محکمہ اطلاعات و ثقافت، حکومت پنجاب دی چھتر چھاویں پنجابی ثقافت دیہاڑ
پنجاب انسٹیٹیوٹ آف لینگوئج، آرٹ اینڈ کلچر
پلاک ولوں نگران وزیراعلیٰ پنجاب محسن رضا نقوی‘ وزیر اطلاعات و ثقافت عامر میر تے سیکرٹری اطلاعات و ثقافت علی نواز ملک نوں پگڑی پوائی گئی
مرداں نے ثقافتی لباس وچ پگڑی‘ لاچے‘ کھسے‘ واسکٹ جد کہ زنانیاں نے جھمکے‘ پراندے‘ چوڑیاں تے گوٹے کناری والے سوٹ پائے ہوئے سن
علی قیصر
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دیر پربندھ ہیٹھ پنجاب ثقافت دیہاڑ 14مارچ نوں الحمرا مال روڈ لہور وچ پورے جوش و خروش نال منایا گیا جہدے وچ شہریاںدی کثیر تعداد نے رلت کیتی۔
مرداں نے ثقافتی لباس وچ پگڑی‘ لاچے‘ کھسے‘ واسکٹ جد کہ زنانیاں نے جھمکے‘ پراندے‘ چوڑیاں تے گوٹے کناری والے سوٹ پائے ہوئے سن۔ نگران وزیر اطلاعات و ثقافت پنجاب عامر میر‘ وزیر اوقاف سید اظفر علی تے سیکرٹری اطلاعات و ثقافت پنجاب علی نواز ملک نے اچیچی رلت کیتی تے پروہنیاں نوں پگڑیاں تے پنجاب ثقافت دیہاڑ دے بیج پیش کیتے گئے جد کہ ڈائریکٹر جنرل پلاک بینش فاطمہ ساہی نے زنانیاں نوں چنریاں پیش کیتیاں۔
پلاک ولوں نگران وزیراعلیٰ پنجاب محسن رضا نقوی‘ وزیر اطلاعات و ثقافت عامر میر تے سیکرٹری اطلاعات و ثقافت علی نواز ملک نوں پگڑی پوائی گئی تے سووینئر پیش کیتے گئے۔ایس موقع تے ایگزیکٹو ڈائریکٹر آرٹ کونسل تے ایڈیشنل سیکرٹری (کلچر) محکمہ اطلاعات و ثقافت نازیہ جبیں‘ ایگزیکٹو ڈائریکٹر پنجاب آرٹ کونسل محبوب عالم‘ ڈائریکٹر پلاک ڈاکٹر عاصم چودھری تے ڈائریکٹر پروگرام ڈاکٹر خاقان حیدر غازی وی موجود سن۔
وزیر اطلاعات و ثقافت پنجاب عامر میر نے کہیا کہ ایس واری پنجاب ثقافت دیہاڑ دا لوگو تبدیل کردتا گیا جہدے وچ پنجابی مرد تے زنانی نوں پنجابی لباس پائے وکھایا گیا اے۔ مرد نے کرتا تے پگڑی جد کہ زنانی نے گوٹے کناری والا دوپٹہ‘ جھمکے تے پراندہ پایا ہویا اے۔ اوہناں آکھیا کہ موجودہ لوگو پنجاب دی ثقافت دی بھرواں نمائندگی کردا اے ۔ ایس توں پہلاں شملے دی ’’پگ‘‘والا لوگو جاگیردارانہ علامت دی عکاسی کردا سی۔ اوہناں نے آکھیا کہ پنجاب ثقافت دیہاڑ دے حوالے نال پلاک ولوں کیتے گئے انتظامات دی بہت تعریف کیتی۔
ڈائریکٹر جنرل پلاک بینش فاطمہ ساہی نے پنجاب ثقافت دیہاڑ دی تقریباں وچ شمولیت کرن والیاں دا شکریہ ادا کیتا تے کہیا کہ پنجاب
دی ثقافت دی رنگا رنگی پوری دنیا وچ مشہور اے۔ ایہدے تہوار‘ کپڑے‘ ویاہ دی تقریباںتے کھانے اپنی مثال آپ نیں۔
پنجاب انسٹیٹیوٹ آف لینگوئج، آرٹ اینڈ کلچر، پِلاک نے پنجاب ثقافت دیہاڑد ے موقع تے کئی پروگرام پیش کیتے جہناں وچ ڈھول پرفارمنس‘ گھوڑا ناچ‘ اونٹ ناچ‘ بانسری‘ ونجلی‘ شہنائی تے چمٹا پرفارمنس ‘ ہیر گائیکی‘ ٹپے ماہیے‘ گدا تے بھنگڑا پیش کیتا گیا۔ لوک موسیقی وچ نامور گلوکار عارف لوہار تے فضل جٹ‘ صوفیانہ کلام گائیکی وچ سائیں ظہور تے ایس دے علاوہ گلوکارہ ترنم ناز تے دوجیاں نے اپنی آواز دا جادوجگا کے حاضرین کولوں بھرواں داد وصول کیتی۔
دستکاری بازار وچ کڑھائی والے دوپٹے‘ شالاں‘ کرتے‘ بیگ‘ کھسے‘ زیورات‘ مٹی دے سوہنے برتن تے لکڑی نال بنی شیواں سن۔ کھانے دے سٹالاں وچ دہی بھلے‘ گول گپے‘ چنے چاٹ‘ حلیم‘ چنے پٹھورے‘ قتلمہ‘ سموسے پکوڑے‘ جلیبی‘ مکئی دی روٹی تے سرساں دا ساگ تے لسی شامل سی۔ تقریب وچ آن والے پروہنیاں نے پنجابی پنڈ تے اوہدے ذریعے پیش کیتی جان والی پنجابی ثقافت دی بہت تعریف کیتی تے حکومت دے پنجاب ثقافت دیہاڑ منان دے اقدام دی بہت پذیرائی کیتی۔
