عمل حسینیؑ لبھدا ناہیں
جان کاشمیری
ناں دے حسینیؓ مِلدے گھر گھر، عمل حسینیؓ لبھدا ناہیں
سبھ کُجھ لبھدا جگ دے اندر عمل حسینیؓ لبھدا ناہیں
جھوٹ اے بُہتا سچ اے تھوڑا، تھوڑے توں وی بُہتا تھوڑا
چاروں پاسے پِھردے قلندر عمل حسینیؓ لبھدا ناہیں
ڈونگھیاں سوچاں عشق دے آڈے لمے پینڈے یار دراڈے
رَتّو رتّو حق دا منظر عمل حسینیؓ لبھدا ناہیں
رَت وچ ڈوبے لاوے کیہڑا آکے دین بچاوے کیہڑا
کھوجی کھاندے ٹھوکراں در در عمل حسینیؓ لبھدا ناہیں
مَرن توں پہلاں مردے ناہیں سوچ دا حج اے کردے ناہیں
تھاں تھاں پُھوں پَھاں کردے خود سر عمل حسینیؓ لبھدا ناہیں
