سیاسی صورتحال وی صبر آزما سطح اتے آن پہنچی

آئی ایم ایف کولوں قسط دا حصول تے دیرینہ دوست چین نال نویں بلاک وچ شمولیت بہت ضروری

وزیراعظم نال ملٹری قیادت دا ملک نوں اوکھے حالات توں کڈن لئی اپنی خدمات جاری رکھن دا عزم

فیصل ادریس بٹ

دنیا وچ بدلدے موسمی حالات دے پیش نظر سارے ملک انتظامی امور دا ازسر نو جائزہ لین لئی کم کر رہے نیں مگر پاکستان وچ بدلدے سخت موسمی مشکلات اتے توجہ نہیں دتی جا رہی جہدی بنیادی وجہ ملک وچ بدترین مہنگائی‘ سیاسی اختلافات‘ عدلیہ‘ پارلیمنٹ تنائو دی صورتحال نوں سمجھیا جاندا اے۔ کسی وی ملک وچ کوئی وی متنازعہ مسئلہ عدلیہ دے کول حل کروان لئی لے جایا جاندا اے مگر ایدھر عدلیہ نوں وی انتہائی متنازعہ بنا دتا گیا اے جہدے مگروں ہن ساڈے مسائل کون حل کرے گا؟
ایس ویلے ملک نوں اندرونی تے بیرونی سازساں دا وی سامنا اے جہدے اتے پاک فوج دے جوان دن رات محنت کر کے تے اپنی قیمتی جاناں دا نذرانہ پیش کر کے ایہناں اتے قابو پان دی کوشش کر رہے نیں۔ وزیراعظم شہباز شریف پاکستان دی تریخ دے مشکل ترین دور وچ وزارت عظمیٰ دے منصب تے فائز نیں۔ اوہ اپنی ساری صلاحیتاں نوں بروئے کار لیا کے پاکستان دے ایس سیاسی تے مالی بھنور توں کڈن چاہندے نیں۔ وزیراعظم پاکستان نے اپنی سیاسی ساکھ نوں پس پشت پا کے انتہائی مشکل فیصلے کیتے نیں جہدے توں ملک دی مشکلاں دا خاتمہ ہو سکے مگر ملک ایس طوفانی بھنور توں نکلن دا نام ای نہیں لے رہیا۔ ایس ناآگہانی صورتحال دے پیش نظر آرمی چیف سید عاصم منیر تے ڈی جی آئی ایس آئی جنرل ندیم انجم نے پچھلے دناں وزیراعظم میاں شہباز شریف نال ملاقات کر کے ملک نوں اوکھے حالات توں کڈن لئی اپنی خدمات جاری رکھن دے عزم دا اعادہ کیتا اے۔
ملک ایس ویلے جتھے مہنگائی دے جن نوں قابو نہیں کر پا رہیا اوتھے سیاسی صورتحال وی صبر آزما سطح اتے پہنچ چکی اے۔ حکومت اوکھے حالات وچ الیکشن کروان دی بجائے ملک دی گڈی نوں کھچ کے بھنور توں باہر لیان لئی اقدامات کر رہی اے جد کہ اک سیاسی پارٹی ملک وچ انتخابات ہر صورت جاہندی اے۔ ایہہ اوہ ویلا اے جہڑے ویلے ملکی قیادت ملک نوں ڈیفالٹ دی دلدل توں کڈن او آئی ایم ایف نوں ہر صورت مطمئن کرن لئی اوہدی ساری شرطاں پوری کرن لئی سرتوڑ کوششاں کر رہی اے۔ دوجے پاسے دنیا وچ طاقت دا توازن تبدیل ہو رہیا اے۔ اسیں اپنے دوست ملکاں دے نال ناصرف چنگے رابطے قائم رکھنے نیں بلکہ پرانے بلاک نوں چھڈن یا نہ چھڈن دا انتہائی مشکل فیصلہ وی عمل وچ لیانا اے۔ ایس لئی میں کہہ رہیا سی کہ پاکستان اپنے دور دے مشکل ترین وقت توں لنگھ رہیا اے۔ دنیا وچ چین‘ امریکہ دے مقابلے وچ سپر پاور دا دعویٰ کرن جا رہیا اے۔ وسطی ایشیا وچ چین نے امریکی حمایت یافتہ بلاک نوں اپنے کنٹرول وچ کر لیتا اے جیویں کہ لمے عرصے توں سعودی عرب تے ایران آپس وچ ازلی دشمن گردانے جاندے سن۔ چائنہ نے بہترین سفارتکاری کردیاں دونویں ملکاں دے وفود نوں شنگھائی وچ مدعو کر کے آپس وچ صلح کروا دتی اے۔ ایتھوں تک کہ دونویں ملکاں نے اک دوجے دے ملک وچ سفارتخانے وی کھول دتے نیں۔
سعودی عرب یمن جنگ دا وی اختتام ہو گیا اے۔ ہن سعودیہ‘ عمان دے صلح لئی مذاکرات ہو رہے نیں۔ چین لئی بنائے جان والے بلاک وچ عنقریب ملائیشیا تے ترکیہ وچ شامل ہون جا رہے نیں۔ چین دی سفارتکاری دی بنا تے روس وی ایس بلاک وچ اہم نمائندگی حاصل کر رہیااے۔ تزکیہ وچ حال ای وچ ہون والی آئل لانچنگ تقریب وچ ایہہ سارے ملک ناصرف شریک ہون گے بلکہ روس دے صدر پیوٹن ایس تقریب دے اچیچے پروہنے ہون گے۔ پاکستان سفارتی طور تے انتہائی مشکل دا شکار اے کہ اک پاسے تے آئی ایم ایف توں تسلط لے کے ملک نوں دیوالیہ ہون توں بچانا مقصود اے۔ دوجا اپنے پرانے دوست چین نال نویں بلاک وچ شامل ہونا وی بہت ضروری اے۔ حال ای وچ وزیراعظم شہباز شریف تے ارمی افسراں دی ہون والی میٹنگ وچ ارمی چیف نے اپنے چین دے دورے توں متعلق وی بریفنگ دتی اے جہدے چانن وچ ضروری اے کہ پاکستان غیر محسوس طریقے نال امریکی بلاک دی نمائندگی چھڈ کے چین دے بنن والے نویں بلاک وچ شامل ہو جاوے۔
برطانیہ وچ شہزادی دی تاج پوشی دی تقریب وچ وزیراعظم شہباز شریف رلت لئی اوتھے پہنچ چکے نیں۔ ایس تقریب وچ شمولیت دے علاوہ اہم گل ایہہ اے کہ شہباز شریف اپنے وڈے بھراں میاں نواز شریف نال وی ملکی مسائل تے اوہناں دے حل دے حوالے نال ملاقات کرن گے کیوں جے نواز شریف پاکستان دے تن واری وزیراعظم رہ چکے نیں۔ اوہ سفارتی طور تے وی منجھے ہوئے کردار دے حامل نیں۔ میاں نواز شریف نے اقتدار سنبھالن توں اقتدار چھڈن تک کئی بیرونی تے اندرونی حملیاں‘ سازشاں‘ بحراناں نوں شکست دتی اے۔ ایس ویلے ملک وچ سیاسی قد کاٹھ وچ اوہناں توں ماہر کوئی شخصیت موجو نہیں اے۔ امید اے کہ میاں نواز شریف بحراناں وچ پھسے ملک نوں ریلیف لئی وزیراعظم میاں شہباز شریف نوں کجھ تجویزاں دین گے جہدے توں ملک تے عوام اوکھے حالات توں نکل سکن۔
ن لیگ نے اقتدار سنبھالن مگروں توں لے کے ہن تک ملک نوں درپیش کئی بحران حل کیتے نیں جہدے توں پارٹی دے ووٹ بینک نوں نقصان تے پہنچیا اے مگر ملک نوں فیدا ہویا اے۔ وزیر اطلاعات و نشریات مریم اورنگزیب ناصرف حکومت دی ترجمانی بہترین انداز وچ کر رہیاں نیں بلکہ حیرت دی گل ایہہ اے کہ اوہ بیک وقت 85 رکنی کابینہ ن لیگ تے چیف آرگنائزر مریم نواز دی ترجمانی وی احسن انداز نال کر رہیاں نیں۔ اوہناں نوں ایہہ شرف وی حاصل اے کہ اوہناں دی زیر قیادت وفاقی محکمہ اطلاعات وی اوہناں دی ڈائریکشن اتے ملکی مفاد وچ شانہ بشانہ کم کر رہیا اے۔ وزیراعظم شہباز شریف تے مریم اورنگزیب دے سہیل علی خان نوں وفاقی سیکرٹری اطلاعات تعینات کیتے جان دے فیصلے نوں میڈیا ہائوسز بڑی قدر دی نظر نال ویکھدے نیں۔ سہیل علی خان بیرون ملک تعیناتی دے علاوہ ریڈیو‘ ٹی وی‘ پرنسپل انفارمیشن افسر تعیناتی دا وسیع تجربہ رکھدے نیں تے ملکی اعلیٰ اقدار صحافیاں دے نال اوہناں دے دوستانہ مراسم مثالی نیں۔
سہیل علی خان دی تعیناتی نال حکومت دی عوام دوست پالیسیاں دے فروغ وچ نمایاں بہتری آوے گی۔ حال ای وچ مریم اورنگزیب دی قیادت وچ سہیل علی خان نے پاکستان ٹیلی ویژن دی جدید ایپ متعارف کروا کے پاکستان ٹیلی ویژن نوں اک نویں روح پھونک دتی اے۔