زمان پارک تربیت یافتہ اَتگرد نیں: مریم نواز

لہور( پنجابی میڈیاگروپ)مسلم لیگ ن دی سینئر رہنما مریم نواز نے آکھیا اے کہ زمان پارک وچ سیاسی کارکن نہیں بلکہ تربیت یافتہ ات گرد نیں، ایس توں پہلاں بوہت دیر ہوجائے ریاست کارروائی کرے ۔ سماجی رابطے دی ویب سائٹ ٹوئٹر اُتے اک بیان وچ مسلم لیگ ن دی سینئر رہنما مریم نواز نے ویڈیو جاری کردیاں ہویاں آکھیا اے کہ اینہاں ویڈیووز نوں نیڑے توں ویکھ کے،ایس حقیقت نوں نظر انداز کرنا مشکل اے کہ ایہ سیاسی کارکن نہیں ، اوہ تربیت یافتہ ات گرد تے کالعدم تنظیماں نال بھرتی کیتے گئے شرپسند نیں جناں دی عمران خان نے ہمیشہ حمایت کیتی اے۔مریم نواز نے مطالبہ کردیاں ہویاں آکھیاکہ ثبوت خود بولدا اے، ایس توں پہلاں کہ بوہت دیر ہو جائے ریاست نوں کارروائی کرنی چاہیدی۔خیال رہے کہ پچھلے دناں لہوروچ پلس نے چیئرمین پی ٹی آئی عمران خان دی رہائش گاہ زمان پارک اُتے آپریشن کیتا، جس وچ اسلحہ سنے کئی ممنوعہ شیواں برآمد ہویاں، انتظامیہ نے ایس دوران تجاوزات ہٹا دتیاں، جدکہ پی ٹی آئی دے کئی کارکن وی گرفتارکیتے گئے۔