لہور ہائیکورٹ:عمران خان دی 9مقدمیاں وچ حفاظتی ضمانت منظور

لہور(پنجابی میڈیاگروپ)لہور ہائیکورٹ نے پاکستان تحریک انصاف دے چیئرمین تے سابق وزیراعظم عمران خان دی9مقدمیاں وچ حفاظتی ضمانت منظورکر لئی ۔ سابق وزیراعظم عمران خان ولوںحفاظتی ضمانت لئی دائر درخواست دی سماعت جسٹس طارق سلیم شیخ تے جسٹس فاروق حیدر اُتے مشتمل 2رکنی بینچ نے کیتی،عدالت نے عمران خان دے خلاف اسلام آباد وچ درج مقدمیاں وچ24مارچ تک جدکہ لہور وچ درج مقدمیاں وچ27مارچ تک حفاظتی ضمانت منظور کیتی ۔ دوران سماعت سابق وزیراعظم عمران خان نے آکھیا کہ میرے اُتے قاتلانہ حملہ ہو چکیا اے، میں قنون دی حکمرانی اُتے یقین رکھدا ہاں، ساری زندگی کَدی قنون نہیں توڑیا، میری صرف ایہ استدعا اے کہ کہچری والا کیس کِدھرے ہور منتقل کر دتا جائے۔چیئرمین پی ٹی آئی دا کہنا سی کہ اینہے زیادہ کیس نیں، سمجھ نہیں آندی، اک وچ ضمانت لاں دُوجے وچ پرچہ آندا اے جس اُتے جسٹس طارق سلیم شیخ نے آکھیا کہ اگر تُسی سسٹم نال چلو تے ٹھیک رہندا اے۔وکیل نے آکھیا کہ عمران خان نوں تاحال مقدمیاں دی تفصیل توں آگاہ نہیں کیتا گیا جس اُتے جسٹس طارق سلیم شیخ دا کہنا سی کہ ساڈے کول جنہاں کیساں وچ ضمانت دائر ہوئی اے اوس وچ ہی ضمانت دے سکدے ہاں۔اییس توں پہلاں وکیل اظہر صدیق ایڈووکیٹ نے رجسٹرار لہور ہائیکورٹ توں عمران خان دی بلٹ پروف گڈی دے احاطہ عدالت وچ داخلے دی درخواست کیتی جس نوں رجسٹرار آفس نے منظور کر لیا، عمران خان دی آمداُتے کارکناںدی وڈی تعداد لہور ہائیکورٹ دے باہر موجود سی۔ایس موقع اُتے سکیورٹی دے سخت انتظام کیتے گئے جدکہ پلس دی اضافی نفری وی لہور ہائیکورٹ موجود رہی، پلس تے اینٹی رائٹ فورس دے اہلکار لہور ہائیکورٹ دے باہر تعینات کیتے گئے سن۔لہور ہائیکورٹ روانگی ویلے عمران خان نے اپنے قریبی ساتھیاں نال گل بات وچ آکھیا کہ جیہڑا حق سچ دے ساتھ ہندااے اللہ اوس دی مدد کردا اے، میرا مدد گار اللہ اے، میں خدا دا شکر ادا کردا ہاں جس نے اینہی عزت دتی، میرے کارکن میرا سرمایہ نیں ، حق سچ دے نال کھڑے کارکناں نوں ویکھ کے خوشی ہُندی اے۔خیال رہے کہ عمران خان نے9 مقدمیاں وچ حفاظتی ضمانت لئی لہور ہائیکورٹ نال رجوع کیتا سی، عمران خان دے خلاف اسلام آبادوچ 5، لہوردے تھانہ ریس کورس وچ3 جدکہ لہوردے تھانہ سرور روڈ وچ اک مقدمہ درج سن۔