عالمی ماں بولی دیہاڑ دے حوالے نال پنجابی اکٹھ

اکٹھ وچ شاعر،اردو لکھن والے سجن وی شامل سن پَرپنجابی کلام ای سنایا گیا

اکبر علی غازی

20 فروری 2023 نوں بزم عرفان سخن سیالکوٹ، سانجھ پنجابی بیٹھک تے سیف ہینڈ ویلفیئر آرگنائزیشن سیالکوٹ دی چھتر چھاویں اک اچ کوٹی اکٹھ منعقد کیتا گیا۔ ایہہ اکٹھ فیکٹری ایریا سیالکوٹ وچ پاکستان سپورٹس ایسوسی ایشن دے کھلے ڈھلے ہال وچ اپنے طے شدہ ویلے اتے یعنی دو وجے شروع کر دتا گیا۔
۔مطلب اکٹھ دے پردھان، اچیچے پروہنے تے بلاوے توں وی بغیر ۔ ایس گل تے راقم آہریاں نوں سراہندا اے کیوں جے کئی پروگرام تن تن گھنٹے کویل کر کے شروع کیتے جاندے نیں جیہڑا کہ ماڑا کم اے۔ ایس اکٹھ دی صدارت پنجابی زبان تے ادب دے اچ کوٹی محقق، نقاد، شاعر تے سیوک ڈاکٹر احسان اللہ طاہر ہوراں کیتی۔
جدوں کہ پروفیسر اختر چیمہ تے خالد لطیف اچیچے پروہنے سن۔ سیالکوٹ دے مایہ ناز شاعر ، پبلشر تے سٹیج سیکرٹری رحمان امجد مراد ہوراں نے پروگرام شروع کروایا جدوں کہ بعد وچ ایہہ ذمہ داری رحمان امجد ہوراں بھیالی پاکستان سیالکوٹ دے بانی تے صدر ڈاکٹر اکبر علی غازی ہوراں نوں دے دتی۔ پروگرام دا مڈھ حافظ ذیشان یاسین ہوراں دی کیتی ہوئی تلاوت کلام پاک توں بنھیا گیا۔ عبید رضا تے قیصر انیس ڈار ہوراں نعت رسول مقبول دی سعادت حاصل کیتی۔
پاکستان سپورٹس گڈز مینو فیکچررز اینڈ ایکسپورٹرز ایسوسی ایشن سمال انڈسٹری سیالکوٹ دے جنے عہدے داراں گل بات کیتی پنجابی وچ کیتی تے اکٹھ دے منعقد ہون اتے خوشی دا اظہار کیتا۔ ایس حوالے نال شمس پرویز ضلعی صدر ایسوسی ایشن، محمد حسین بٹ، عبدالنصیر استاذ تے عالم دین، محمد حسین بٹ ، خالد لطیف ایڈیٹر سٹی میگ سیالکوٹ، میاں ساجد علی چیئرمین علامہ اقبال سٹمپ سوسائٹی ، ڈاکٹر نصیر اسد تے چار ہور علمی تے دینی شخصیتاں نے گل بات کیتی تے ماں بولی وچ پڑھائی لکھائی دے فیدیاں تے چانن پایا۔ درجن بھر شاعراں تے سوجھواناں نے پنجابی زبان دی لگوتی تے مہانتا دی گل کیتی تے ساریاں سجناں پنجابی وچ ای دل دیاں گلاں سانجھیاں کیتیاں۔
میاں ساجد علی ہوراں وی پنجابی نال علامہ صاحب دی جڑت اتے کجھ گلاں سانجھیاں کیتیاں۔ ایس اکٹھ وچ وڈی تعداد وچ پڑھیاراں ، کارخانہ داراں تے دین دیاں پہریداراں نے رلت کیتی۔سکول ، کالج دے پڑھیاراں دے نال نال حفظ کر دے حافظاں نے ماں بولی وچ ہون والیاں گلاں بڑے دھیان نال سنیاں تے تاڑیاں وجا کے پسند دی پدھر توں جانو وی کرایا ۔ یونیورسٹی آف سیالکوٹ تے یونیورسٹی آف نارووال دی نمائیندگی وی موجود سی۔ اوہناں گل بات وی کیتی تے کلام وی سنایا۔ شاعراں وچ اردو لکھن والے سجن وی شامل سن پر ایس اکٹھ وچ پنجابی کلام ای سنایا گیا۔
محمد عرفان بزمی بانی تے صدر بزم عرفان ادب تے ایس اکٹھ دے آہری، صغیر حسین صغیر اردو پنجابی شاعر، شبیر حسین شبیر سخنوی مصنف داستان سوہنی مہینوال تے تن ہور کتاباں، رحمان امجد مراد چھ اردو تے تن پنجابی کتاباں دے مصنف تے المراد پبلی کیشن دے بانی، خالد محمود چوہدری اک پنجابی تے اک اردو کتاب دے مصنف، ارشد ثانی اک اردو مجموعہ، فرانسس سائل دو اردو تے اک پنجابی کتاب دے مصنف، ڈاکٹر نصیر احمد اسد پی ایچ ڈی اردو تے اکٹھ دے پردھان ڈاکٹر احسان اللہ طاہر ہوراں نے جنہاں دیاں کتاباں دی گنتی تریہہ توں ٹپ چکی اے تے پندرہ دے نیڑے ایچ ای سی پدھر دے تحقیقی مضمون وچ چھپ چکے نیں ، نے مستقبل دے حافظاں، خطیباں تے عالماں اتے اچیچا دھیان دتا تے تقریبا ساری گل بات اوہناں نوں ای مکھ رکھ کے کیتی تے دسیا پئی زبان اللہ دیاں نشانیاں وچوں اک اے تے مسلمان نوں زیب نئیں دیندا پئی اللہ دی نشانی نوں بھل جاوے، کنڈ پچھے سٹ دیوے یا بے دھیانی کر چھڈے۔
سنن والیاں دے بار بار کہن تے دو کو شعر ای سنائے۔ راقم نے وی مڑ مڑ ایہہ ای بینتی چیتے کروائی رکھی پئی ماں بولی نوں ہر ویلے چیتے رکھو تے آپس وچ گل بات لئی پنجابی ای ورتو۔ایس بھرویں تے کامیاب اکٹھ دی آہری محمد عرفان بزمی تے ظفر بٹ ایم ڈی سیف ہینڈ آرگنائزیشن تے پنجابی ادبی بیٹھک نوں ڈھیر مبارکاں۔
بیٹھک دے آخر وچ رلت کرن والیاں پڑھیاراں، سوجھواناں ، شاعراں تے گل بات کرن والے دوجے سجناں نوں میڈل تے سنداں دتیاں گئیاں۔ ڈاکٹر احسان اللہ طاہر ہوراں نوں تے پنج ہور رلتیاں نوں میان سمیت تلواراں وی دان کیتیاں گئیاں۔