے پولی تھین بیگز دے استعمال تے پابندی لاگو کر دتی۔ عدالت نے پولی تھین بیگز دا استعمال مکمل طور تے ترک کرن لئی دو ہفتیاں دا ویلا مقرر کر دتا۔ جسٹس شاہد کریم نے سلمان خان نیازی ایڈووکیٹ دی عرضی تے سنوائی کیتی۔

درخواست گزار نے عدالت نوں دسیا اجے تک کئی سٹوراں تے پولی تھین بیگز دا استعمال جاری اے جو عدالتی حکم دی خلاف ورزی اے، پنجاب حکومت تے محکمہ ماحولیات وی عدالتی حکم تے عمل نہیں کر رہیا ایس لئی ذمہ داراں دے خلاف کاروائی کیتی جاوے۔

جسٹس شاہد کریم نے ریمارکس دتے اگلے مرحلے وچ پنجاب دے دوجے شہراں وچ پولین تھین بیگز دے استعمال تے پابندی بارے حکم جاری کراں گے۔ محکمہ ماحولیات دے وکیل نے دسیا عدالتی حکم تے عملدرآمد کروا دتا گیا جہدے تے جسٹس شاہد کریم آکھیا عدالتی حکم تے عملدرآمد نہ کرن والیاں نوں نتائج بھگتنا ہون گے۔

لہور ہائی کورٹ نے وکھو وکھ کمپنیاں نوں ہدایت کیتی اگلی سماعت تے دسو کہ کنی دیر وچ پلاسٹک بوتلاں دا استعمال ختم کرن گے۔ عدالت نے کیس دی ہور سماعت 13مارچ تک ملتوی کر دتی۔