الیکشن ہی ملکی مسائل دا حل اے: مریم نواز نے وی اعتراف کر لئیا

لہور(پنجابی میڈیاگروپ)چیف آرگنائزر و سینئر نائب صدر مسلم لیگ (ن)مریم نواز نے آکھیا اے کہ الیکشن دے علاوہ مسائل دا کوئی حل نہیں، ہر5ورھیاں بعد الیکشن ہونے چاہیدے ۔لہور وچ لائرزونگ دے عہدیداراں نال خطاب کردیاں ہویاں مریم نواز نے آکھیا کہ نواز شریف دے نال زیادتیاں کیتیاں گئیاں، میری والدہ دے الیکشن وچ تُسی ساریاں ساتھ دتا، بوہت جذبے دے نال تہاڈے لوکاں نے مشکل ویلے ساتھ دتا ، نواز شریف دے بیانیے نوں اگے ودھان وچ تہاڈا کردار واضح اے، قیادت دی سطح اُتے تہانوں او توجہ نہیں ملی جیہڑی تہاڈا حق سی۔مسلم لیگ (ن)دی رہنما نے ہور آکھیا کہ پی ٹی آئی دی پوری سیاست سہولت کاراں دے آسے پاسے گُھومدی اے، عمران خان نے جتھے لے کے عدالتاں اُتے حملہ کیتا، عمران خان آئین تے قنون دیاں دھجیاں اڑایاں، پاکستان دا قنون کیتھے سو رہیا اے؟ملک وچ انصاف دے ترازو دے پلڑے برابر نہیں، ن لیگ دی قیادت نے جھوٹے مقدمیاں دا سامنا کیتا، زمان پارک وچ پلس اُتے حملہ کیتا گیا پٹرول بم سُٹے گئے۔ مریم نوازدا کہنا سی کہ کون اے جیہڑا اج وی عمران خان نوں بچا رہیا اے، عمران خان دی ساری سیاست اسٹیبلشمنٹ دے آسے پاسے گُھومدی اے، خان صاحب تہاڈا دامن داغدار نہیں تے عدالتاں سامنے پیش ہوو، الیکشن ہی ملکی مسائل دا حل نیں، ہر پنج ورھیاں بعد الیکشن ہونے چاہیدے نیں، اسیں الیکشن توں فرار نہیں چاہندے اسیں الیکشن لئی تیار ہاں۔