توں تے میں
گلفام نقوی
میں تے توں
دو اجہے لفظ ہاں
جیویں اک لفظ دا تے معنی ہوندا اے
تے دوجا نال ایویں گھسیٹیا جاندا اے
جس لفظ دا معنی نہیں ہوندا
اوہدا ہونا نہ ہونا اک برابر ہوندا اے
کیوں جے اوہدا کوئی مطلب ای نہیں
تے اوہدے نال ہون دا مقصد وی کیہ اے
پرانج لگدا اے کدی نہ کدی
گل دا وزن وی تاں پورا ہوندا اے
جدوں معنی دے نال غیر معنی لفظ لگدا اے
ایسے طرح توں معنی تے میں غیرمعنی دوویں
کدی نہ کدی کِتے نہ کِتے
ضرور کٹھے ہو جانے آں
میں غیرمعنی لفظ وانگوں
اس گمنام جزیرے وانگوں
سدا ای تیری منتظر رہی آں
پتہ نہیں
خورے کدوں توں بھلیا‘ چکیا‘
یا کسے بے رحم لہر دے
تھپیڑے کھاندا آ جاویں
تے ساڈا دنیا تے ہون دا
کوئی مقصد بن جاوے
بھاویں لکھ توں معنی تے میں بے معنی
پر کدی کدی
تیرے نال ضرور ہونی آں
