9 اپریل نوں بند کمریاں دی سیاست کامیاب ہوئی، اسد عمر

کراچی(پنجابی میڈیا گروپ)پاکستان تحریک انصاف (پی ٹی آئی) دے سیکرٹری جنرل اسد عمر نے آکھیا کہ9اپریل نوں بند کمریاں دی سیاست کامیاب ہوئی تے قوم مٹھائیاں ونڈن دی بجائے سڑکاں اُتے نکل آئی۔انصاف ہائوس وچ میڈیا نال گل بات کردیاں ہویاں رہنما پی ٹی آئی اسد عمر نے آکھای کہ اک منتخب حکومت نوں1ورھے پہلاں گھر گھلیا گیا جس دے خلاف لوگ سڑکاں اُتے نکل آئے، کراچی والے ملینیم مال اُتے خود جمع ہوئے، قومی ترانہ پڑھیا تے پاکستان دے نعرے لائے۔اوہناں نے آکھیا کہ اج تک قومی جذبہ ایہ حکومت نہیں سنبھال سکی، پاکستان دے تریخی جلسے ماہ رمضان وچ عمران خان نے کیتے، اوہ شخص جیہڑے پارلیمان وچ نہیں سی عوام اوس لئی نکلی، ایس ویلے پاکستان و اک شدید معاشی بحران اے۔اسد عمر نے آکھیا کہ لکھاں کاروبار بند ہو چکے، پہلاں سیاسی فیر معاشی بحران آیا، ایہ خوفزدہ ہوگئے نیں، اوہناں نوں احساس ہوگیا اے کہ اوہناں دا تجربہ نکام ہوگیا اے، پنجاب دے لوٹیاں خلاف 75 فیصد پی ٹی آئی کامیاب ہوئی۔اوہناں نے ہور آکھیا کہ حکومت نے جبر تے طاقت دا استعمال کیتا، عمران خان اوہناں دا ہدف سن، کوئی سیاسی رہنما مقدمیاں توں نہیں بچیا،3ہزار توں وَدھ سیاسی ورکرز گرفتار ہوئے، پاکستان دے ہر کونے توں تحریک انصاف دے ورکر گرفتار کیتے گئے، کسی دی عمردا خیال نہیں کیتا گیا، اعظم سواتی، ارسلان تاج، محمد سلمان، فواد چودھری تے کئی لوکاں نوں گرفتار کیتا گیا۔