بھٹو دے نواسے نے بھٹو دے آئین اُتے حملے دا فیصلہ کر لئیا،شاہ محمود قریشی
کراچی (پنجابی میڈیاگروپ)پاکستان تحریکِ انصاف دے وائس چیئرمین شاہ محمود قریشی نے آکھیا اے کہ بھٹو دے نواسے نے بھٹو دے آئین اُتے حملے دا فیصلہ کر لئیا اے، جیہڑا آئین بھٹو نے بنایا اوہ زرداریاں نے برباد کر دتا ، ساڈی متفقہ رائے اے مسلم لیگ ن نے آئین اُتے حملے دا فیصلہ کیتا اے، ن لیگ نے سپریم کورٹ نوں دبائو وچ لیان دا فیصلہ کیتا اے،اک پاسے کہندے نیں کہ اسمبلیاں وچ آکے کردار ادا کرو، دُوجے پاسے اسپیکر ساڈی راہ وچ رکاوٹ بنے ہوئے نیں، اسیں اوہناں دی چال وچ نہیں پھساں گے ۔ میڈیا نال گفتگو کردیاں ہویاں اوہناںنے آکھیاکہ شہباز شریف اسمبلی دے فلور اُتے کہندے نیں کہ تبادلہ خیال کرنا چاہیدا تے مذاکرات ذریعے ملک نوں ایس سیاسی کشمکش توں آزاد کرنا چاہیدا اے لیکن پچھلے دناںدے اعلامیے وچ آکھیا گیا کہ ہُن عمران خان یا پی ٹی آئی نال کوئی گل بات نہیں ہوئے گی، ایہ بلکل اُلٹ گل کیتی گئی اے۔اوہناںنے آکھیاکہ اک پاسے کہندے نیںکہ اسمبلیاں وچ آ کے کردار ادا کرو تے دُوجے پاسے جَد اسیں اپنے مقصد لئی یعنی نویں الیکشن دی کوشش وچ قومی اسمبلی وچ جان اُتے آمادگی ظاہر کردے ہاں تے پیپلزپارٹی دے اسپیکر راجا پرویز اشرف جیہڑے آئے دن دعوت دتا کردے سن اوہ ہُن رستے وچ رکاوٹ بنے ہوئے نیں، ایس حوالے نال ہائی کورٹ وچ مقدمہ چل رہیا اے۔اوہناں نے کہ6اپریل دی تریخ اے، امید اے کہ ہارئی کورٹ فیصلہ فرمائے گی، جِداں الیکشن کمیشن دا نوٹی فکیشن مستر د ہویا، میں سمجھدا ہاں کہ اسپیکر قومی اسمبلی نوں وی واضح پیغام جائے گا تے تحریک انصاف دے اراکان اسمبلی وچ جا کے اپنا کردار ادا کرسکن گے۔
