عجلت وچ فیصلہ سنایا گیا تے نہیں مناں گے:اعظم نذیر تارڑ

اسلام آباد(پنجابی میڈیا گروپ)وفاقی وزیر قنون سینیٹر اعظم نذیر تارڑ نے آکھیا کہ اینہے حساس تے اہم معاملے اُتے عجلت وچ فیصلہ سُنایا گیا تے نہیں منیا جائے گا۔قومی اسمبلی دے اجلاس وچ اظہار خیال کردیاں ہویاں وزیر قنون سینیٹر اعظم نذیر تارڑ دا کہنا سی سپریم کورٹ تے حکمران اتحاد دی اک طویل مشاورت ہوئی،6دناں توں درخواست دتی اے کہ اسیں ایس وچ فریق ہاں ساہنوں فریق بنایا جائے، مطالبہ کیتا گیا سپریم کورٹ دی کارروائی وچ شفافیت لیائی جائے، اج سیاسی جماعتاںدے نمائندے عدالت وچ پیش ہوئے تے نراضی دا اظہار کیتا گیا،سپریم کورٹ دا حکم موجود اے لیکن ایس نوں اک ایگزیکٹو آرڈر نال معطل کر دتا گیا، ایس معاملے اُتے قنونی حلقیاں وچ شدید بے چینی اے۔وزیر قنون دا کہنا سی کہ ادارے اندروںآوازاں اُٹھ رہیاں نیں تے اینہاں آوازاں نوں نظر اندازکیتا جا رہیا اے، اٹارنی جنرل نے آکھیا کہ اینہاں ججاں اُتے مشتمل6رکنی بینچ بنا دیون جیہڑے ایس توں پہلاں بینچ وچ شامل نہیں سن ۔ اجے خبر آ گئی اے کہ فیصلہ محفوظ کر لئیا گیا اے تے کل سنایا جائے گا، اینہے حساس تے اہم معاملے اُتے عجلت وچ فیصلہ سنایا گیا تے نہیں منیا جائے گا ۔اوہناںنے آکھیا کہ جسٹس قاضی فائزعیسی بنچ نے فیصلہ دتا سی کہ قواعد مرتب ہون تک ازخودنوٹس سماعتاں روک دتیاں جان، اک اینج دا بنچ تشکیل دتا جاندا جس اُتے کوئی انگلی نہ چُکدا ،حیران کن طوراُتے اک وارفیر 3رُکنی بنچ نے سماعت شروع کردتی ، فل کورٹ دی استدعا دے باوجود ایسی بنچ نے سماعت جاری رکھی ہوئی اے،ساڈی استدعا سی کہ معاملے نوںسپریم کورٹ دا فل کورٹ بنچ سُنے، چیف صاحب پہلے اپنا گھر درست کرن۔