ایہ فیصلہ کس نے کیتاکہ مینوں آن نہیں دینا؟عمران خان
لہور(پنجابی میڈیاگروپ)پاکستان تحریک انصاف دے چیئرمین عمران خان نے آکھیا اے کہ میں پچھدا ہاں ایہ فیصلہ کس نے کیتا کہ مینوں آن نہیں دینا؟ اوہناں آکھیا کہ مینوں سیکیورٹی خدشات رانا ثنا اللہ تے ہوراں لوکاں توں نیں ۔ ایہ گل اوہناں نے اے آر وائی نیوز نوں خصوصی انٹرویو دیندیاں ہویاں آکھی، اوہناں نے آکھیا کہ ساڈی حکومت ہندیاں ہویاں اوہ طاقت پلس نوں کنٹرول کررہی سی، میں پچھدا ہاں کہ کس نے فیصلہ کیتا اے کہ عمران خان نوں آن نہیں دینا، مینوں سیکیورٹی خدشات رانا ثنااللہ تے ہوراں لوکاں توں نیں، اگر میں اج ایہ کہہ دیاں کہ اینہاں نوں این آر او دے دیاں گا تے مینوں لاحق سیکیورٹی خطرہ گھٹ ہوجائے گا ۔ موجودہ صورتحال اُتے گل کردیاں ہویاں اوہناں نے آکھیا کہ ملک وچ ایس ویلے ضیاالحق دے زمانے ورگا خوف دا نظام بنا دتا گیا اے سیاسی کارکناں اُتے اینج دا ظلم کَدی نہیں ویکھیا ، میں سوچ وی نہیں سکدا ساں کہ ملک وچ اینج دے حالات ہون گے۔اوہناں نے دسیا کہ میرے خلاف قتل، ات گردی تے توہین مذہب دے الزاماں تحت 80مقدمے درج کرادتے گئے، اینہاں دی کوشش اے کہ میں عدالتوں وچ پھرتا رہواں تے انتخابی مہم نہ چلاواں، پہلاں ایہ ظلم کردے نیں تے فیر بعد وچ کوراپ کردے نیں، بیشرمی ویکھو کہ ظل شاہ دے قتل دا کیس میرے اُتے کیتا تے 4 دن بعد آکھیا کہ ایہ حادثہ اے ۔ پی ٹی آئی دے چیئرمین نے آکھیا کہ مریم نواز نے نیب وچ پیشی اُتے پتھرائو کیتا، اینہاں لوکاں دا فیر وی کجھ نہیں ہویا، مریم ساری جگہ کہندی پھر رہی اے کہ عمران خان نوں جیل وچ پائو تے نوازشریف دے کیسز ختم کرو، ملک وچ ایہ کوئی قنون اے یا ایس ملکہ دے حکم اُتے ہی اوس نوں چلنا اے؟ میرا وی لندن وچ فلیٹ سی، نوازشریف مینوں عدالت لے کے گیا، میں اپنے فلیٹ بارے اک اک دستاویزات پیش کیتی تے پوری منی ٹریل دتی۔
