سی پیک دے خلاف فارن فنڈڈ فتنے دی سازش نکام بنا دتی:مریم نواز
لہور(پنجابی میڈیا گروپ)مسلم لیگ(ن) دی چیف آرگنائزر مریم نواز نے آکھیا اے کہ وزیر اعظم شہباز شریف تے صدر شی جن پنگ آہنی بھائی چارے نوں ہورمضبوط بنا رہے نیں۔اپنے اک بیان وچ مریم نواز نے آکھیا کہ2020توں بند ہون دے بعد2023وچ خنجراب پاس دا دوبارہ کھلنا خوشی دی خبر اے جس اُتے چین تے پاکستان دی قیادت تے دوناں ملکاں دی عوام نوںمبارک ہوئے، 3 ورھیاں بعد چین پاکستان تجارت تے آمد و رفت فیر بحال ہو گئی اے۔ مسلم لیگ(ن)دی سینئر نائب صدر مریم نواز نے ہور آکھیاکہ نومبر2016توں سی پیک فریم ورک تحت ایہ ارینجمنٹ بہترین جا رہیا سی جیہڑا نومبر2019وچ بند ہو گیا سی، خنجراب پاس دے دوبارہ کھلن نال دوناں پاسیاں دی عوام دیاں مشکلاں ختم کرن وچ مدد ملے گی۔مریم نواز نے آکھیا کہ نواز شریف سی پیک دے معمار نیں، چین دی مدد نال سی پیک ذریعے پاکستان دی ترقی دا عظیم منصوبہ شروع کیتا سی، مسلم لیگ(ن)دوردی رفتارنال سی پیک تے پاک چین تجارت جاری رہندی تے اج عوام بدحال نہ ہُندی، چین پاکستان تعلقات قومی سلامتی دی سرخ لکیر اے۔اوہناں نے آکھیا کہ پی ٹی آئی حکومت نے پاکستان چین تجارتی سرگرمیاں تے سی پیک دی رفتار متاثر کیتی، فارن فنڈڈ ایجنٹ نے سی پیک تے چین دے تعاون نال پاکستان وچ چلن والے منصوبیاں وچ کرپشن دے بے بنیاد الزام لائے سن، سی پیک دے خلاف فارن فنڈڈ فتنے دی سازش نکام بنا دتی، الحمداللہ
