تے گل کیہ سی
عبدالحمید نظامی
مولا میں وی آ جاندا مدینے دے ول تے گل کیہ سی
میریاں سدھراں دا وی ِنکل جاندا اک ول تے گل کیہ سی
میں تے دس بیٹھا ساں لوکاں نوں مدینے پاک جاون دا
لوک پچھن گے مینوں نہ آکھاں اج یا کل تے گل کیہ سی
حل کیتے نے بڑے مسئلے میرے صدقہ سوہنے دا توں
ایہہ وی اک نکا جیئا مسئلہ کر دیندوں حل تے گل کیہ سی
سُن لیناں ایں گلاں دلاں دیاں ساریاں توں مولا
جے ایہہ وی اک نکڑی جئی سن لیندوں گل تے گل کیہ سی
مدینے پاک جاون دی گل کیتی اے خبرے کیوں بے اختیار ہنجو
جگ دے ویکھن توں پہلاں لیندوں جے ٹھل تے گل کیہ سی
بڑے چاواں نال جاندے پئے او بلاوہ جو آیا اے
مینوں وی کہندے نظامیؔ اساڈے نال چل تے گل کیہ سی
