مسلم لیگ (ن) عدلیہ تے ججاں خلاف سازشاں توں باز رہے،چودھری پرویز الٰہی

لہور(پنجابی میڈیاگروپ)سابق وزیراعلیٰ پنجاب و مرکزی صدر پاکستان تحریک انصاف چودھری پرویز الٰہی ہوراں آکھیا اے کہ مسلم لیگ (ن) عدلیہ تے ججاںدے خلاف منظم سازشاں توں بازرہے۔لہوروچ سابق ارکان اسمبلی تے سینئر وکیلاں نال ملاقات وچ گل کردیاں ہویاں پرویزالٰہی نے آکھیا کہ مسلم لیگ (ن) اپنے مفادلئی معزز ججاں نوں بدنام کر رہی اے، وزیراعظم عدلیہ اُتے تنقید کرن توں پہلاں اپنا ماضی کیوں بھُل جاندے نیں، ایہ اوہی شہباز شریف نیں جیہڑے فون کرکے ججاں توں اپنی مرضی دے فیصلے کرواندے رہے۔پی ٹی آئی صدر نے ہور آکھیا کہ آئین دی بالادستی تے تحفظ اُتے عدلیہ وچ کوئی اختلاف نہیں، تکنیکی امور اُتے اداریاں وچ اختلاف رائے ہونا کوئی غیر معمولی گل نہیں، سب جج صاحبان یکساں طور اُتے قابل احترام تے آئین دے محافظ نیں۔